පසුගිය දිනයක අන්තර්ජාලය කලඹාලූ පුවත් කිහිපය අතර කරන් ජොහාර් නම් ප්රවීණ සිනමාකරුවාගේ චරිතයට හානි වන අන්දමේ පුවතක් මතුවිය.
එහි ශීර්ෂ පාඨයෙහි සඳහන්ව තිබුණේ,
“කරන් ජොහාර්ගේ නිවෙසෙහි මතින් පිරි සාදයක්” යන්නය.
වයින් උගුරක් ආසාවටවත් තොල නොගාන කරන් මේ පුවතින් දැඩිව කලබලයට පත්විය. කරන්ගේ සිත්තැවුල වඩාත් දැඩි වූයේ ඔහුගේ මවද මෙම නරක ආරංචියෙන් චිත්ත පීඩාවට පත්ව සිටි නිසාය. තමන්ට පමණක් නොව ඔහුගේ ආරාධනය මත සාදයට පැමණ සිටි උතුරු ඉන්දියානු සිනමාවෙ සුපිරි තාරකාවන් වන දීපිකා පදුකෝන්, රන්බීර් කපූර්, සාහීඞ් කපූර්, වරුන් ධවාන්, අර්ජුන් කපූර්, මල්ලිකා ආරෝරා සහ විකී කෞෂාල්ද මත්ද්රව්ය චෝදනාවට හසුව සිටියහ.
එලෙසම වීඩියෝවෙහි හුවා දක්වන අන්දමට කරන් ජොහාර් ඇතුළුව සියලුම සුපිරි තරු පදමට මත්ව සිටින බව කාටත් හැඟී යන ආකාරයට එහි රූපරාමු පෙළගැසී තිබිණි. පන්ජාබයේ ශීඝ්රයෙන් පැතිර යන මත්ද්රව්ය උවදුර පිළිබඳ චිත්රපටයක් තැනීමට සද්භාවයෙන් ඉදිරිපත් වූ මේ නිර්මාණශීලී සිනමාකරුවා, තමා වයින් බිඳුවක් හෝ තොල නොගාන බව ප්රසිද්ධියේම පවසන්නේද මහා අවංක බවකින්ය.
ඉතින්,
එහෙව් කරන් සිය මිතුරු පාර්ශ්වය සඳහා එක්වී මතින් පදම් වී අඩඅඳුරින් පිරි පාට පාට ලෝකයක සැරිසරන්නට තරම් දුර්වල අයකු වීම සැබැවින්ම ඇදහිය නොහැකිය. ඇත්තෙන්ම කරන් ජොහාර් මත්ද්රව්ය භාවිත කළ එකී වීඩියෝව සත්යයක්මද?
එය බොරුවක් යැයි අදහනවාට වඩා,
“ඒක නම් බොරුවක් නෙවෙයි, ඇත්තටම එයාල බඹර පදමට මත්වෙලා ඉන්නේ” යැයි කියන්නට අවැසි සාක්ෂි එම වීඩියෝවෙහි ගැබ්ව ඇති බව එය දකින්නකුට සිතෙනු ඇත.
“ඇත්තටම මට හිතාගන්නට බැහැ මේ ඕපාදූප පතුරුවන අයගේ මානසිකත්වය කොයිතරම් පහත්දැයි කියලා.”
කරන් ජොහාර් සිය අදහස් දැක්වීම ආරම්භ කළේ එම ආකාරයටය.
“මට ඇතිවෙන්න හිනාවෙන්න තරමට ඔය කියන ඕපාදූපය හාස්යෝත්පාදකයි.
ඔවුන් මා මතින් පදම්ව ඇති බව පවසන ඕපාදූපයේ සඳහන් වන්නේ මම නිතර මගේ නාසය ඇඟිලිතුඩු අගින් පිසදමන බවකි.
එතැනදී ඔවුන් මෙම වීඩියෝව නරඹන අයට හුවා දක්වන්නේ කුඩු ගහන්නට පුරුදු වූ අය හෝ වෙනත් මතකට ඇබ්බැහි වූවන් නිතර නාසය අග පිසදමන්නට හුරුවූවන් කියාය.
එහි අදහස මට හදිසි අවශ්යතාවක් සඳහා හෝ මගේ නාසය පිසදැමීම හෝ එය ස්පර්ශ කිරීමට නොහැකි බවය.
ඒ වගේම මට තද ප්ලෑෂරයක් සහිත විදුලි ආලෝකය හමුවේ ඇහිපිය ගහන්නට බැරිය. හිස පහත්කරගෙන සිටින්නට බැරිය.
සත්තකින්ම කියනවා නම් වැදගත් සුහද මිතුරු හමුවක් මුල්කොට මඩගසන ඔය ඊනියා වීඩියෝව රූගත කරන්නට එක් තත්පරයකට පළමුවයි මගේ අම්මා අප අතරින් නැඟිට ඉවතට ගියේ. ඈ සාදය පටන්ගත් මොහොතේ සිටම අප සමඟ සතුටුවූවා. ගීත සඳහා තාල ඇල්ලුවා. හිතලා බලන්න අම්මා ඉදිරිපිට මතින් උමතු වන්නට තරම් කරන් ජොහාර් නින්දිත වේද කියලා.”
