රට ඇරලා ඒත් කලාකරුවා ගෙදර…
අපිට උදව් කරන්න කවුරුත් නෑ…
“දැන් රාත්රි සමාජ ශාලා පවත්වාගෙන යනව, උත්සව සමයේ රෙදි කඩවල්වල රංචු පිටින් මිනිස්සු රොක්වෙලා බඩු ගන්නව. අද රට විවෘත වෙලා වගේ තත්ත්වයක් තමයි තියෙන්නෙ. නමුත් කලාකරුව ගෙදර. මේ විදිහට කලාකරුවන් ගෙදර තියාගෙන කොරෝනාවලට සිද්ධ වෙන සෙත මොකක්ද කියල තමයි අපිට අහන්න වෙන්නෙ. පැණි බිබී හරි කමක් නෑ මේකට විසඳුමක් තියෙනව නම් අපිට ඒ අවස්ථාව දෙන්න. එල්ලෙන්න වැල් නැතිව අපි බලන් ඉන්නෙ” කවදත් කෙළින් කතා කරන නලින් පෙරේරා පසුගිය දවල්වල කලාකරුවන්ට වෙලා තියෙන අසාධාරණය ගැන මාධ්ය ඉස්සරහ කිව්වෙ මේ විදිහට. ටිකක් දුරදිග ගිය මේ කතාව ගැන නලින් අපිත් එක්ක වැඩි විස්තර කිව්වෙ මේ විදිහට.
පහුගිය දවස්වල මාධ්යවල ලොකු ප්රචාරයක් ලැබුණ ඔබ කරපු කතාවකට?
ඇත්තටම මාධ්යවල ගියේ කලාකරුවන් වන අපිට මේ වෙලාවෙ වෙලා තියෙන දේ ගැන කරපු කතාවක වීඩියෝවක්. මේකට ආරම්භයක් වශයෙන් එතනදි අපි කළේ මංගල උත්සව සඳහා මීට වඩා වැඩි පිරිසකට සහභාගි වෙන්න අවස්ථාවක් දෙන්න ඉල්ලීම.
ඇයි ඔබ තනියම මේ වැඬේට අතගැහුවෙ?
මම තනියෙන් නෙමෙයි මේ වැඬේට මුලපිරුවෙ. මගෙත් එක්ක ලංකාවේ ජනප්රිය සංගීත කණ්ඩායම්වල නායකයන් පිරිසක් මේ සඳහා එකතු වුණා. සනිධප සංගීත කණ්ඩායමේ සංගීත්, සන්ෆලවර් සංගීත කණ්ඩායමේ නීල් වර්ණකුලසූරිය, රජිව් සෙබස්තියන් ඇතුළු විශාල පිරිසක් මේ සඳහා සහභාගි වුණා. නමුත් මෙතනදි අපි පෙනී හිටියෙ ලංකාවෙ සියලුම සංගීත කණ්ඩායම් වෙනුවෙන්.
මංගල උත්සවයක් කියන්නෙ විශාල පිරිසකගෙ දායකත්වයෙන් කරන වැඩක්. ඉතින් ඇයි මේ වැඬේට සංගීත කණ්ඩායම් විතරක් ඉස්සරහට ආවෙ?
ඇත්තටම මේ වැඬේට විවාහ උත්සව සඳහා දායකත්වය ලබාදෙන සියලුම පාර්ශ්වයන් අපිත් එක්ක එකතු වුණා. වෙඩින් ප්ලෑනස්ලා, මල් සැකසුම්කරුවන්, හෝටල්, වෙඩින් හෝල් නියෝජනය කරන පිරිස්, නර්තන කණ්ඩායම් ඒ සියලුදෙනාගේම දායකත්වයෙන් තමයි අපි මේ ඉල්ලීම කළේ.
හැම ක්ෂේත්රයක්ම වගේ අර්බුදයකට මුහුණපාල තියෙන වෙලාවක මෙහෙම ඉල්ලීමක් කරන එක සාධාරණයි කියල හිතනවද?
