ආදරවන්තයොත් නොදන්ක කවුද මේ වැලන්ටයින්

සෑම වසරකම පෙබරවාරි මාසයේ 14 වැනිදා යනු පෙම්වතුන්ගේ දිනයයි. මෙම වසරේ එම දිනය පසුගිය සිකුරාදාට යෙදී තිබිණි. එහෙත් එම දිනයේ සැබෑම නම වන්නේ “වැලන්ටයින්” දිනයයි. අද වැලන්ටයින් හෙවත් පෙම්වතුන්ගේ දිනය අපේ අය ඉහළින්ම සැමරුවද ඒ පිටුපස කතාව බොහෝ දෙනෙක් නොදනිති. සැබෑවටම එම වැලන්ටයින් දිනය නම් විය යුත්තේ “වැලන්ටයින් සාන්තුවරයාගේ දිනය” යනුවෙනි. නමුත් අප එසේ කියූ විට ඔබට එය ප්‍රශ්නාර්ථයකි. එම නිසා අපි අද ඔබට පවසන්නේ අතීතයේ පටන් ලොව පුරා බොහෝමයක් රටවල සිටිනා ආදරණීය පෙම්වතුන් ඉහළින් සමරන “වැලන්ටයින් සාන්තුවරයාගේ දිනය” ගැනය. ඒ කතාව ඔබ නොඇසූ එහෙත් දැනගෙන සිටිය යුතුම වූ කතාවකි.

වැලන්ටයින් ඉතිහාසය ගැන සඳහනක් කිරීමේදී එය ක්‍රිස්තු පූර්ව තුන්වැනි සියවස දක්වා ඈතකට දිව යන්නකි. සැබෑවටම මෙම දිනය නම් කර තිබෙන්නේ තුන්වෙනි සියවසේ එදා රෝමයේ ජීවත් වූ කතෝලික පූජකවරයකු වූ “ශාන්ත වැලන්ටයින්” යන නමින් ඔහුව සිහිවීමටය. එදා ඔහු රෝමයේ සිටි ඉතා ප්‍රසිද්ධ පූජකවරයෙකි. ඒ ක්‍රිස්තු පූර්ව තුන්වැනි සියවසෙහි පමණය. එහිදී එදා මෙම වැලන්ටයින්ගේ කාලය තුළ රෝමානු වැසියන් රැසක් ක්‍රිස්තියානි ආගමට හරවා ගැනීම සිදුවිය. එම කාලයේ සිටි දෙවැනි ක්ලෝඩියස් අධිරාජ්‍යයා දැඩි මිථ්‍යා මතධාරියකු වූ අතර ඔහු ඊට බොහෝ විරුද්ධ විය. ඉන් පසු ඔහු රෝම සොල්දාදුවන් ක්‍රිස්තියානි භක්තිකයන් සමඟ අවාහ විවාහ වීම පවා තහනම් කරමින් නීති පැනවීය. ඔහුගේ මතය වූයේ විවාහක පුරුෂයන්ට දක්ෂ සොල්දාදුවන් විය නොහැකි බවයි. එහෙත් එය නිවැරැදි නැත.

ක්ලෝඩියස් අධිරාජ්‍යයාගේ මෙම දැඩි මිථ්‍යා මත සහ විශ්වාසය හේතුවෙන් ඔහු පසුව කරන්නේ එරට විවාහය තහනම් කිරීමයි. එහිදී එම අධිරාජ්‍යයා ගත් එම ක්‍රියාමාර්ගය අසාධාරණ යැයි සිතූ අප මුලින් කියූ වැලන්ටයින් පූජකතුමා තීරණයක් ගනියි. ඒ තීරණය වන්නේ නීතිය බිඳ දමා යුග දිවියට ඇතුළත් වීමේ දැඩි අපේක්ෂාවෙන් සිටින තරුණ තරුණියන්ව රහසින්ම විවාහ කිරීමට කටයුතු කිරීමයි. එම කටයුත්ත නිසා ආදරයේ වැදගත්කම සහ විශ්වාසය සම්බන්ධයෙන් වැලන්ටයින් පූජකවරයාගේ කීර්තිනාමය එරට ඉතා ජනප්‍රිය වී තිබේ. එයින් නොනැවතී එම පුවත මුලින් කී ක්ලෝඩියස් අධිරාජ්‍යයාටද ආරංචි වූ බව පැවසෙයි.

