ව්‍යාපාර සාර්ථක කරන බලගතු රහස

ව්‍යාපාරයක් අරඹන විටදී ජ්‍යොතිෂ මූල ධර්මයන්ට එකඟ වනසේ සීහුම් ඇතිව කළයුතු බැව් ඍෂි භාෂිතයේ සඳහන් වෙයි.

මුල – සියාවස – දෙට – උත්‍රපල් – උත්‍රසල – උත්‍රපුටුප – රෙහෙණ – හත – සුවණ – පුෂ – අස්විද – පුවපල් නැකැත්වලින්ද, අද, විසා, මා, රේවතී යන නැකැත් හරහා යෝග 7කින් එක් සුබ යෝගයක් පුද්ගලයා සතුවෙයි.
සඳුදා, බදාදා, බ්‍රහස්පතින්දා, සිකුරාදා යන දිනයන්හි ඒ කාල පරාසය තුළ අනිෂ්ට වූ රික්තා, ජලවක, නවවක, තුදුස්වක දුරුකොට ඉතාම සුබ ධනාත්මක තිථියක්ද යොදා ගෙන මීන, සිංහ, වෘශ්චික, වෘෂභ, තුලා, කන්‍යා ලග්නයන් අනුව සුබ වන හෝරාද අංශකද යෙදුවහොත් වෙළෙඳ ව්‍යාපාරයෙහි අති සාර්ථකත්වයට පත්වෙයි. ගනුදෙනු ක්‍රමවත්ව ඉටු වෙයි. පාඩු නොවී ව්‍යාපාරය දියුණුවට පත්වන බැව් සඳහන් කරමු.

ලක්‍ෂ්මී තඹ ත්‍රිකෝණ යන්ත්‍රය
ශ්‍රී මහා ධන ලක්‍ෂ්මී ත්‍රිකෝණ තඹ යන්ත්‍රය රන් තැඹිලි සහ සඳුන් තෙල් සහිතව සකස් කොට පූජාසනයේ තබා ලක්‍ෂ්මී දැහැනින් මන්ත්‍රවලින් 1000වර ජපකොට ඊට අදාළ සුවඳ ධූපයද ජීවම් කර වී පිරවූ මැටි බඳුනක සුබ මොහොතින් තැන්පත් කර ව්‍යාපාර ස්ථානයේ තබා සුවඳ දුම් අල්ලා වතාවත් දිනපතා කිරීමෙන් ව්‍යාපාරය දිනෙන් දිනම දියුණු වෙයි.
අත්හදා බලා සාර්ථකත්වයට පත් යන්ත්‍ර රත්නයකි.
ප්‍රවීණ ජ්‍යොතිෂවේදී ටී. හෙන්රි බෙම්මුල්ල