රාණිගෙන් චාලිස් ඒන්ජස්ල්

රාණි මුඛර්ජි ගැන කිසිවක් පැහැදිලි කිරීමට වචන නාස්ති කළයුතු නැත. මීට වසර කිහිපයකට පළමුව උතුරු ඉන්දීය සුපිරි තරු අතර උන්මාදනීය වූ ආකර්ෂණීය එක් තරුවකුව සිටි රාණි මුඛර්ජි ශ්‍රී ලාංකේය ප්‍රේක්‍ෂකයන් අතරද දැඩි ජනප්‍රියත්වයකට පත්ව සිටියාය. දඟකාර චරිත නිරූපණය තුළින් තවමත් ඉන්දීය පිරිමින් අතර නොමැකෙන මතකයක් තබා සිටින රාණි දැවැන්ත චිත්‍රපට නිෂ්පාදනයක් සඳහා අත ගහන්නට සූදානම්ව සිටින බව මේ දිනවල සමාජ ජාලා වෙබ්අඩවි හරහා පැතිර යන අලුත්ම ආරංචිය වෙයි.
ක්‍රියාදාම චිත්‍රපටයක් වන “මර්දානි 2” සඳහා රූපවාහිනී සාකච්ඡාවට පැමිණි රාණි මුඛර්ජි තමා “චාලීස් ඒන්ජල්ස්” චිත්‍රපටය තැනීම සඳහා විධිවිධාන සකස් කරමින් සිටින බව පැවසුවාය.
පළමුව “මර්දානි-2” ගැන කතා කළ රාණි එහි තමන් රඟපෑ නිර්භීත පොලිස් නිලධාරිනියකගේ චරිතය තුළින් තම සිතට දැනුණු අලුත්ම තෘප්තිය අති විශාල යැයි පවසා සිටියාය. අධ්‍යක්‍ෂ ගෝපි පුත්‍රන් “ශිවානි රෝයිගේ” චරිතය සාර්ථක කිරීම සඳහා තමා සතු සියලු හැකියාවන් උකහාගත් ආකාරය ඉතාම ප්‍රශංසනීය බව රාණි තවදුරටත් කීවේ ඉතා පුදුමාකාර වූ යමක් අත්දුටු ලෙසින්ය.
ශිවානි රෝයිගේ චරිතයට මා ඇතුළු වූයේ පොලිස් නිල ඇඳුමෙන් පමණක් නොවෙයි. ශිවානිගේ නිර්භීත පැවැතුම්, සිංහ ධෙනුවකගේවූ ප්‍රභාවය, කෝපය සමඟ වූ දරා ගැනීමේ ශක්තිය යන ගති පැවැතුම් තුළ මා ජීවත් කරවීමට ගෝපි ගත් වෑයම මට පුදුමය දනවනසුලු වුණා.
“ෆ්‍රෙස් ෂෝ” එක නරඹන විට ඒ චිත්‍රපටයෙහි සිටින්නේ මම බව මට අමතක නොවන තරමට මට එහි කටයුතු කර තිබුණා.
දිගින් දිගටම ශිවානි රෝයි මගේ මනස තුළ හොල්මන් කරන විට මට හිතුණා ඉන්දියානු නිළියන් සොඳුරු පෙම් චරිත හෝ සරාගී චරිත පමණක් නොව “ශිවානි රෝයි” වැනි චරිත තුළින්ද ප්‍රේක්‍ෂකයා පිනවිය යුතුයැයි කියා.,
ඒ අතරට මට හිතුණා කාන්තා චරිත කිහිපයක සටන්කාමී බව පිළිබිඹු වන චිත්‍රපටයක් කරන්නට ඇත්නම් අපූරුය කියා. මගේ මතකයට ආවේ චාලිස් ඒන්ජල්ස් ටෙලි කතා මාලාවයි.
