හදවත් සැනසූ ගායකයා

ආදරය වචනයෙන් බෙදාගත නොහැකිය. නමුත් ගීපද, සිතුවිලි අතර විරහව, වේදනාව හදවතට දැනෙන්න හඬ මුසු කළ එකම හඬ ඔබට අමුතුවෙන් කිව යුතු නැහැ. ඒ හඬ ඇසෙන විටත් ඔබේ හදවතට දැනෙන ආදර සිතුවිලිවල චිත්ත රූප නොමැකී ජීවමාන වෙන්නේ ඔබත් ආදරයෙන් වේදනා වින්ද නිසා විය හැකිය.
එලෙස ඔබේ හදවතට කතා කළ ඒ සුමිහිරි හඬෙහි හිමිකරුවා වෙන කිසිවකු නොව අසංක ප්‍රියමන්ත පීරිස්ය.
අසංක දැන් ආදරයේ කඳුළු ගී හඬ නිහඬ කරලද?
ඒ ආදර කඳුළුවල අඩුවක් නැහැ. ප්‍රසංග වේදිකාවේ ඒ හඬ අවදි කරනවා. අලුත් සින්දු දෙකක් තිබෙනවා. ඉදිරියේදී එයත් රස විඳින්න පුළුවන් වෙයි.
ඔබ කාලයක් කැසට් වෙළෙඳපොළ වාර්තා පිට වාර්තා තබමින් සිටිය. ඔබේ හඬට හොඳ මිලක් තිබුණා. වෙනසකටත් එක්ක නැවැත ගීත ඇල්බමයක් කරන්න අදහසක් නැද්ද?
එහෙම කාලයක් තිබුණා. ඒත් කාලයත් එක්ක තවත් වෙළෙඳ ප්‍රචාරකයන් එය කොපි කර රුපියල් 50ට අලෙවි කළා. රුපියල් පන්සීයකට තිබුණු ගීත ඇල්බමයේ වටිනාකම කුණු කූඩෙටම වැටුණා. ඒ නිසා මම ඇල්බම් නිර්මාණය කරන්න ගියෙත් නැහැ.
ඔබේ ගීත මාධ්‍යවලින් ඇසෙන්නේ කලාතුරකින්. මෙයට හේතුව?
කාලයත් එක්ක හැමදේම වෙනස්. ඉස්සර මගේ ගීත පැල්බැඳගෙන විකාශය කළා. ඒත් දැන් සින්දුවක් දාන්නත් කාලයක් නැති තරම්. දැන් විකාශය කරන්න ඒ තරමට සින්දු පෝලිමට තිබෙනවා. ඒ පෝලිමත් එක්ක සමහර විට අපේ සින්දු මඟහැරෙනවා වෙන්නත් පුළුවන්.
ගීත ප්‍රචාරයේදී මාධ්‍යවලින් ගෙවීමක් කරනවාද?
ඉස්සරනම් අපිට මාධ්‍යවලින් ගෙවීමක් කළා. අපේ වටිනාකමට සාධාරණයක් කළා. ඒත් දැන් ගෙවීමක් තියා සින්දුවක් ප්‍රචාරය කරගන්නෙත් හරිම අමාරුවෙන් තමයි.
ඔබේ සිහිනයක් තිබුණලු නේද ලතා වල්පොළ සමඟ යුග ගීතයක් ගායනා කිරීමට?
ඇත්තටම එයද මගේ ලොකු ආශාවක්. ඒත් එතුමිය අසනීප තත්ත්වයේ සිටින නිසා මම ඒ ගැන කියලා එතුමියට කරදර කරන්න හිතුවේ නැහැ. බලමු ඉදිරියේදී.
‘වෙන් වෙන්න මොහොතකට කලින්’ ඔබේ ජීවිතයේ සුවිශේෂී ගීතයක් කියන්නෙ ඇත්තද?
ඇත්තටම මම හිතුවාට වඩා හොඳ ප්‍රතිචාර ලැබුණු ගීතයක් එය. ප්‍රසංග වේදිකාවේ නැතුවම බැරි ගීතයක් බවට පත්වෙලා. ඒ තරමට රසික රසිකාවියන් ඒ ගීතයට බැඳිලා හමාරයි. මම හිතන්නේ තවත් පරම්පරා කිහිපයක් මගේ ගීත රසවිඳියි කියලා. ඒ තරමට ප්‍රේක්‍ෂකයන් මගේ ගීත වැලැඳ ගත්තා.
වසන්ත විතාරණගේ