මවක වූ ඕෂධී ගත්ත තීන්දුව

පසුගිය කාලසීමාව තුළ ජනප්‍රිය රංගන ශිල්පිනියන් රැසක් මව් පදවිය ලැබුවා. ඉතින් නව පරපුරේ දක්ෂ නිරූපණ ශිල්පිනියක් වගේම දක්ෂ රංගන ශිල්පිනියක් වුණු ඕෂධී හිමාෂා කියන්නේ ඒ සුන්දර අවස්ථාවට මුහුණ දුන් කෙනෙක්. මව් සෙනෙහස ගැන ඇයට දැනුණු විදිය ‘හාට්’ එකට හෙළි කළේ මේ විදියට.
ඕෂධීගේ ජීවිතයේ නැවත අලුත් පිටුවක් පෙරළුවා නේද? ඒ ගැන අපි මුලින් කතා කරමු?
මම දැන් අම්මා කෙනෙක්. පසුගිය මාසේ 11 වැනිදා තමා අපේ කැදැල්ලට කුමාරිකාවක් ආවේ. අපේ මුළු නිවෙසම කිරි සුවඳින් දෝර ගලනවා. එය මගේ ජීවිතයට අලුත් අත්දැකීමක්. අපි දෙන්නම ගොඩාක් සතුටින් තමයි ඉන්නේ.
හැබැයි ඔය සතුට අතර පුංචි දුකකුත් ඇති මනෝජ්ගේ?
ඔව්. මනෝජ්ට පොඩි දුකක් ඇති. මොකද එයාගේ ලොකු ආශාවක් තිබුණේ පුතෙක්ට. හැබැයි දැන්නම් දුව එක්කමයි. දැන් හිත වෙනස් වෙලා. මොන දේ වුණත් අපි දෙන්නාගේ දරුවානේ. කවුරු වුණත් කමක් නැහැ කියන අදහසින් මම හිටියේ.
ඕෂධී කාර්යබහුල රංගන ශිල්පිනියක්. ඉතින් දුවගේ වැඩකටයුතු නිර්මාණ නිසා මඟහැරෙනවා ඇති නේද?
අපිට හැමදාම දරු සුරතල් බලන්න බැහැ. ඉතින් මම මේ වෙලාවේ 100%ක්ම දුව වෙනුවෙන් තමයි කාලය ගත කරන්නේ. දවස ගෙවෙනවා තේරෙන්නෙම නැහැ. මුල් කාලෙදි බබාව වඩාගන්න පවා මට නුහුරු ගතියක් තිබුණේ. මගේ අම්මා ඇවිත් සතියක් විතර මට උදව් කළා. අම්මා හිටිය කාලෙ මම හැමදේම හුරුවුණා.
අම්මා දුවගේ හැඩ බලලා ඕෂධීගේ ළමා අවධිය ගැන කතා කරන්න ඇති?
ඇත්තටම අම්මා මට කියනවා ආදරය කළේ මේ විදියට. සැලකුවේ මේ විදියට. රැකබලා ගත්තේ මේ විදියට කියලා. එහෙම කියද්දි ඒ කාලේ ඒ හැඟීම් ටිකයි දැනුණේ. හැබැයි දැන් මම අම්මා කෙනෙක්. දැන් මට තේරෙනවා එදා මගේ අම්මා මම වෙනුවෙන් කළ කැපකිරීම කොයිතරම්ද කියලා. ඒ මව් සෙනෙහස ලබන්න අම්මා කෙනෙක් විය යුතුමයි.
ළඟදීම ඕෂධී මුහුණට මුහුණ හමුවෙනවා නේද?
‘ෆේස් ටු ෆේස්’ චිත්‍රපටය නොවැම්බර් මාසයේ තිරගත වෙනවා. එහි ප්‍රධාන චරිතයක් තමයි මම රඟපාන්නේ. මම හිතන විදියට අමායා චරිතය ප්‍රේක්ෂකයන්ට වෙනස්ම අත්දැකීමක් වෙයි කියලා මම හිතනවා. සමහරු මට අකැමැති වෙන්නත් පුළුවන් මගේ කපටි වැඩ නිසා.
ගොඩදෙනෙක් කියනවා මනෝජ් දක්ෂ නිරූපණ ශිල්පියෙක් කියලා. ඉදිරියේදීම දෙන්නට ආරාධනා ලැබෙයි රඟපාන්න?
ඔහු නිරූපණ ශිල්පියෙක් නෙමේ. ඔහුගේ බාහිර ස්වරූපය නිසා හිතාගෙන ඉන්නේ නිරූපණ ශිල්පියෙක් කියලා. ගුවන් නියමුවෙක් විදියට තමයි ඔහු කටයුතු කරන්නේ. ඔහු ක්ෂේත්‍රයට ගොඩාක් කැමැතියි. ඒත් ඔහුව ක්ෂේත්‍රයට සම්බන්ධ වෙන්න කාලය තමයි ප්‍රශ්නය.
වසන්ත විතාරණගේ