රවීනාගේ දුවට රාජකීය මඟුලක්

සමාජ මාධ්‍ය ජාලා සමඟ ගැටෙන සුපිරි ඉන්දීය තාරකාවන් අතර රවීනා තණ්ඩන් වඩා ජනප්‍රියය. සෑම උදෑසනකම රවීනා සිය ට්විටර් සහ ඉන්ස්ටග්‍රෑම් මිතුරු මිතුරියනට සුබ දවසක් ප්‍රාර්ථනා කරයි. එදිනෙදා සිදුවන සුවිශේෂී යම් සිදුවීම්ද සෙල්ෆියක් ලෙස ගෙන මුදාහරියි. රසවත් කෑමක ආහාර වට්ටෝරුව රවීනා හැමෝම අතර සුහදව බෙදාහරින්නේද ඈ අතින් පිළියෙල කරන ලද එම අතුරුපස හෝ කෙටි කෑම වර්ගය සහිත සේයාරූද පළකරමින්ය.

තවත් ලෙසකින් කියනවා නම් රවීනා තණ්ඩන් නම් මේ සරල නිළි තාරකාවිය ‘ටික්ටොක්’ වීඩියෝ ක්‍රමයෙහි තදින් ඇබ්බැහිව සිටින්නියකි. එම ‘ටික්ටොක්’ වීඩියෝපට සඳහා ඇය හා රඟන සහායිකාව වන්නේ ඇගේ සුරතල් දියණිය රෂාය. ඉන්දීය රසිකයන් අතර වඩාත්ම ජනප්‍රිය ඔවුන්ගේ ‘ටික්ටොක්’ වීඩියෝ පෙළ ඉතා විකාරරූපී වුවද බෙහෙවින්ම සුන්දරය.

පසුගිය දින කිහිපය තුළ රවීනා ‘ටික්ටොක්’වලට මඳ විරාමයක් පනවා තිබිණි. එයට හේතුව වූයේ කැපකරු මාපිය ක්‍රමය යටතේ රවීනා ඉතාම ළෙන්ගතුව හදාවඩා ගත් ඇගේ දියණිය ‘චායා’ගේ විවාහ මංගල්‍යය.
ගෝවේදී ඉතාම අලංකාරව පවත්වන ලද මේ ලස්සන විවාහය වෙනුවෙන් රවීනා නිර්මාණය කර තිබුණු වීඩියෝව පුරා වූයේ දැඩි ආකර්ෂණයකි. බොහෝදෙනෙක් එයට ප්‍රතිචාර දක්වා තිබුණේ “ඇත්තටම මේ අපූරු මංගල්‍යය එංගලන්තයේ රාජකීය විවාහයකට වඩා සුන්දර” යැයි වචන පෙළගස්වමින්ය.

හිම කුමාරියක මෙන් සැරසුණු ‘චායා’ගේ සුරතින් ගත් රවීනාගේ දෑස තුළ සතුටු කඳුළක් මෝදුවී තිබිණි. නිළියක ලෙස ජනප්‍රිය වීමට ඇයට බොහෝ උපකාරී වූ සොඳුරු සිනහවද රවීනාගේ මුව පුරා ඇඳී තිබිණි.
මනාලියක ලෙස ‘චායා’ සැරසෙන තැන සිට අතිනත ගන්නා අවස්ථාව එනතුරුම මේ සොඳුරු වීඩියෝව දුවයයි.
මෙහි අපූර්වතම වෙනස වන්නේ සාමාන්‍ය විවාහ මංගල්‍යයක් නිල වශයෙන් වීඩියෝ කරනවාට වැඩි වෙනත් යමක් මෙම දර්ශන පෙළෙහි ඉතාම කලාත්මකව ඉදිරිපත් වීමය.

රවීනා හෝ දියණිය චායා එහි මුහුණදී සිටින්නේ යම් කිසිවකු විසින් රහසේ ඔවුන්ව රූගත කරන තාලයටය. තමන් පිටුපස කැමරා කාචයක් තියෙන්නේදැයි යන්නවත් නොදන්නා ලෙස ඉතාම සාමාන්‍යව චායා සහ රවීනා එහි රඟා තිබූ අපූර්වත්වය සිත් ඇදගන්නාසුලුය.

මෙහිදී රවීනා රෝයල් බ්ලූ ඇඳුමකින් සැරසී සිටියේ චායා ඇඟලා සිටි අයිවරි පැහැති මැක්සි ගවුමට සරිලන ආකාරයටය. හොඳින් පෙළට දිස්වන සෑම රූපරාමුවකම රවීනා සතු අව්‍යාජ සිනාවෙහි වූයේ අසාමාන්‍ය බවෙන් පිටතට ගිය සාමාන්‍ය සරල බවකි. ඒ සිනාව රවීනා තිළිණකොට තිබුණේ කැමරා කාචයකට නොවන තරමට ඒ සරලත්වය මිහිරිමය විය.

බලාපොරොත්තු වූවාටත් වඩා එය රවීනාගේ ඉන්ස්ටග්‍රෑම් රසිකයන් විසින් නරඹා තිබිණි. සටහන්ව තිබූ කමෙන්ට්ස්වල රවීනාගේ දියණියට ආශීර්වාද කර තිබූ අතර වීඩියෝව නිමකර තිබූ ස්වභාවයටද ලකුණු දී තිබිණි.
දහස් ගණන් නොව ලක්ෂ ගණන් වූ රසික හදවත් මේ මනහර දසුන් වෙත ආකර්ෂණීයව සිටියහ.
‘සොරකම් කර ළඟ තබාගැනීමට තරම් මෙය අමන්දානන්දනීයයි රවීනා’
‘එය අපූරුයි. වැරැදීමකින් කාටත් හොරා කළ රූගත කිරීමක් වැන්න’
‘සුන්දරත්වය ඇත්තේ ඔබ හෝ චායා තුළ නොව කැමරාවක් ගැන නිනව්වක් නොවූ සරල හැසිරීම් තුළය’
ඉතාම අලංකාර වූ එවැනි කමෙන්ට්ස් හමුවේ රවීනා තණ්ඩන් දැඩි සතුටට පත්ව සිටියාය.
ඒ අපූරු සතුට රවීනා විසින් ආදරණීය වචන කිහිපයකට මෙසේ බැර කළාය.
ජීවිතයට බොහෝ වැදගත් විය හැකි මෙවැනි සිදුවීම් රැඳී තිබිය යුත්තේ අප හදවත් තුළ මිස වීඩියෝවක නොවේය.
එනමුදු,
රූප මාධ්‍යයක් හරහා එය යම් විටෙක නැරැඹීමෙන් එම වැදගත් මතකයට ආදරය සහ සතුට හරි කදිමට නැවත නැවත එක්කළ හැකිය.
ඉතින් ඔබේ මිතුරු බවටත් ආදරයටත් හැමදාමත් ස්තුතියි.
දමයන්ති රේණුකා ප්‍රනාන්දු