ප්රවීණ සිනමා අධ්යක්ෂවරියක වන සුමිත්රා පීරිස් මහත්මිය 1978 වසරේදී අධ්යක්ෂණය කළ ‘ගැහැනු ළමයි’ චිත්රපටය ‘ෆිල්ම් හෙරිටේජ්’ ආයතනය මගින් 4K තාක්ෂණයෙන් ප්රතිනිර්මාණය කර එළිදැක්වීමේ අවස්ථාවට එම සිනමා පටයේ ප්රධාන චරිත නිරූපණය කළ අජිත් ජිනදාස සහ වසන්ති චතුරාණි සහභාගි වූහ. එහිදී එම දෙපළ ‘ගැහැනු ළමයි’ සිනමා නිර්මාණය සහ තම රංගන ජීවිතය ගැන කෙටි මතකාවර්ජනයක නිරත වූයේ මෙලෙසයි.Sri Lanka Latest News
රංගන ශිල්පී අජිත් ජිනදාස
‘සමකාලීනයෝ සනත්, මැණික්, සංගීතා ආදී ඒ සියලු දෙනා කර්මාන්තයේ හිටියා. මම මේක 1996දී දාලා ගියා. ගිහිල්ලා සාමාන්ය මිනිහෙක් වෙලා, බොහොම දුෂ්කර ජීවිතයක් ගතකරගෙන මගේ විශ්රාම දිවියට එන මොහොතක තමයි මේ කෝල් එක එන්නේ ‘උඹට එන්න පුළුවන්ද මේ කෑන්ස් චිත්රපට උළෙලට’ කියලා. මම නිකන් තක්බීර් වෙලා කල්පනා කළා මොකක්ද මේ වෙන්න යන්නේ කියලා. ඉතින් මේ චිත්රපටයට නැවත එකතු වුණා විතරක් නෙමෙයි, මගේ පැත්තෙන් ගත්තම මගේ ජීවිතෙත් නැවත ඉපදුණා වගේ එකක්. ආපහු නළුවා වෙලා, ටීවී ඉන්ටර්විව් ඇවිල්ලා, එහෙම එකක් වෙනවා. ඒ ගැන සියලු දෙනාට ස්තුතියි. ඉතින් අපේ මේ චැට් එක කොහෙන්ද පටන් ගන්නේ කියන්නකෝ….’
රංගන ශිල්පිනී වසන්ති චතුරාණි
‘දැන් චැට් එක කියන්නේ අපේ වයසත් පහුවෙනවා නේද?’
රංගන ශිල්පී අජිත් ජිනදාස
‘ඔව්, ඒත් ඒකට කරන්න දෙයක් නෑ. කොහොමත් ඉතින්, මේ මෙතැන ඉන්න හුඟක් අය, අගමැතිතුමිය නම් කිව්වා අවුරුදු අටයි කියලා චිත්රපටය බලනකොට, හුඟාක් අය ඉපදිලා නෑ මේ චිත්රපටය කරන කාලේ….’
රංගන ශිල්පිනී වසන්ති චතුරාණි
‘ඉතින් හරි සුන්දරයි මේ මගේ පළමුවැනි චිත්රපටය. මම දැක්ක පළමුවැනි නළුවා මේ…. ඉතින් ඔයාට මොනවද හිතුණේ මාව පළමුවැනි දවසේ දැක්කම?’
රංගන ශිල්පී අජිත් ජිනදාස
‘ඔයාව ඉස්සෙල්ලාම දැක්කේ රඟපානකොට නෙමෙයි, සරසවියේ මේ පින්තූරයක් ගන්න ආවේ. එදා තමයි දැක්කේ. ඒ කාලේ 70 ගණන්වල කොල්ලෝ කෙල්ලෝ හමුවුණාම එකපාරම ‘ආ හායි හූයි’ ගාලා කතාකරන්නෙත් නෑ. මෙයත් නිකන් යන්නම් විතරයිද කොහෙද මට කිව්වේ…’
රංගන ශිල්පිනී වසන්ති චතුරාණි
‘නෑ, මෙයා, පළමුවැනි දවසේ, මම ඉතින් අලුත් ළමයෙක්නේ. මම ඉතින් ගම්පහ කොන්වන්ට් එකක හැදිලා, මේ ඉතින් ඇවිල්ලා බොහොම විචිකිච්චාවක් තිබ්බා ළඟට එන්න. ඉතින් අජිත් එහෙම නෑ. අජිත් ‘මඩොල් දූව’ කරලා හොඳ ජනප්රිය නළුවෙක්. ඉතින් අපිව සත පහකට ගණන් ගත්තේ නෑ….’
රංගන ශිල්පී අජිත් ජිනදාස
‘හත්තිලව්වේ මෙහෙම බොරු කියන්නෙ කොහොමද? මගේ ජීවිත කාලේ මම එහෙම කරලා නෑ. හැබැයි මේ නිළිය එහෙම හන්දා පොඩ්ඩක් බය වුණාද කියලා කියන්නත් බෑ. මොකද ඉතින් ඒ කාලේ අපි එච්චර හොඳ නෑ. ඒ වුණාට දැන් ලෙස්ටර් ජේම්ස් පීරිස්, සුමිත්රා පීරිස් එහෙම අපේ දෙමවුපියෝ වගේනේ…..’
Thiaga Wijetunga