ඒ කරන්ගේ පාපෝච්චාරණය විය.
කරන් ජොහාර් පවසන දෑ සත්යද, අසත්යදැයි දන්නේ ඔහුමය.
හැබැයි කරන් ජොහාර් බොහෝ කලබලයට පත්ව ඇත. පමණට වඩා ඔහු නිදොස් වන්නට දඟලයි. මාධ්ය හමුවේ තමා සදාචාරාත්මක බව පුන පුනා පවසයි.
ඔහුගේ රත් පැහැව තිබූ ඇස් දෙක පිළිබඳ තියෙන චෝදනාවට ඔහු දුන් පිළිතුර වූයේ,
“තමා එදා සෙම්ප්රතිශ්යා ගතියකින් පෙළුණු නිසා එය සිදුවූ බවය.”
මත්ද්රව්ය යැයි ඕපාදූපයා විසින් ඔප්පු කොට පෙන්වන්නට තනන තමා අත තිබූ වීදුරුවෙහි වූයේ ලෙමන් මිශ්ර උණුවතුර බවද කරන් කියා සිටින්නේ බොහෝ හිතේ අමාරුවෙන්ය.
“දින කිහිපයකට ඉහත මා ඩෙංගු රෝගයෙන් පෙළුණු බැවින් නිතර ලෙමන් මිශ්ර උණුවතුර බීමට පුරුදුව සිටියා. හිස්වෙමින් තිබෙන මත්ද්රව්ය වීදුරුවක් සමඟ මා මතින් සිටිය බව ඕපාදූප පතුරන්නන් පවසන්නේ ඇයිදැයි මට තේරෙන්නේ නැහැ. අපට ආදරය කරන, අපව අසීමිත ජනප්රියත්වයක් මත ඔසවා තබන ප්රේක්ෂකයන් හිටි අඩියේ මේ විදියට අපට අපහාස කිරීමට පෙලඹෙන්නේ ඇයිදැයි? දන්නේ උඩ සිටින දෙවියන්ම පමණයි,
මෙැනදී මම තවදුරටත් ඉවසා සිටින්නට තරම් මගේ හොඳ සිතුවිලි පෙරට තබමි. නමුත් ඒ මගේ සටනේ අවසන් පියවරයි. නැවතත් මෙවැනි පදනම් රහිත චෝදනාවන් ඉදිරියේ මා නීතිමය පියවරකට නොයා නොසිටින බව ඉතා මැදහත්ව කියා සිටිනවා.”
කරන් ජොහාර් කලබලයට පත්ව සිටින්නේ තමා නිර්දෝෂී නිසාද?
එහෙමත් නැතිනම් ඕපාදූපයෙහි උළුප්පා දක්වන ආකාරයට ඔහු එකී චෝදනාවට හිස නැමිය යුතු බව හෘද සාක්ෂිය පවසන නිසාද?
ඒක නම් කියන්නට දන්නේ නැත.
කෙසේ වුවද කරන් පවසන අන්දමට ඒ වීඩියෝව රූගතකර තිබෙන්නේ ඔහුමය. ඔහු කියන්නේ මත්ද්රව්ය උතුරා යන සාදයක් එහි පැවැතුණේ නම් එය වීඩියෝ කර ප්රසිද්ධ කරන්නට තරම් තමා මෝඩයෙක් දැයි කියාය.
සැබැවින්ම එයද ඇත්තකැයි පවසා නොසිටින්නට බැරිය.
“මට සමහර විටෙක හිතෙනවා ඇයි මම මේ ඉතා හිස් යමක් සඳහා බොරුවට උඩ පනින්නෙ කියා. සාදයත්, නිවෙසත් මගේ. ඒ නිසා යමක් සිදුවුවද මා මොනවට එය මේතරමට සාධාරණීකරණය කරම්ද?”
පීඩාවට පත් කරන් ජොහාර් එලෙසින්ද වරෙක පවසා තිබුණේ, සිය වත පුරා වූ කෝපය සඟවාලන්නට උත්සාහ දරමිනි.
ඒ නම්, “මයි කාර් මයි පෙට්රල්” උඹලට මොකෝ පැටන් එකේ තියරියකි.
කොයික වුවද ඕපාදූපයට ඉහළ ප්රතිචාරයක් ලැබී ඇත.
හේතුව කුමක්ද?
උසස් යැයි සම්මත මිනිසුන් කා බී ජොලියේ ඉන්නවාට ඇතැමුන්ගේ තිබෙන ඊර්ෂ්යාවද?
නැතිනම්…,
ඕපාදූපයට අවැසි සාක්ෂි සාදයට සහභාගි වූවන්ගේ හැසිරීම් හමුවේ ඔප්පු වන නිසාද?
සත්තකින්ම එය අප නොදනිමු. දන්නේ දෙවියන්ම පමණි.
දමයන්ති රේණුකා ප්රනාන්දු