අපි කවුරුත් කැමැති, කාටවත් ඇණයක් නොවී පාඩුවේ ඉන්නයි. හැබැයි ඇණයක් වෙන අය කොයි වගේද කියන්න දන්නවනේ. එහෙම ඇණයකට කොටුවුණු ජනප්රිය රංගන ශිල්පිනියක වන උදේනි නදීකා පීරිස්ගේ දස්කම් ගැනයි ‘හාට්’ අපේ මේ කතාබහ.Sri Lanka Latest News
උදේනි ඇණයක්ද ඇත්තටම?
කවුද අනේ එහෙම කියන්නේ? මම පාඩුවේ හැමෝම සමග සුහදව ඉන්න කෙනෙක්. හැබැයි ගැහුවොත් ඔළුව පාත් කරන කෙනෙක් නම් නෙවෙයි. මම කිසිම කෙනකුට ඇණයක් වෙන්න කැමැති නැහැ. මම ගැන ඕනෑ තරම් විවේචන ඇති. මට මොන දේ කිව්වත් මම සියලු දෙනා සමග සුහදව කටයුතු කරනවා. මට එහෙම එක දිගට නිර්මාණවලට සම්බන්ධ වෙන්න වුවමනාවක් නැහැ. මට කිසිම කෙනෙක් කපාගෙන ඉදිරියට යන්න අදහසක් නැහැ. මම ළඟ ඉරිසියාවක් නැහැ. මේ ක්ෂේත්රයේ සදාකල් රැඳිලා ඉන්න අපි කාටවත් බැහැ. මගේ දක්ෂතාව උපරිම ඉදිරිපත් කරලා ප්රේක්ෂකයන්ට මතකයක් ඉතුරු කරමින් සතුටින් දවසක සමුගන්නවා.
එතකොට උදේනි කාටද මේ ඇණයක් වෙන්න යන්නේ?
තවම මම ඇණයක් වුණේ නැහැ. සමහර විට ලේලිට ඇණයක් වෙයිද දන්නේ නැහැ. මගේ පුතාට රඟපාන්නේ රොෂාන් පිලපිටිය. ලේලිය පියුමි බොතේජු. එකතු වෙන්න ‘බෝල්ට් ඇණය’ සමග. ලොකු වෙනසක් දැනෙයි මේ ටෙලිනාට්යය නරඹනකොට. ‘බෝල්ට් ඇණයක්’ ටෙලිනාට්යයේ මම රඟපාන්නේ ‘සුනීතා’ කියන චරිතය. රෙදි මහන, ධෛර්යවන්ත මවකගේ චරිතයක් තමයි මම රඟපාන්නේ.
මේ කාලවකවානුවේ ඔබේ රංගන ස්වභාවයේ වෙනසක් අපි දකිනවා?
ඔව්. මුල්ම කාලේ නම් එකම චරිතවලට තමයි මට කතා කළේ. ‘පබා’ ටෙලිනාට්යයේ රඟපාන කාලේ ‘මාර්තා’ චරිතයට ප්රේක්ෂක ප්රතිචාර හොඳට ලැබුණා. හොඳ නිර්මාණයක චරිතයක් හොඳට කළොත් කොටුවීමක් වෙනවා. හැබැයි හැම හැම චරිතයක්ම මම උපරිම කරනවා. ‘රන්තිලි වැව’ ටෙලිනාට්යයේ මැණිකේ චරිතය මම රඟපෑවා. මැණිකේ චරිතය හරහා මම නිර්මාණ කිහිපයකට සම්බන්ධ වුණා. මැණිකේ චරිතය සඳහා මට ආරාධනා එන්නේ මගේ රූප ස්වභාවය සමග ඔසරිය ඇන්දම එන පෙනුම නිසා. මේ කාලේ නම් වෙනස් චරිත රඟපෑමට මට අවස්ථාව ලැබුණා. රංගන ශිල්පිනියක් වශයෙන් අපි කවුරුත් කැමැතියි වෙනසක් කරන්න. අඩු තරේම ඇඳුමෙන් පැලඳුමෙන් හරි වෙනසක් වෙනකොට චරිතය වුණත් වෙනස්ම හැඩයක් ගන්නවා. එහෙම වෙනසක් වෙනකොට චරිත වුණත් රඟපෑමට ලොකු ආශාවක් එනවා අලුත් රංග ස්වභාවයන් එකතු කරමින්.
ඒ වෙනස ළඟදිම අපට දැකගන්න ලැබේවි?
මේ මගේ හොඳම කාලයක් රංගනය පැත්තෙන්. පසුගිය දවස්වල ජී. නන්දසේනගේ ‘කිනිසි වත්ත’ ටෙලිනාට්යයේ වෙනස්ම චරිතයක් රඟපෑවා. එය පාතාල කතාවක්. මගේ සැමියා ලෙස රඟපාන්නේ ආනන්ද අතුකෝරල. මට හිතෙනවා ප්රේක්ෂකයන් මගේ ඒ චරිතය හරහා ලොකු වෙනසක් දකීවි කියලා. එකම විදියේ චරිත රඟපානකොට අපිට වුණත් යම් එපාවීමක් දැනෙනවා.
ඔය අතරේ උදේනි විලංගුවකුත් දැම්මා?
