මං රඟපාද්දි අඬනවට දුව කැමැති නෑ

හිමාලි සයුරංගි අද සම්මානනීය රංගන ශිල්පිනියක්. මේ දිනවල තිරගත වන ‘සුනාමි’ චිත්‍රපටය හරහා රිදී තිරයේ ඇයත් දැක ගන්නට පුළුවන්. දරුවකුගේ ආදරය, සෙනෙහස ඉල්ලමින් හඬා වැලපෙමින් සාර්ථක රංගනයකට ජීවය ලබාදෙන ඇය ඒ වේදනාබර කතාව මෙලෙසට සනිටුහන් කළා.
කාලෙකට පස්සේ නැවැත හිමාලි සිනමාවට එකතු වුණා නේද?
සෝමරත්න දිසානායක අධ්‍යක්‍ෂණය කරන රේණුකා බාලසූරිය නිෂ්පාදනය කරන සුනාමි චිත්‍රපටයට ශ්‍රියානි චරිතය නිරූපණ කිරීමට මට ආරාධනා කළා. ඔවුන් සමඟ වැඩ කරන්න මගේ හිතේ පොඩි බලාපොරොත්තුවක් තිබුණා. ‘සුනාමි’ චිත්‍රපටය හරහා මගේ සිහිනය සැබෑ වුණා.
‘ශ්‍රියානි’ චරිතය හරහා ලැබෙන ප්‍රතිචාර කොහොමද?
හරිම සංවේදනීය චරිතයක් තමයි මටත් නිරූපණය කරන්න සිදුවුණේ. ශ්‍රියානි වගේ අම්මලා එදා සුනාමි දවසේ මොන තරම් කඳුළු වගුරන්න ඇතිද? තමාගේ දරුවන් පවුල් වෙනුවෙන්. එදා ඒ හඬපු එක ශ්‍රියානි කෙනෙක් මමත් නිරූපණය කරන්න ඇති. එදා මුළු රටක්ම කම්පා කළ ඛේදවාචකයේ එක් කතාවක් ‘සුනාමි’ හරහා නිර්මාණය වුණා.
මම හැමෝටම ආරාධනා කරනවා ‘සුනාමි’ චිත්‍රපටය නරඹන්න කියලා. මනුෂ්‍ය හැඟීම් එක්ක කතා බහ කෙරෙන සුවිශේෂී නිර්මාණයක් තමයි ‘සුනාමි’ චිත්‍රපටය.
සිකුරු හතේ නැඟී එන නිළියට සම්මාන ලැබුණාට පසුකාලීනව චිත්‍රපටවලින් ආරාධනා ලැබුණේ නැහැ නේද?
ඒක තමයි ඉතින් සම්මාන ගත්තාට මට ආරාධනා ලැබුණේ නැහැ. නිහඬව ඉන්න විට තමයි මට ‘සුනාමි’ චිත්‍රපටයට දායක වීමට අවස්ථාව උදා වුණේ. දක්‍ෂතා පෙන්නුවාට පසුකාලීනව ඉදිරියට යෑමට නිර්මාණවලින් ආරාධනා අඩු බවක් දකිනවා.
සිනමාවේ විතරක් නොව ඔබ පුංචි තිරයෙත් ජනප්‍රිය කිරුළ දරා හමාරයි. ඒත් නිර්මාණ එක්ක ගනුදෙනුව අඩුයි?
ජනප්‍රිය වුණා කියලා හැම නිර්මාණයෙම රඟපාලා වැඩක් නැහැ. මම කරන චරිතය මට වගේම ප්‍රේක්‍ෂකයන්ටත් යමක් දැනෙන්න ඕනෑ. නැතුව නිකම් කරන්නම් වාලේ නිර්මාණවල රඟපාලා වැඩක් නැහැ. එයින් අපි ආපු ගමනටත් ඵලක් නැහැ. කරන දේ හරියට කරන්නයි මම උත්සාහ කරන්නේ.
එක දිගට දකින අයව ප්‍රේක්‍ෂකයන්ට එපා වෙන්නෙ නැද්ද?
ඔබ ඔය කියන්නේ ‘දෙවැනි ඉනිම’ ටෙලිනාට්‍ය ගැන වෙන්න ඇති. ‘දෙවැනි ඉනිම’ මම හිතන්නෙ නැහැ කාටවත් එපාවීමක් වෙලා කියලා. මම චරිතයට ආදරය කළා වගේම මගේ චරිතයට ආදරයෙන් ප්‍රේක්‍ෂක දහස් ගණනක් මම සමඟ බැඳුණා. මට එහෙම එපා වීමක් වුණා නම් මෙයට කලින් ඉවත් වෙලා. නමුත් හැමෝම කතාබහ වෙලා දැන් ඇති කියලා හිතුවා. ඉතින් දෙවැනි ඉනිම අවසාන කාල වකවානු සිදුවෙමින් යනවා. නැතුව මම කැමැති නැහැ එකපාරට චරිතයක් මඟ දමලා ගහලා යන්න.
රංගන ශිල්පිනියක් වගේම ඔබ ගෘහිණියක් විදියට කොහොමද ඔබගේ වැඩකටයුතු සැලසුම?
මම මොන දේ කළත් මගේ පවුලට මුල්තැන දෙන්නේ. දුරබැහැර ප්‍රදේශවලත් ටෙලිනාට්‍ය රූපගත කිරීම් සිදුකෙරෙන නිසා සමහර නිර්මාණ ප්‍රතික්‍ෂේප කරන්න වුණා. ගෙදර ඉන්න වෙලාවට මගේ අතින් තමයි හැම වැඩ කටයුත්තක්ම කරන්නේ. දුවගේ වැඩකටයුතු නිසා ගෙදරදී කාලය ගෙවෙනවා දැනෙන්නේ නැහැ.
දුව මොනවගේ ප්‍රතිචාරයක්ද දක්වන්නේ ඔබගේ රඟපෑමට?
එයාට ලොකු තේරුමක් නැහැ. නමුත් දන්නවා මම රඟපාන බව. එයා කැමැති නැහැ මම රඟපෑමේදී අඬනවාට. ඒ වගේම පොඩි දරුවන්ට ආදරය කරනවාට. එතකොට එයාට දුකයි කියලා කියනවා.
වසන්ත විතාරණගේ