⬤ අපි හරියට ඉන්නවා නම් ප්රශ්න මුකුත් නෑ…
වෙනස් තේමාවක් හරහා නිර්මාණය වුණු අග්නි පියාපත් ටෙලිනාට්ය මේ දවස්වල බොහෝ දෙනාගේ කතාබහට ලක් වෙලා තියෙනවා. ඒ වගේම එහි සරෝජිනී ගැනත් හැමෝම කතා කරනවා. සරෝජිනීට හිමිවෙලා තියෙන ආකර්ෂණය හින්දම අපි ඇයව හොයා ගෙන යන්න හිතුවා. සරෝජිනී විදියට අග්නි පියාපත් එක්ක සම්බන්ධ වෙන චන්දිමා කරුණාදාස අපි එක්ක කතාබහට එකතු වුණේ මෙහෙමයි.
🔴 අපි එහෙනම් අග්නි පියාපත්වලින්ම කතාබහ පටන් ගමු?
මේ දවස්වලත් අග්නි පියාපත් රූගත කිරීම්වලට සම්බන්ධ වෙලා තමයි ඉන්නේ. රටේ පවතින තත්ත්වය එක්ක බොහොම සෞඛ්යාරක්ෂිතව අපි ඒ කටයුතු කර ගෙන යනවා.
🔴 කොහොමද සරෝජිනීට ලැබෙන ප්රතිචාර?
ප්රතිචාර නම් ඉතාම හොඳයි. ඒ වගේම චරිතයේ ස්වභාවය හින්දා බැනුම් අහන්න වෙන අවස්ථාත් තියෙනවා. මං හිතන්නේ මගේ රංගන පරාසයට සරෝජිනී වගේ කටකාර චරිත ගැළපෙනවා ඇති. ඒක මේ තරම් කැපී පේන්නෙත් ඒ හින්දා වෙන්න ඇති. ඒ වගේම ඒ චරිතය ඒ තරම් සාර්ථක වෙන්න ටෙලිනාට්ය කණ්ඩායමෙන් ලැබෙන සහයෝගයත් මෙහිදී මතක් කරන්න ඕනෑ.
🔴 අග්නි පියාපත්වලට අමතරව චන්දිමා මේ දවස්වල සම්බන්ධ වෙලා ඉන්න වෙනත් නිර්මාණ ගැන කතා කළොත්?
මම රංගනයෙන් දායක වුණු මහ පොළොව ටෙලිනාට්ය මේ දවස්වල තිරගත වෙනවා. එහි රූගත කිරීම් ඉවරයි. ඊට අමතරව තවත් ටෙලිනාට්ය දෙකක් සඳහා දැනට ආරාධනා ලැබිලා තියෙනවා.
🔴 අපි දන්න විදියට ඔබ වෘත්තීය රංගන ශිල්පිනියක් නෙවෙයි. කොහොමද රැකියාව කරන ගමන් රංගනයටත් කාලය වෙන් කර ගන්නේ?
ඔව්. මම රජයේ රැකියාවක් කරන ගමන් තමයි රංගනයේ නිරත වෙන්නේ. ඒ හින්දා ලැබෙන හැමදේම බාර ගන්න මට බැහැ. ඒ හින්දා එක සැරේට නිර්මාණ දෙකකට වැඩිය මම සම්බන්ධ වෙන්නේ නැහැ. එහෙම වුණාම කාලය කළමනාකරණය කර ගන්න ලේසියි. දැන් මම විවාහකයි. ඒ හින්දා රැකියාව විතරක් නෙවෙයි පෞද්ගලික ජීවිතය ගැනත් හිතන්න ඕනෑ. ඒ හැම දෙයක්ම මැනේජ් කර ගෙන තමයි රඟපාන්නේ. ඒ සඳහා කාර්යාලයෙන් ලැබෙන සහයෝගයත් අගය කරන්න ඕනෑ.
