අපේ දේශපාලනඥයො නානවා දැකල තියෙනවද කියලා ඇහුවොත් ගොඩ දෙනෙක් කියන්නේ ඔව් කියලා තමයි. අපේ දේශපාලනඥයො වැඩි දෙනෙක් ප්රසිද්ධියේ නානවා කියලා තමයි ජනතාව දන්නේ. ඒ විදියට නිතරම නාන දේශපාලනඥයො ගැනත් ජනතාව තුළ ලොකු අවබෝධයකුත් තියෙනවා. ඒත් එතුමන්ලා එහෙම නෑවට අන්තිමට ඇත්තටම නාගන්නේ එතුමන්ලද, නැත්නම් අපිමද කියලත් ප්රශ්නයක් තියෙනවා. මේ කතා කරන්නේ ඒ විදියේ නෑමක් ගැන නෙවෙයි. මේක ඇත්තම ඇත්ත නෑමක්. හැබැයි හැමදාම නානවට වැඩිය වෙනස් නෑමක්. හරියටම කිව්වොත් ඒක නෑමක් නෙවෙයි නෑවීමක්.
හිටපු අමාත්ය ඩිලාන් පෙරේරා මන්ත්රීතුමා, එස්. බී. දිසානායක මන්ත්රීතුමා එක්ක එකතු වෙලා තමන්ගෙම පක්ෂයේ ප්රධානීන්ව විවේචනය කරන හැටි තමයි අපි පහුගිය ටිකේම දැක්කේ. ශ්රී ලංකා නිදහස් පක්ෂයේ මහලේකම් දයාසිරි ජයසේකර මහත්තයා වගේම එක්සත් ජනතා නිදහස් සන්ධානයේ මහලේකම් මහින්ද අමරවීර මහත්තයත් ඒ විවේචනවල ප්රධාන ඉලක්ක වෙලා තිබුණා. ඩිලාන් පෙරේරා සහ එස්. බී. දිසානායක මහත්වරුන්ගේ විවේචනවලට හොඳට ප්රතිඋත්තර ලැබෙන හැටිත් අපි දැක්කා. එකම පක්ෂයේ උදවිය ඒ විදියට එකිනෙකාට විවේචන එල්ල කරගන්න එකත්, නාගැනීමක් කියල තමයි ජනතාව කියන්නේ.
දේශපාලන පොරපිටියේ නෑම සහ නෑවීම ගැන විවිධ කතාබහ තියෙන අතරතුරේ ඩිලාන් පෙරේරා මන්ත්රීතුමා අමුතු විදියේ නෑමක් නාන ආකාරයේ දර්ශන පෙළක් පසුගිය දවසක සමාජ මාධ්ය ඔස්සෙ ප්රචාරය වුණා. මන්ත්රීතුමා වාඩිවෙලා ඉන්නවා. පිරිසක් එතුමාව නාවනවා. ඒ දර්ශන පෙළේ දැක්වුණේ එහෙමයි. බැලූ බැල්මටම ඒක ටිකක් අමුතු නෑමක්. කොහොමත් මන්ත්රීවරයෙක් මේ විදියට නාන එක ටිකක් අලුත් දෙයක්. ඒ හින්දා ඩිලාන් පෙරේරා මැතිතුමාගේ මේ නෑම මොකක්ද කියලා දැනගන්න අපි එතුමාටම කතා කළා.
එතුමා කියන විදියට හල්දුම්මුල්ල ශ්රී මුත්තුමාරි අම්මාන් කෝවිලේ නවග්රහ පූජාවකට සහභාගි වෙලා ඉන්න වෙලාවක දර්ශනයක් තමයි සමාජ මාධ්ය ඔස්සේ ප්රචාරය වෙලා තියෙන්නේ. හින්දු ආගමික චාරිත්ර අනුව නවග්රහ පූජාවකදී ඒ ආකාරයෙන් නාවන එක සාමාන්ය දෙයක්. ජීවිතයේ විශේෂ අවස්ථාවන් සඳහා ආශීර්වාද ලබා ගැනීමේ අරමුණෙන් හින්දු භක්තිකයන් මේ විදියේ නවග්රහ පූජාවන්ට සහභාගි වෙනවා. ඩිලාන් පෙරේරා මැතිතුමත් මීට පෙර මේ වගේ නවග්රහ පූජාවන්ට සහභාගි වෙලා තියෙනවා. ඒ වගේම ඉතා සුවිශේෂ අරමුණක් වෙනුවෙන් තමයි එතුමා මේ සැරෙත් මේ නවග්රහ පූජාවට සහභාගි වෙලා තියෙන්නේ.
