එක්කෙනාට එක්කෙනයි
අතීතයේ උඩරට පැවැති විවාහ ක්රමය වෙනස් කරමින් විවාහ ක්රමය ප්රතිසංස්කරණය කිරීමට කටයුතු කළේ වෝඩ් ආණ්ඩුකාරයාය. එහෙයින් එතෙක් උඩරට පැවැති බහු පුරුෂ සේවනය සහ බහු භාර්යා සේවනය නීති විරෝධී කටයුත්තක් බවට පත්විය. මෙයින් සිංහල නීතියේ හරය වූ අනු සිරිත් විවාහය තහනම් වී අවලංගු විය. ලියාපදිංචියද අනිවාර්ය විය. මේ හේතු නිසා ජනයාට යම් යම් හිරිහැරද විඳන්නට සිදුවූ බව සඳහන් වේ.
වෝඩ් සහ මැකාති
සර් හෙන්රි වෝඩ් ආණ්ඩුකාරවරයාගෙන් පසු ලංකා ආණ්ඩුකාර ධුරයට පත්ව ආවේ මැකාතිය. හෙතෙම වෝඩ් මෙන් රටට හිතකර කටයුතු කිරීමට උනන්දු නොවීය. මෙරට විවිධ පාලන යුගවල අකාර්යක්ෂම පාලකයන් පත්වන්නා සේම සර් මැකාතිද සිය කාලයේ සුබදායක කිසිවක් ගැන අවධානය යොමු කළේ නැත. එහෙයින් වාරිමාර්ගවල තත්ත්වය මෙන්ම මහා මාර්ගවල තත්ත්වයද පහළ වැටුණේය. එහෙයින් විදේශ භාර මහ ලේකම්වරයා මහජන වැඩ සඳහා මුදල් වැය නොකරන ලෙස අණ කළේය. මේ හේතු නිසා මැකාතිගේ කාලයේ සිදුවූ අයහපත අතිවිශාලය.
ඉංග්රීසි තඹ කාසි
1864 ලංකාවේ ඉංග්රීසි තඹ කාසි භාවිතය ආරම්භ විය. මෙය සුවිශේෂ අත්දැකීමක් ලෙස ලක්වාසීන්ට දැනුණි. ඊට පෙර වසරේ එනම් 1863 වසරේ මැකාති අසනීප තත්ත්වයෙන් සිට රට බලා ගියේය. ඒ, 1863 දෙසැම්බර් මාසයේය. එතැන් පටන් 1865 දක්වා මෙරට ආණ්ඩු කළේ මේජර් ඕ බ්රයන් උප ආණ්ඩුකාර තැනය. ඔහුගේ පාලනය කෙටි කලක් තුළ සිදුවුවද විශේෂ කරුණු කිහිපයක් සාර්ථකව අවසන් කරන්නට හෙතෙම සමත් විය.
