2016 ඉඳන්ම සනී මේ වංචාව කරලා…
සනීගේ සුමුදු දෑතට මාංචු වැටෙයිද…
‘නඩු’ කියන්නේ ඉන්දීය සුපිරි තාරකාවන් අතර බොහෝ විට සුලබ දෙයක්. විශේෂයෙන්ම ඒ ‘නඩු’ අතර කැපී පෙනෙන්නේ හරි හැටි ආදායම් බදු නොගෙවීමේ වංචාවන්ය.
එක අතකට බලන කළ ඉන්කම් ටැක්ස් එකෙන් ඔවුන්ගේ නිවෙස වැටලීම ඒ තරම් කහටක් ලෙස කිසිවකු සිතට නොගන්නේ නිතරමපාහේ එය සිදුවන්නක් නිසාමය.
නමුත්..,
ඒ කියන ඉන්කම් ටැක්ස් නඩු වෙනුවට වෙනත් නඩුහබ නිසාද සුපිරි තරු නාමයන්ට ලේබල් වදින අවස්ථාද නැත්තේ නොවේ. උතුරු ඉන්දීය සිනමාවේ සරාගී තාරකාවක, එහෙමත් නැතිනම් පිරිමි සිත්සතන් උන්මාදනීය කරවන ගිනිසිළුව වන සනී ලියොන්ටද මේ දිනවල වැටී තිබෙන්නේ එවැනි නඩුහබයකි.
ඒ ගමන මොකක්ද මොකක්ද සනී ලියෝන් පෙරළාගත් බාල්දිය.
එහෙම අහන්නේ සනී මීට පළමුවද වෙනත් බාල්දි පෙරළාගෙන තියෙනවද..?
ඇයි නැත්තේ..,
වැඩියෙන්ම සනී කොකු දමා ගන්නේ ගැහැනුන් සමඟය. එයට හේතුව පිරිමි හොරකමේ යෑමට සනී ලියෝන් සතු කදිම හැකියාවය. පැහැදිලිවම කියනවා නම්, විවාහක පිරිමින් සමඟ අයථා සම්බන්ධකම්වලට යන නිසා සනී නම් සුන්දර තාරකාවිය මඩ ප්රහාරයන්ට ලක්වූ අවස්ථාවන් එමට තිබෙන නිසාය.
හැබැයි ඉතින් ඒ බාල්දි සහ කොකු නීතිගත නොවූ නිසා සනීට නඩු වැටුණේ නම් නැත.
සනී නඩුවකට හසුවූ ආරංචිය මොකක්ද? ඒකත් පිරිමි හුටපටයක්ද..?
අපොයි නැහැ… එය වෙනත් ආකාරයකට බරපතළ වංචාවකි. තවත් විදියකට කියනවා නම් පහත් මට්ටමේ මුදල් ගසාකෑමකි.
ඒ කියන්නේ සනී ලියෝන් චිත්රපට ගිවිසුමකට පොල්ල තියලද?
සිදුව තිබෙන්නේ නම් පොලු කේස් එකකි. නමුත් එයට චිත්රපට නිෂ්පාදක හෝ අධ්යක්ෂවරයකු සම්බන්ධ නැත.
කතාව පැතිර ඇත්තේ මේ ආකාරයටය.
දුටුදනන්ගේ සිත වාගේම ඇයද රසගන්වන ආකාරයේ අමුතු හැඩයකින් සහ රූ සපුවෙන් හෙබි සනී ලියෝන්ට උත්සව වැනි දෑ සඳහා සුපිරි නිවාඩු නිකේතනවලින් ලැබෙන ආරාධනා අසීමිතය. ඇගේ ඇල්මට-කැල්මට විශේෂයෙන්ම පිරිමින්ට උන්හිටිතැන්ද අමතක වන නිසා යම් සුවිශේෂී අවස්ථාවන් සඳහා සනීව තම නිවාඩු නිකේතන වෙනුවෙන් ගෙන්වා ගැනීමට මැනේජර්ලා සහ එහි හිමිකරුවනට ඇත්තේ පුදුම පිස්සුවකි..,
අත් දෙක පුරා ඉල්ලන ගණන ලැබෙන නිසා සනී ලියෝන්ද එවැනි ආරාධනා පැනලාම බාර ගන්නට සූදානම්ව සිටින්නීය. නඩුව වැටී තිබෙන්නේ එහෙම සිදුවීමක් අරභයාය.