‘විලංගුව’ ගැන කතාකළ යුතුමයි. මට වුවමනා කළා කාලෙක ඉඳලා කාලීන මාතෘකාවක් මූලික කරගෙන නිර්මාණයක් කරන්න. සැමියන්ගේ මත්පැන් පානය නිසා ගැහැනියකට අත්වන ඉරණම මූලික කරගෙන තමයි මම මේ නිර්මාණය කරන්නේ. රටේ වෙසෙන සියලු කාන්තාවන් නැරැඹිය යුතු ටෙලිනාට්යයක් විදියට ‘විලංගු’ හඳුන්වා දෙන්න කැමැතියි. මම මීට පෙර ‘හීන හොයන විසේකාරියෝ’ වේදිකා නාට්යය ජනගත කළා. මේ නාට්ය දෙකම මගේ රචනයක්. ‘විලංගු’ වේදිකා නාට්යය තව මාස කිහිපයකින් දැකගන්න පුළුවන්. එය සමාජයට හොඳ ආදර්ශයක් දෙන නිර්මාණයක් වේවි.
ප්රේක්ෂකයන්ට වේදිකාව රසවිඳින්න අපහසු කාලයක් නේද මේ කාලවකවානුව?
ඇත්තටම එහෙම ප්රශ්නයක් තියෙනවා. රටේ ආර්ථික ප්රශ්න තියෙනවා. ප්රේක්ෂක ජනතාව ප්රශ්න ගොඩක ඉන්නේ. ඒත් වේදිකාවට ආදරය කරන පිරිසකුත් ඉන්නවා. මම පටන්ගත්ත වැඩේ කරන්න තමයි සැලසුම. මේ දිනවල ඒ වැඩකටයුතු සූදානම් කරමින් යනවා. විලංගු ඔබ ආදරය කරන තවත් නිර්මාණයක් වේවි.
අවුරුදු ගානක් රැකගත්ත නිර්මාණය වෙනුවෙන් කොහොමද සූදානම?
ඒක මම ලියපු ටෙලිනාට්ය පිටපතක්. මම එය රචනා කරලා අවුරුදු පහක් විතර වෙනවා. තවම ඒ වැඩකටයුතු වෙනුවෙන් සැලසුමක් කරගන්න බැරි වුණා. මොකද රූපවාහිනී නාලිකාවල තියෙන ප්රශ්න සමග ලොකු මුදලක් යටකරන්න අපහසු නිසා. එහෙම හිතලා ටෙලිනාට්ය විකාශය කරගන්න බැරි වුණොත් ලොකු ප්රශ්නයකට මුහුණ දෙන්න සිදුවෙනවා. ඒ වගේම ක්ෂේත්රයේ අවුරුදු ගානක් වැඩකරලා නිකන් කලකිරීමක් ඇතිවෙයි. හරි ස්ථාවරයකට නාලිකාවකින් අවස්ථාව ලැබුණොත් ඒ වැඩකටයුතු ලස්සනට නිර්මාණය වෙයි. මම රඟපාපු ටෙලිනාට්ය දහයක් විතර තියෙනවා විකාශය කරගන්න බැරිව නිෂ්පාදකවරුන් අසරණ වෙලා.
කාලෙක ඉඳලා දැකපු සිහිනයක් ඔබේ සිනමාවේ දකිනවා?
‘වෙස්සන්තර’ චිත්රපටයේ මගේ චරිතය වෙස්සන්තරගේ මව. අවුරුදු පහක් විතර වෙනවා මම ඒ චිත්රපටයට සම්බන්ධ වෙලා. මේ දිනවල සිනමා ශාලා කිහිපයකම තිරගත වෙනවා. ආගම දහම අපේ සංස්කෘතිය ගැන ඉස්මතු වෙන විශිෂ්ට නිර්මාණයක් විදියට වෙස්සන්තර චිත්රපටය හඳුන්වන්න පුළුවන්. කාලයක් ගෙවිලා හරි තිරගත වීම ගැන මම සතුටු වෙනවා. පාසල් දරුවන්ට අධ්යාපනය පැත්තෙන් නැරඹිය යුතුම චිත්රපටයක්. මොකද අපි කවුරුත් දන්න කතාවක් වෙස්සන්තර ජාතකය.
ඔබ රංගනයට වගේම ව්යාපාර පැත්තටත් නැඹුරුව වැඩ කරන කෙනෙක්?
රංගන ශිල්පිනියක් වෙලා මදි කියලා හිතලා තමයි මම මගේම දෙයක් කරන්න හිතුවේ. 2004 වර්ෂයේ තමයි මම ව්යාපාර පැත්තට යොමුවුණේ. විවිධ ව්යාපාර කළා මම. පස්සේ මම බතික් පිළිබඳ හැදෑරුවා. බතික් කියන්නේ කලාවක්. මමත් කලාකාරිනියක් නිසා ගහට පොත්ත වගේ එකට ගැළපුණා. ලිලිනා ක්ලෝතින් නමින් මගේ බතික් ව්යාපාරය මහරගම මේ වනවිට කරගෙන යනවා. ක්ෂේත්රයේ හිතවත් සියලු දෙනාගෙන් ඊට ලොකු සහායක් ලැබෙනවා.
වසන්ත විතාරණගේ