“අපේ ජනාධිපති අපේක්ෂක ගෝඨාභය රාජපක්ෂ මහත්තයාට ආශීර්වාද කරලා ජනාධිපතිවරණයෙන් එතුමා ජයග්රහණය කරවන ලෙස බාරයක් වෙන්න තමයි මම මේ නවග්රහ පූජාවට සහභාගි වුණේ. නිතරම නොවුණත් මම මේ වගේ නවග්රහ පූජාවන් රැසකට සහභාගි වෙලා තියෙනවා. තම තමන් කැමැති ආගමික විශ්වාසයන් අනුව කටයුතු කරන්න කාටවත් තහනමක් නැහැනේ. ඒ හින්දා මගේ විශ්වාසය අනුව මම කටයුතු කළා.” එහෙම තමයි ඩිලාන් පෙරේරා මැතිතුමා තමන්ගේ බාරේ ගැන අපි එක්ක කිව්වේ.
ජාති ආගම් භේදයකින් තොරව ආශීර්වාද පතා දහස් සංඛ්යාත බැතිමතුන් සහභාගි වන ශ්රී මුත්තුමාරි අම්මාන් කෝවිල් කිහිපයක්ම ලංකාවේ තියෙනවා. මාතලේ නගර මධ්යයේ පිහිටි ශ්රී මුත්තුමාරි අම්මාන් කෝවිල ඒ අතරින් ප්රධාන කෝවිලක්. ඊට අමතරව හැටන්, ත්රිකුණාමලය, නුවරඑළිය ඇතුළු ලංකාවේ බොහෝ ප්රදේශවල මුත්තුමාරි අම්මාන් කෝවිල් ඉදිවෙලා තියෙනවා. තම ස්වාමියා වෙනුවෙන් පතිවත ආරක්ෂා කර ගනිමින් එය බලයක් බවට පත් කරගත් කන්නගී නම් කුමරිය හින්දු භක්තිකයන් අතර ශ්රී මුත්තුමාරි අම්මාන් නමින් වන්දනාවට පාත්ර වූ බව තමයි ඉතිහාස වාර්තාවල දැක්වෙන්නේ. ඇය පත්තිනි දේවතාවිය නමින් සිංහල ජනතාවගේද වන්දනාවට පාත්රවී තිබෙනවා. කොහොම වුණත් ශ්රී ලංකාවේ උතුරුකරයේ හින්දු භක්තිකයන්ට වඩා වතුකරයේ හින්දු භක්තිකයන් මුත්තුමාරි අම්මාන් දේවතාවිය වන්දනා කිරීමේ වැඩි නැඹුරුවක් තියෙන බව තමයි මේ ගැන තොරතුරු හොයද්දී තේරුම් ගියේ.
ඩිලාන් පෙරේරා මහත්තයා නවග්රහ පූජාවට සහභාගි වුණු හල්දුම්මුල්ල ශ්රී මුත්තුමාරි අම්මාන් කෝවිලත් වතුකරයේ හින්දු භක්තිකයන් අතර ඉතාම ගෞරවාදරයට සහ වන්දනාවට පාත්ර වූ තැනක්. ඒ තරම්ම ලොකු ඉතිහාසයක් නැතත්, මේ කෝවිලේ වාර්ෂික මංගල්ය සඳහා ඉන්දියාවෙන් පවා බැතිමතුන් සහභාගි වෙනවා. ඒත් මේ හල්දුම්මුල්ල මුත්තුමාරි කෝවිල දේශපාලනඥයන් අතර නම් එච්චර ජනප්රිය තැනක් නෙවෙයි. ඒ වගේම හල්දුම්මුල්ල කෝවිලේදී මේ වගේ පූජාවකට සහභාගි වුණු පළමු සහ එකම දේශපාලනඥයා වෙන්නෙත් ඩිලාන් පෙරේරා මැතිතුමා කියලයි ආරංචි. වෙන දේශපාලනඥයෝ යන්නේ නැති කෝවිලකට ගිහින් අමුතු විදියේ නෑමක් නාලා නවග්රහ පූජාවකට සහභාගිවෙලා ඩිලාන් පෙරේරා මහත්තයා ශ්රී මුත්තුමාරි අම්මාන් දේවතාවිය ඉදිරියේ වුණු භාරයේ ප්රතිඵලය මොන වගේද කියලා නම් අපිට දැනගන්න වෙන්නේ ජනාධිපතිවරණයේ ප්රතිඵල ආවට පස්සේ තමයි.