නම සඳහන් නොකරන සුපිරි නිවාඩු නිකේතනයක කළමනාකරුවකුගෙන් උත්සව කිහිපයකටම එන පොරොන්දුව පිට සනී ලියොන් මුදල් ගත්තද ඒ කිසිවකට ඈ තම දායකත්වය සිදුකර නොමැති බවට ඇයට නඩු දමා ඇත.
ආරංචියේ හැටියට 2016 සිටම සනී මෙම වංචනික ක්රියාව සිදුකර ඇත.
එය ඇගේ ජනප්රියත්වයට ගැසූ මඩ පහරක් වන්නට බැරිද?
එසේ විය නොහැක. මෙය මුසාවක් වී නම් 2021 පෙබරවාරි මස මුල සනී ලියෝන්ව කේරළ පොලිසිය විසින් ප්රශ්න කිරීම සඳහා කොටුකර ගන්නේ නැත. ඒ වගේම සනීගේ සමීපතමයන් දෙදෙනකුද මෙම මුදල් වංචාවට සම්බන්ධ නිසා කේරළ පොලිසිය විසින් ඔවුන්වද කිහිප වතාවක්ම ප්රශ්න කිරීම් වෙත හසුකොට ගෙන ඇත.
සනී ලියෝන් මේ ගැන කිසිවක්ම කියන්නේ නැද්ද?
සනී කියන්නේ නම්..,
‘අනේ මේ මොන විකාරයක්ද? උත්සවවලට එන්නට පොරොන්දු වූවා මිස මම මුදලක් ගත්තේ නම් නැතැයි..”
කියාය.
ඇත්ත වසන්කරන්නේ කවුදැයි තවම පැහැදිලි නැත.
සනීගේ මුදු සුමුදු දෑතට මාංචු වැටේවිද?
එය කියන්නට දන්නේ නම් නැත.
හැබැයි නඩුවට පැටලී සිටින සනී සහ ඇගේ සමීපතමයන් දෙදෙනාව අත්අඩංගුවට ගන්න යැයි කේරළ මහාධිකරණය වෙතින් පසුගිය බදාදා අවසර ඉල්ලා සිටියද අපරාධ ක්රියා පටිපාටිවලට අනුව නොතීසි නිකුත් කරවනතුරු ඔවුන් අත්අඩංගුවට නොගන්නැයි අධිකරණය විසින් කේරළ පොලිසියේ අපරාධ අංශය වෙත ඉල්ලීමක් කර ඇත.
සිදුවන්නේ කුමක්ද?
තවමත් සනීට විරුද්ධ නඩුව එළිපත්තේය. එහෙමත් නැත්නම් වැට උඩය. වාසිය කොයි අතට කැරකේවිද නොදන්නෙමුය.
කෙසේ වුවද..,
සමාජජාලා වෙබ් අඩවි හරහා සනීට විරුද්ධව මඩ ගසන්නන් සේම ඇයට පක්ෂව සුදු හුණු තවරන්නන්ද සමසමව සිටිති.
සනී ලියොන් නම් ගිනි සිළුව ඒ සියල්ල දෙස හරි සැහැල්ලුවට බලා සිටින්නේ එය වෙනත් කිසිවකුගේ නඩුවක් විලාසයටය.
‘හිතා ගන්නත් බැහැ… මේක මහා විකාරයක්..,’
නඩුව ගැන අසන හැමෝටම වාගේ සනී දෙන්නේ ඒ පිළිතුරය.
දමයන්ති රේණුකා ප්රනාන්දු