වැලන්ටයින් පූජකතුමාගේ මෙම ක්‍රියාව දැනගත් ක්ලෝඩියස් අධිරාජ්‍යයා පසුව වැලන්ටයින් පූජකතුමා සිරගත කරයි. එයින් නොනැවතී ඔහුට මරණ දඬුවමද ලබා දීමට නියෝග කරයි. එහිදී වැලන්ටයින් සිරගතව සිටියදී සිරකරුවන්ගේ රෝග ආදිය සුවපත් කළ බවද පැවසෙයි. එමෙන්ම ඔහු සිරගත අවධියේදී එහි ප්‍රධාන ආරක්ෂකයාගේ ඇස් අන්ධ වූ දියණියගේ අන්ධභාවය සුවපත් කිරීමට පවා වැලන්ටයින් පූජකවරයා සමත් වූ බව කියයි. සිරගත කෙරුණු වැලන්ටයින් පූජකතුමා පසුව ඇය සමඟ ආදර සම්බන්ධයක් පටන් ගත් බවද සඳහන්ය. නමුත් අවසානයේ නියමය පරිදි පෙබරවාරි 14 වැනි දිනෙක ඔහුව මරා දැමීමට කටයුතු කෙරෙයි. එහිදී මියයෑමට පෙර ඔහු තමාගේ ආදරවන්තිය වෙත පෙම් හසුනක් පවා ලියා තිබූ අතර එය අවසන් කොට තිබුණේ “ඔබේ වැලන්ටයින් වෙතින්” යනුවෙනි.

මේ අනුව අතීතයේ පෙබරවාරි 14 වැනිදා දිනෙක මෙම ශාන්ත වැලන්ටයින් පූජකතුමා ඝාතනය කරයි. එහිදී වැලන්ටයින් පූජකතුමා ඝාතනය කොට වසර දෙසිය ගණනකට පමණ පසු පෙබරවාරි 14 වැනිදා “වැලන්ටයින් දිනය” ලෙස නම් කරයි. ඒ අනුව සෑම වසරකම මෙසේ පෙබරවාරි 14 වැනිදාට යෙදෙන්නේ වැලන්ටයින් දිනයයි. අද වන විට ලොව බොහෝමයක් පෙම්වතුන් සමරන්නේ එම දිනයයි. එහෙත් මේ දිනය එදා තිබුණේ රෝමයේ තිබූ පෞරාණික සැණකෙළියක් ලෙසිනි. ඒ අනුව ඊට ඉතා දීර්ඝ ඉතිහාසයක්ද තිබෙන බව කිව යුතුය. එසේම වැලන්ටයින් සාන්තුවරයා මේ අයුරින් සිහිපත් කිරීම සඳහා පෙබරවාරි 14 වැනි දින යොදා ගැනීමට තීන්දු කළේ රෝමයේ ක්‍රිස්තු සභාවයි.

එහෙත් මෙම ලිපිය අවසානයේදී තවත් දෙයක් ඔබට කියන්නට තිබේ. එනම් වර්තමානය වෙන විට වැලන්ටයින් දිනය යනු මුදලට යට වූ දිනයක් යන්නයි. තවද ලෝකය පුරා සිටින තරුණියන් බොහෝ පිරිසක් දූෂණයට ලක්වෙන දිනයක් ලෙසද මෙම දිනය අපට දැන් නම් කළ හැකිය. ඒ වර්තමානයේදී වැලන්ටයින් සැමරිල්ලේ හැටිය. එහෙත් සැබෑ වැලන්ටයින් දිනය යනු එයද කියා ඔබ ඔබෙන්ම ඇසිය යුතුය. පසුගිය පෙබරවාරි 14 වැනිදා ඔබ එය සැමරූ ආකාරය සිහි කිරීමේදී ඔබට එය වැටහෙනු ඇත. එහෙත් අප අද කතාබහ කළ වැලන්ටයින් දිනය බිහි වූ අයුරු සිහි කිරීමේදී පෙබරවාරි 14 යනු අතීතයේ එක්තරා අඳුරු දිනයක් ලෙස පැවසීමේ වරදක්ද නැත. මේ අතර අපේ රටේ ඇතැම් තරුණියන්ට නම් වැලන්ටයින් යනු සැබෑ ලෙසම අඳුරු දිනයකි.
රුවන් එස්. සෙනවිරත්න