රැල්ලට යන්නැති චන්ද්‍රකුමාර

‘තණමල්විල කොල්ලෙක්’ පහුගිය සතියෙ අවසන් වෙන්නෙ අපූරු නිර්මාණයක මතක ගොඩක් අප හමුවේ ඉතුරු කරල. ටෙලිනාට්‍ය පුරාම අපිට දකින්න ලැබෙන පොඩි පොඩි චරිත. මේ පොඩි පොඩි චරිත ඇතුළෙ හැමෝම ලොකු වැඩක් කරනවා. චන්ද්‍රකුමාර කියන්නෙ නාට්ටිය ඇතුළෙ අමතක නොවන චරිතයක්. චන්ද්‍රකුමාර අහම්බෙන් හමුවෙලා, හමුවෙන හැම වෙලාවකම ජීවිතේ ගැන, සමාජය ගැන දීප්තට කියලා දිලා, අවසානයට ගමට යනවා. ‘තණමල්විල කොල්ලෙක්’ ඇතුළෙ එහෙම දැනෙන චරිතයක් තමයි චන්ද්‍රකුමාර. චන්ද්‍රකුමාරට ජීවය දුන් ශ්‍රීමංජුල පෙරේරා ‘තණමල්විල කොල්ලෙක්’ ගැන අපිට කිව්වෙ මේ විදිහට.
ඔබව බොහෝදෙනෙක් හඳුනගන්නෙ චන්ද්‍රකුමාර හරහා?
ඔව්. මම කලින් රොෂාන් එක්ක පොඩි පොඩි නාට්ටි වැඩවලට සම්බන්ධ වෙලා හිටිය. ඒ හරහා ගොඩනැගිච්ච හැඳුනුම්කම උඩ තමයි මට චන්ද්‍රකුමාර කියන චරිතය ලැබෙන්නෙ. රොෂාන් මට කිව්ව මේක සීරියස් චරිතයක්, මේක දෙන්න හිටියෙ වෙන කෙනෙක්ට කියල. පස්සෙ කොහොම හරි මේ චරිතෙ මට ලැබුණ.
සීරියස් චරිතයක් සඳහා තෝරගන්න ඔබට රංගනය පිළිබඳ හැෑරීමක් තිබුනද?
මම මුලින්ම සෝමලතා සුබසිංහ මහත්මියගෙන් තමයි රංගනය පිළිබඳ හදාරන්නෙ. ඊට පස්සෙ මහේන්ද්‍ර පෙරේරා යටතේ වැඩිදුරටත් රංගනය හදාරනවා. එතැනදි තමයි මට ඇක්ටින් පිළිබඳව සම්පූර්ණ දැනීමක් ලැබෙන්නෙ. ඒ වගේම දේශක සම්පත් කියන සංගීත අධ්‍යක්ෂවරයා යටතේ මම ලබපු පුහුණුවත් අමතක කරන්න බෑ.
චන්ද්‍රකුමාර කියන චරිතය ඔබට දැනෙන්නෙ කොහොමද?
මේ චරිතය යම්කිසි කොටසක් මගේ ජීවිතයටත් අදාළයි. ඒ අත්දැකීම් එක්ක මට චරිතයට හොඳට අවතීර්ණ වෙන්න ලැබුණ කියල මම හිතනව.
ඔබ මීට කලින් සම්බන්ධ වුණ නිර්මාණ මොනවද?
වසන්ත ඔබේසේකර මහත්මයගෙ අසනි වර්ෂා, ධර්මසේන පතිරාජ මහත්මයගෙ මතුයම් දවස, සත්‍යජිත් මායිටිපේ මහත්මයගෙ ස්මරණ සමාප්තිය චිත්‍රපටවලට මම සම්බන්ධ වුණා. ඊට අමතරව බහුබූතයො චිත්‍රපටයෙ පොඩි කැරැක්ට එකක් කළා. ප්‍රසන්න ජයකොඩිගෙ හදවිල සක්මන නාට්‍ය ඇතුළු ටෙලිනාට්‍ය කීපයක වැඩ කළා. ජෙරම් ද සිල්වා කරපු මැක්බර්ත් නාට්‍යයෙත් මම චරිතයක් කලා.
රොෂාන් යටතේ වැඩ කරන්න ලැබීම කොයිවිදිහට දැනුණෙ?
මම දැකල නෑ ඒ තරම් නම්‍යශීලී වෙන අධ්‍යක්ෂවරයෙක්. රොෂාන් මගේ මිත්‍රයෙක් වුණාට මම සෙට් එකට ආවට පස්සෙ මට තනිකරම වෘත්තීයමය ආටිස්ට් කෙනෙක්ට සලකන විදිහටම තමයි සැලකුවෙ. මේ කැරැක්ට එක කරද්දි වරදින තැන් සෑහෙන්න තිබ්බ. ඒ හැම අවස්ථාවකදිම මගේ අඩුපාඩුකම් හදාගෙන මගෙන් ගන්න ඕනෙ දේ ගන්න එයා දක්ෂ වුණා. මේ චරිතය ඇතුළෙ මගෙන් ගන්න පුළුවන් උපරිම දේ එයා ගත්ත.
චන්ද්‍රකුමාර හරහා ඔබ ජනප්‍රිය වුණාට පස්සෙ වෙනත් නිර්මාණවලට ආරාධනා ආවෙ නැද්ද?
නෑ. මට එහෙම කිසිම නිර්මාණයකට විශේෂයෙන් ආරාධනා ලැබුණෙ නෑ. ඉන්ටර්විව්වලට නම් එක එක චැනල්වලින් ආරාධනා ආව. මම දැන් ඉන්න ස්ථාවරය තමයි මට ලැබෙන ප්‍රතිචාරත් එක්ක ජනප්‍රියතාව පසුපස යනවට වැඩිය හරවත් යමක් කරන්න ඕනෙ කියන එක. රැල්ලට යන්නෙ නැතුව හරවත් නිර්මාණ සඳහා දායකත්වය ලබාදෙන්න තමයි මගේ බලාපොරොත්තුව.
ඉන්දික වික්‍රමරත්න