කවදාහරි මම පාර්ලිමේන්තු යනවා

වේදිකාව හරහා කලා ලෝකයට පැමිණි රවීන්ද්‍ර යසස් කෙටි කාලයක් ඇතුළත ටෙලි නාට්‍ය, චිත්‍රපට යන සෑම අංශයෙන්ම ප්‍රේක්ෂකයන්ගේ ආදරය දිනා ගත් නළුවකු බවට පත් වුණා. පසුව දේශපාලනයට පිවිසි ඔහු කලක් බස්නාහිර පළාත් සභාවේ මන්ත්‍රීවරයකු ලෙසින්ද කටයුතු කළා. කොහොම වුණත් පසුගිය කාලයේදී ඔහුව කලා නිර්මාණ හරහා දැක ගන්න ලැබුණේ නැහැ. ඒ ගැන තොරතුරු දැන ගන්න අපි රවීන්ද්‍ර යසස්ට කතා කළා.
මේ දවස්වල වැඩිය පේන්නේ නැහැ කියලා හැමෝම කියනවා. රවීන්ද්‍ර යසස් කලා කටයුතුවලින් ඉවත් වෙලා කියලත් රාවයක් යනවා. මොකක්ද ඒකේ ඇත්ත නැත්ත?
කොරෝනා හින්දා කලා කටයුතු ඔක්කොම නැවතිලානේ තියෙන්නේ. ඒ හින්දා එහෙම හිතෙන එක සාධාරණයි. හැබැයි කලා කටයුතුවලින් ඉවත් වෙලා නම් නැහැ.
කොරෝනා විතරමද ඒකට එකම හේතුව?
ප්‍රධාන හේතුව නම් කොරෝනා තමයි. මොකද වේදිකා නාට්‍යයක්වත් තවම හරියට පෙන්වගන්න බැහැනේ. මීටරේ දුර තියලා ප්‍රේක්ෂකාගාරය සකසන්න පහසුකම් අපේ රටේ හැම තැනම නැහැනේ. ඒ හින්දා ඒවා ප්‍රායෝගික නැහැ. කොහොමත් කොරෝනා වසංගතයෙන් වැඩියෙන්ම පාඩු වුණේ කලාකාරයන්ට තමයි.
හැබැයි කොරෝනා එන්න කලින් වුණත් රවීන්ද්‍ර යසස් නිතර පේන්න හිටියේ නැහැ නේද?
දේශපාලන කටයුතු එක්ක කාර්යබහුල වීම හින්දා මම කලාවෙන් පොඞ්ඩක් ඈත් වුණා කිව්වත් හරි. මොකද ආසනයේ සංවිධායකවරයා විදියට ජනතාව වෙනුවෙන් මම නිතරම ප්‍රදේශයේ රැඳිලා ඉන්න ඕනෑ. ඒ හින්දා දුර ප්‍රදේශවල ගිහින් දවස් ගණන් නැවතිලා ඉන්න වෙන නිර්මාණ මම බාර ගත්තේ නැහැ. හැබැයි මේ අහල පහල රූගත කිරීම් සිදු කෙරෙන නිර්මාණ එක්ක මම සම්බන්ධ වුණා.
අන්තිමට රඟපෑව චිත්‍රපටය මොකක්ද?
බන්ධනය තමයි අන්තිමට රඟපෑවේ. ඊට කලින් ඵරග ඡරුිසාැබඑ චිත්‍රපටයේ රඟපෑවා. මේ වෙද්දි ඒ දෙකම තිරගත වෙලා අවසන්.
ටෙලි නාට්‍ය ගැන කතා කළොත්?
දැන් කොහොමත් ලංකාවේ වැඩිය ටෙලි නාට්‍ය හැදෙන්නේ නැහැනේ. හැදෙන ඒවත් අඩු ගානෙන් වැඬේ කර ගන්න තමයි බලන්නේ. ගොඩක් වෙලාවට කරන්නේ අලුත් අය කර ගෙන අඩු ගානක් දීලා වැඬේ කර ගන්න එක.
නමුත් ඔබ එක්තරා කාලයක් මෙගා ටෙලි නාට්‍ය එක්කත් සම්බන්ධ වෙලා හිටියා?
ඔව්. ඒ ගොඩක් ඉස්සර. මෙගා පටන් ගත්ත මුල් කාලේ මම නිර්මාණ කිහිපයකට සම්බන්ධ වුණා. නමුත් දැන් ඒ සඳහා කැප කරන්න වෙලාවක් නැහැ.
රවීන්ද්‍ර යසස්ව මුළු රටම හඳුන ගත්තේ කලාව හින්දා. මේ විදියට කලා ලෝකයෙන් ඈත් වෙලා ඉන්න එක ගැන කනගාටුවක් නැද්ද?
මෙහෙමයි. මම කලා ලෝකයෙන් ඈත් වෙලා නැහැ. දේශපාලන කටයුතු එක්ක වෙලාව තියෙන විදියට පුළුවන් ඒවට මම සම්බන්ධ වෙනවා. කලින් කිව්ව වගේ වර්තමානයේදී ලංකාවේ කලා නිර්මාණ ඉතාම අවම මට්ටමෙන් තමයි කෙරෙන්නේ.
අපි ඔබේ දේශපාලන ජීවිතය ගැන කතා කරමු. ඇත්තටම ඇයි ඔබ කලාවෙන් දේශපාලනයට පිවිසුණේ?
ජනතාව වෙනුවෙන් සේවය කරන එක තමයි ප්‍රධානම අරමුණ. අපි දේශපාලනයට ආවේ අපේ බඩගෝස්තරය රැකගන්න නෙවෙයි. ජනතාව රැකගන්න. ඒක පැහැදිලිවම කියන්න ඕනෑ.
පසුගිය පාර්ලිමේන්තු මැතිවරණයෙන් පරාජයට පත් වුණු ප්‍රබල දේශපාලනඥයන් කිහිප දෙනකුම දේශපාලනයෙන් සමුගන්නා ආකාරය අපි දැක්කා. ඒ ගැන ඔබේ අදහස මොකක්ද?
දේශපාලනයෙන් සමුගන්න නම් මගේ කිසිම අදහසක් නැහැ. ජනතාව වෙනුවෙන් දිගටම දේශපාලනයේ නිරත වෙන එක තමයි මගේ බලාපොරොත්තුව.
මේ විදියට ගිහින් කවද හරි පාර්ලිමේන්තුව නියෝජනය කරන්න පුළුවන් වේවි කියලා විශ්වාසයක් ඔබට තියෙනවද?
ඔව්. හැබැයි දැන්ම නෙවෙයි. ඒකට තව කාලයක් යයි. ජනතාව එක්ක දිගින් දිගටම ඉඳලා ඒ අය නියෝජනය කිරීම සඳහා පාර්ලිමේන්තු යෑමේ අදහසක් මට තියෙනවා.
චන්දන පොන්නම්පෙරුම