පුංචි තිරය හරහා ප්රේක්ෂක සිත් සොරාගත් ඇය, කාලෙකින් නිර්මාණයකින් දැකගන්න ලැබුණේ නැහැ. හැබැයි ඇයට තියෙන ප්රේක්ෂක ආදරයේ නම් කිසිම අඩුවක් වෙලා නැහැ. රංගන ජීවිතයට තාවකාලික විරාමයක් තබමින්, දුවෙකුට සහ පුතෙකුට ආදරණීය මවක් වී සැබෑ ජීවිතයේ භූමිකාව හැඩකරන රුවන්ගි රත්නායක, ඇගේ අලුත්ම තොරතුරු සමඟින් ‘හාට්’ පිටු අතරට එක්වන්නේ මෙලෙසිනි. Sri Lanka Latest News
ඉතින් කොහොමද රුවන්ගි?
හොඳින් ඉන්නවා. හැබැයි මේ දිනවල මම ටිකක් අසනීප තත්ත්වයෙන් ඉන්නේ.
කාලෙකින් ඔබගේ රඟපෑමක් අපට දැකගන්න ලැබුණේ නැති තරම්?
ඇත්තටම ඔව්. මම හිතන්නේ අවුරුදු තුනහමාරකින් විතර නිර්මාණයකට සම්බන්ධ වෙන්න බැරිවුණා.
එහෙම වෙන්න විශේෂ හේතුවක් තියෙනවද?
ඔව්. විශේෂ හේතුවක් තියෙනවා. මම දැන් දෙදරු මවක්. මට දුවෙකුයි පුතෙකුයි ඉන්නවා. ඒ දෙන්නම තාම පොඩියි. මගෙත් සැමියාගෙත් ලෝකය දුවයි පුතයි. ඉතින් දරුවන් වෙනුවෙන් අපේ මුළු කාලයම යොදවනවා. මේ වෙලාවේ කලා කටයුතු වෙනුවෙන් කාලය යොදවලා වැඩ කරන්න අමාරුයි. දුවයි පුතයි ටිකක් ලොකු වෙනකම් රංගන කටයුතු සඳහා සම්බන්ධ වෙන්න බැරි වෙයි.
මේ ගෙවුණු කාලයේදී කලා කටයුතුවලින් ආරාධනා එහෙම ලැබුණද?
එදා ඉඳලා මට තවමත් ආරාධනාවලින් නම් අඩුවක් නැහැ. මොනවා කරන්ද ඉතින්. ප්රතික්ෂේප කරන්න වෙනවා අකැමැත්තෙන් වුණත්.
රුවන්ගිට හමුවන ආදරණීය ප්රේක්ෂකයන් මොන වගේ ප්රතිචාරද දක්වන්නේ?
ඇත්තටම මට තවම ප්රේක්ෂකයන්ගේ ආදරය තියෙනවා. ඒ තරමට මම රඟපාපු චරිත ඔවුන්ට මතකයි. අහන්නේ කාලෙකින් රඟපානවා දැක්කේ නැහැ, ආපහු රඟපානවද කියලා. එහෙම අහන වෙලාවට පොඩි දෙන්නත් ළඟ හිටියොත් පෙන්නලා මේ දෙන්නා නිසා දැන්ම රඟපෑම් කටයුතු සඳහා සම්බන්ධ වෙන්න අපහසුයි කියනවා. ළඟ නැතිනම් පොඩි දෙන්නගේ වැඩකටයුතු නිසා කාර්යබහුලයි කියනවා.
මේ දවස්වල දකින නිර්මාණ එක්ක හිතට පොඩි ආසාවක් එනවා ඇති?
ටෙලිනාට්ය, චිත්රපට මට විවේකයක් ලැබුණාම බලනවා. ඒ වෙලාවට නම් හිතට පොඩි ආශාවක් එනවා මේ චරිතය මට කරන්න තිබුණා නම් කියලා.
පූර්ණකාලීන සමුගැනීමක් වෙයිද?
අපෝ නැහැ. මම කලාවට පුදුම ආදරයක් තියෙන්නේ. මගේ සැමියාගෙන් වුණත් කිසිම බාධාවක් නැහැ. මගේ රඟපෑම් කටයුතු සඳහා ඔහු ගොඩක් උදව් කරනවා. කලාවෙන් සමුගන්න නම් කිසිම අදහසක් නැහැ. මේ වෙලාවේ මවක් විදියට මම දරුවන් වෙනුවෙන් ළඟ සිටිය යුතුයි. පොඩි අයට තේරෙන වයස ආවට පස්සේ සුපුරුදු පරිදි මම නැවත නිර්මාණ හරහා දැකගන්න පුළුවන්.
වසන්ත විතාරණගේ