🔴 හරි අපි එහෙනම් පොඩ්ඩක් අතීතයට යමු. චන්දිමා කොහොමද කලාවට සම්බන්ධ වුණේ?
කැලණිය විශ්වවිද්යාලයේ උපාධිය හදාරන කාලෙදි තමයි මම කලාවට සම්බන්ධ වුණේ. මම එහිදී ශ්රාස්ත්රපති සහ ශ්රාස්ත්රවේදී උපාධි දෙකම හැදෑරුවා. එහි අවසන් වසරේදි අපිට සෑහෙන්න වේදිකා නාට්ය ප්රමාණයක් එක්ක සම්බන්ධ වෙන්න අවස්ථාව ලැබුණා.
🔴 ඒ මොනවද කියල නම් වශයෙන් මතක් කළොත්?
නියඟලා ප්රේමය, මකරා වගේ ගොඩක් වේදිකානාට්ය ඒ අතරේ තිබුණා. ප්රියංකර රත්නායක සර් යටතේ තමයි අපි ඒවට සම්බන්ධ වුණේ. ඊට පස්සේ මම කාලයක් වෙළෙඳ දැන්වීම්වලට සම්බන්ධ වෙලා හිටියා. ඊටත් කාලයකට පස්සේ තමයි ටෙලිනාට්ය එක්ක සම්බන්ධ වුණේ.
🔴 ඒ ගැන තව ටිකක් විස්තර මතක් කරමු නේද?
පූජන දන්දෙනිය හරහා තමයි මට ඒ අවස්ථාව ලැබුණේ. පූජන මගේ පාසල් යාළුවෙක්. “භව හරණ” තමයි මගේ මුල්ම ටෙලිනාට්ය. ඊට පස්සේ නේත්රා, සුළඟ මහ මෙරක්, නෙතු අද්දර වගේ ටෙලිනාට්ය රැසකට සම්බන්ධ වෙන්න අවස්ථාව ලැබුණා. ඒ වගේම අවසන් හුස්ම තෙක් ටෙලිනාට්යයේ ප්රධාන චරිතය රඟපාන්නත් මට අවස්ථාව ලැබුණා.
🔴 සිනමාව කියන්නේ ඕනෑම රංගන ශිල්පිනියකගේ සිහිනයක්. ඔබට තවම ඒ අවස්ථාව ලැබුණේ නැද්ද?
තවම නැහැ. මට තවම එහෙම ආරාධනයක් ලැබිලා නැහැ. හොඳ නිර්මාණයක, දෙයක් කරන්න පුළුවන් හොඳ චරිතයක් මට ලැබුණොත් මම ඒක බාර ගන්න සූදානම්.
🔴 විවිධාකාරයේ කටකතා හැදෙන එක මේ වෙද්දි සුලබයි. විශේෂයෙන් ඔබ වගේ රජයේ රැකියාවක් කරන කෙනකුට එහෙම දෙයක් වුණොත් ඒක වැඩිපුර බලපානවා. ඒවයින් පරිස්සම් වෙලා කලාව එක්ක දිගටම ඉන්න පුළුවන්ද?
රැකියාවක් කළත් නැතත්, කටකතාවක් කියන්නේ කාන්තාවකට හොඳ දෙයක් නෙවෙයි. හැබැයි එක එක අයට ඕනෑ දෙයක් කියන්න පුළුවන්. ඒත් ඒ කියන දේට පදනමක් නෑ කියලා තමන් දන්නවා නම් ඒ හොඳටම ඇති. අපට මිනිස්සු හදන්න බැහැනේ. මං හිතන්නේ අපි හරියට ඉන්නවා නම් ඒ කිසි දෙයක් ප්රශ්නයක් වෙන්නේ නැහැ. කලාවට විතරක් නෙවෙයි හැමදේටම ඒක අදාළයි.
චන්දන පොන්නම්පෙරුම