ඕෂධී වියත්මඟට නැගේගේ නිළිකම උකසට තියලද

ඕෂධී හේවා මද්දුම, ටෙලි තිරය ඔපවත් කළ අංක එකේ දක්‍ෂ නිළියකි. වැදගත් කාන්තා ප්‍රතිරූපයක් තුළ සිය දිවි රටාව ගෙන ගිය ඕෂධී, සොඳුරු පසන් නිවෙසක හිමිකාරියද වූවාය.
හැබැයි..,
මේ මොහොතේ අප දොඩන්නට අරඅඳින්නේ, ඕෂධී හේවා මද්දුමගේ ලස්සන පවුල් ජීවිතය ගැන හෝ රංගන ජීවිතය ගැන නම් නෙවෙයි. ක්‍රියාකාරී දේශපාලනයට නැඹුරුව සිටින ඕෂධීගෙන්, යම් ඕපාදූපයක් ගැන වංහුං දැනගැනීමට අපට ඕනෑ විය. වඩා සරලව, පැහැදිලිව කියනවා නම්, ‘වියත්මග සංකල්පයෙහි’ ලැයිස්තුගතව සිටි ඕෂධීව හිටි හැටියේම එයින් කපා දමා තිබෙන ආරංචියෙහි සුලමුල සමඟ සත්‍ය තොරතුරු අනාවරණය කරගැනීමට අපට අවැසිව තිබිණි. බොහෝ කාර්යබහුලව සිටියද ඉතාම සුහදව ඈ අප හා එක්වූවාය.
ඉතින් ඕෂධී, වැඩ කප්පරකට මැදිවෙලයි ඉන්නේ, එහෙම නේද?
අනේ ඔව්.., එළිවෙනවා, රෑ වෙනවා දන්නෙත් නැති තරමයි.
ඔබේ මෙහෙවර රාජපක්‍ෂ රජය වෙනුවෙනුයි?
ඔව්… තිස්වසරක් පුරා ඇදුණු යුද ශාපය රටෙන් තුරන්කර දැමීමේ මෙහෙවර වෙනුවෙන් මම එදා සිටම රාජපක්‍ෂ මහත්වරුන්ට සහාය දෙනවා. බදුල්ල ප්‍රදේශයෙන් පොහොට්ටුව සමඟින් තරග වදින එකම කාන්තා නියෝජනය මමයි. ඒ වගේම බදුල්ල ප්‍රදේශයෙන් අවුරුදු විසිඑකක් වැනි දීර්ඝ කාලයකට පසුව පැමිණි පළමු කාන්තා නියෝජනයද මමයි.
ඔබ දේශපාලන වේදිකාවට නැග්ගේ නිළිකම හේතුපාඨ කරගෙන නෙවෙයි?
කවදාවත් මම නිළියක ලෙසින් මගේ ජනප්‍රියත්වය දේශපාලනය සඳහා පාවිච්චියට ගත්තේ නැහැ. රාජපක්‍ෂ රජය යුද්ධයට මුහුණ දෙන සමයේදී මම උතුරට පවා ගියා. යාපනය, නාගර්කෝවිල්, කිලාලි යන ප්‍රදේශවලදී මම යුද්ධය සමඟ දවස් ගෙව්වේ ඉදිරි ආරක්‍ෂක වළල්ලේ සිටයි.
යහපාලනය හමුවේ රාජපක්‍ෂ ආණ්ඩුව පරාජය වෙද්දිත් ඔබ ඔවුන් සමඟ හිටියලු?
ඔව්.., එවකට නුගේගොඩ නගරයේ පැවැත්වුණු ‘මහින්ද සුළඟ’ වේදිකාවට බදුල්ල දිස්ත්‍රික්කයෙන් නැඟපු අපේක්‍ෂකයන් දොළොස් දෙනා අතර පළමුවැනියා වූයේ මමයි. තම තමන්ගේ සංවිධායක ධුර හෝ තනතුරු නැතිව යතැයි බයෙන් බොහෝ දෙනකු පය තබන්නට මැළිවුණු ඒ වේදිකාවට මම පය තිබ්බේ දැඩි ආත්මශක්තියකින්.