රට දිහා බැලුවහම අනෙක් හැම දෙයක්ම වගේ සාමාන්ය විදිහට සිද්ධවෙනව. පොදු ප්රවාහන සේවයේ මිනිස්සු ගමන් බිමන් යනව, ෂොපින් ගිහින් පොරකකා බඩු ගන්නව, අනෙත් හැම දෙයක්ම ඒ විදිහටම සිද්ධ වෙනව. මම කියන්නෙ ඊට වැඩිය හොඳට අපිට මේ වැඬේ කරන්න පුළුවන්. අනිත් එක තමයි මෙතන ලොකුම අර්බුදයකට මුහුණදීල තියෙන්නෙ අපි. අපිට උදව් කරන්න කවුරුත් එන්නෙ නැහැ. මේ වෙද්දි අපිට ගොඩක් දේවල් නැතිවෙලා තියෙන්නෙ. ඒ දේවල් ගැන කතා කරල වැඩක් නෑ. දෙසැම්බර් මාසෙ කියන්නෙ අපි ඉතාමත්ම කාර්යබහුල මාසයක්. නමුත් මේ වෙද්දි අපිට වැලේ වැල් නැතිවෙලා තියෙන්නෙ. ඒ හින්දයි මෙහෙම ඉල්ලීමක් කරන්න තීරණය කළේ.
මෙතනදි ප්රසංග සඳහා අවස්ථාවක් ලබාදෙන්න කියල ඉල්ලීමක් කළාද?
නෑ. අපි මූලිකවම මේ ඉල්ලීම කළේ මංගල උත්සව සඳහා අවස්ථාවක් දෙන්න කියල. මොකද රටේ තියෙන තත්ත්වය මුලින්ම අපි තේරුම් ගන්න ඕනෙ. මේ වෙලාවෙ අවම වශයෙන් සෞඛ්ය නිර්දේශ යටතේ කරන්න පුළුවන් දේට ඉඩදෙන්න කියන ඉල්ලීම තමයි අපි එතනදි කළේ. මේ තත්ත්වයත් එක්ක ප්රසංග පවත්වනව කියන එක ඉතාම අපහසු වැඩක්.
මංගල උත්සවයක් වගේ වැඩක් විශාල පිරිසක් එක්ක ඔය කියන සෞඛ්ය නිර්දේශ යටතේ කරන්න පුළුවන් කියල හිතනවද?
මෙච්චර දවස් වෙඩින් එකකට අවසර තිබ්බෙ 50 දෙනෙක්ට විතරයි. එතකොට එහෙම වෙඩින් එකක් කරද්දි කවුරුත් කැමැති නෑ බෑන්ඞ් එකකට වියදම් කරල බෑන්ඞ් එකක් ගහන්න, නැටුම් කණ්ඩායම් ගෙන්වන්න, ඩෙකරේෂන් කරන්න. ඉතින් හැම ක්ෂේත්රයක්ම කඩාවැටිල තිබුණෙ. අපිට වෙන කරන්න දෙයක් නැහැ. අපි පුළුවන් තරම් උත්සාහ කරන්නෙ ඒ සෞඛ්ය උපදෙස් පරිදි පුළුවන් උපරිමයෙන් වැඬේ කරන්න. මම කියන්නෙ නැහැ මේ අවසරය දුන්න ගමන් හැමෝම මේකට හැඩගැහෙයි කියල. ඒ තත්ත්වයට අපි පුරුදු වෙන්න මාසයක් දෙකක් යයි. උත්සවයට සහභාගි වෙන කෙනාගෙ ඉඳල හැම කෙනෙක්ගෙන්ම ලොකු සහයෝගයක් මේ සඳහා අවශ්ය වෙනව.
දේශපාලනමය වශයෙන් සහයෝගයක් මේ සඳහා බලාපොරොත්තු වුණේ නැද්ද?
දේශපාලනඥයන්ටත් ඕනෙ මේ රට නැවත තිබුණු තැනට ගන්න තමයි. නමුත් මේකෙදි වඩා වැදගත් වෙන්නෙ සෞඛ්යමය වශයෙන් ලබාදෙන නිර්දේශ. අපි ජනාධිපතිතුමාට ගිහිල්ල මේ ඉල්ලීම කළත්, එතුමට වැඩ කරන්න වෙන්නෙත් සෞඛ්ය අංශයෙ උපදෙස් මත. ඉතින් ඒ අයගෙ අනුමැතිය ගන්න තමයි අපි මෙතනදි උත්සාහ කරන්නෙ.
ඒ අවසරය ලැබෙයි කියල විශ්වාසයක් තියෙනවද?
අපිට දැන් ලැබිල තියෙන තොරතුරු අනුව ගොඩක් දුරට ලබන සතිය වෙද්දි ඒ අවසරය ලැබෙයි. ඉතින් මේ වෙලාවෙ අපි ස්තුතිවන්ත වෙන්න ඕනෙ ඒ සඳහා වැඩකටයුතු කළ සියලුම සෞඛ්ය අංශවලට.
ඉන්දික වික්රමරත්න