දෙවරක් සිතීම නිෂ්ඵල නිසා මම තීරණය කළා චාලීස් ඒන්ජල්ස් හදනවාමයි කියා. ඒ වාගේම එහි ඒන්ජල්ස් කෙනකු වීමේ දැඩි ආශාවක්ද මා සතුව තිබෙනවා.
රාණි මුඛර්ජි තම සිහිනය එලෙස පළමු වරට කියා පෑවාය.
එක් සුරදූතියක් ඔබ වූ විට තවත් සුර දූතියන් දෙදෙනකුට ඉඩ තිබෙනවා, ඒ කෙල්ලන් කවුරු විය හැකිද?
සූම් ටී.වී.හි සම්මුඛ සාකච්ඡාව මෙහෙය වන්නා රාණිගෙන් ඒ ඇසුවේ ඕපාදූපයකි.
ඇත්තටම “ටයිගර් සින්දා හේ” චිත්‍රපටය නරඹන විට මට කත්‍රිනාගේ රඟපෑම ගැන පුදුම හිතුණා. සමහර සීන්වලදී මටත් නොදැනුවම මගේ හිත තිගැස්සුණේ කත්‍රිනාගේ බිහිරිමය ආවේගශීලී බව දැකලයි. කත්‍රිනා කෙතරම් සාර්ථකද, අපූරුද කියා මට හිතුණා. ඒ නිසා එක් සුරදූතියකුගේ හිස් තැන හරි..,
ඒ එක්කම මට දීපිකා පදුකෝන්ව හිතට නැඟුණා. දීපිකාගේ පෙනුම සහ දාංගලය සිහිවූ නිසා ඉතුරු සුරදූතියගේ හිස්තැනත් සපිරුණා. ඔන්න හරි අපූරු නිර්මාණයක ඉඩ සැලසුණා.
ඇත්තෙන්ම, රාණි මුඛර්ජි, දීපිකා පදුකෝන් සහ කත්‍රිනා කයිෆ් චාලීස් ඒන්ජල්ස්ලා විදියට ඇඳගෙන ඉන්න හැඩකාර කටවුට් එක මේ දවස්වල මගේ සිතේ මැවෙමින් තියෙනවා.
“කවදාද චාලීස් ඒන්ජල්ස් චිත්‍රපටයට මුල පුරන්නේ”
සම්මුඛ සාකච්ඡාව මෙහෙයවන්නා රාණිගෙන් ඇසුවේය.
ඉක්මනින් සියල්ල සිදුවේවි. සුරදූතියන්ගේ ක්‍රියාදාම සපිරි ඉතා අපූරු චිත්‍රපටයක් නැරැඹීමේ භාග්‍යය උතුරු ඉන්දීය සිනමා ලෝලීන්ට උදාවන බව නිසැකයි.
“අනේ මන්දා… මම කයිවාරු කිව්වා වැඩිද?”
සියල්ල අවසානයේ රාණි ඇසුවේ ලැජ්ජාවෙන් වාගෙය.
“අයියෝ නැහැ… ඔබ හරිම අවංකව කතා කළා රාණි ජී”
“සූම්” රූපවාහිනියේ මාධ්‍යවේදියා ඈව සන්සුන් කළේය.
“චාලීස් ඒන්ජල්ස්” හමුවේ ඈ දියත් කරන්නට හදන මෙහෙවර වෙනුවෙන් බොහෝ ප්‍රේක්‍ෂකයන් තම සතුට සමාජ ජාලා වෙබ් අඩවි හරහා නිකුත් කොට තිබිණි.
“සුබ පැතුම් රාණි ජී, ඔබේ සුරදූත සිහිනය තිරය මත සැබෑවනු දැකීමට අපද පෙරුම්පුරා බලා සිටිමු.”
කමෙන්ට්ස් අතර විශේෂයෙන්ම වූයේ එවැනි වදන්ය.
දමයන්ති රේණුකා ප්‍රනාන්දු