එවකට ඔබ ‘වියත්මග’ සංකල්ප ලැයිස්තුවෙහි ප්‍රධාන සාමාජිකාවකද වුණා?
‘වියත්මග’ සංකල්පයෙහි පළමු කණ්ඩායම තුළ මගේ නම තැබුවේ නාලක ගොඩහේවා මහතායි. ගෝඨාභය රාජපක්‍ෂ මැතිතුමාගේ ප්‍රධානත්වයෙන් එය සංවිධානය කොට ආරම්භ කළේද නාලක ගොඩහේවා මහතාම තමයි.
හිටිඅඩියේ ඔබව ‘වියත්මග’ ලැයිස්තුවෙන් කපා දැමුණේ ඇයි?
එවැන්නක් සිදුවූයේ නැහැ. තවමත් මම ‘වියත්මග’ සංකල්පයෙහි සාමාජිකාවක්.
‘වියත්මග’ ලැයිස්තුව තුළ ඔබේ නම නැති බවයි ආරංචිය?
දේශපාලනය කියන්නේ මඩ ප්‍රචාර සමඟම ගමන් කරන ඉසව්වක්. මට නාම යෝජනා ලැබෙන්නේ නැති බවටද ලොකු මඩ ප්‍රචාරයක් දියත් වුණා. නමුත් මට නාම යෝජනා ලැබුණා. එය එලෙස සිදුවූයේ මම හැමදාමත් ඉතා හිතෛෂීව, නොසැලී පොහොට්ටුව සමඟ අත්වැල් බැඳ සිටි නිසයි.
එතරම් හිතෛෂීව සිටි ඔබව ‘වියත්මගෙන්’ කපා දැමුවා?
ඔබ ඔය කියන කපා දැමීම ගැන මම කිසිවක් දන්නේ නැහැ. මට ඕවා හොයන්න වේලාවක් නැති තරමට මම කාර්යබහුලයි. ඒ වගේම මම දන්නේ එක දෙයයි. ඒ, මම තවමත් ‘වියත්මගෙහි’ සාමාජිකාවක්.
ඔබ නොදන්නවට හැමෝම දන්නවා, ලැයිස්තුවේ ඔබේ නම නැති බව?
මෙතැන තිබෙන්නේ වැරැදි වටහා ගැනීමක්. ‘වියත්මග’ ලැයිස්තුවේ නම තිබීම මත එහි සාමාජිකත්වය තිබෙනවාය කියන්නටවත්, ලැයිස්තුවේ නම නොතිබීම මත එහි සාමාජිකත්වය අහෝසි යැයි කියන්නටවත් බැහැ. යම් සංවිධානයක නම රැඳෙන්නේ එහි ක්‍රියාකාරීත්වයට සහ දායකත්වයට උරදීම මතයි. ඕෂධී හේවාමද්දුම යන මමද ‘වියත්මග’ වෙනුවෙන් එම සහයෝගය දෙනවා. ඒ වගේම ලැයිස්තුවේ නම නොතිබෙන තවත් බොහොමයක් ක්‍රියාකාරී සාමාජිකයන් පොහොට්ටුවේ ජයග්‍රහණය වෙනුවෙන් මැතිවරණ කටයුතු තුළ නියැළී සිටිනවා.
අලුත් සාමාජිකත්වයක් හරහා ‘වියත්මග’ ලැයිස්තුව සැකසෙන බවට ආරංචි ලැබුණා?
ඔව්.., දැන් දැන් ‘වියත්මග’ට බොහොමයක් පිරිස පෙළගැහෙනවා. ඒ පිරිස අතර සිටින බොහෝදෙනකු ඒ දවස්වල දකින්නවත් සිටියේ නැහැ. ශක්තිමත් රැල්ලක් ලෙස එය ජනප්‍රියත්වයට පත්ව එන විට තමයි කෙමෙන් කෙමෙන් ‘වියත්මගෙහි’ හිස්තැන්, අතුරු-සිදුරු නැතිව පිරී යන්නට පටන් ගෙන තිබෙන්නේ.
පිරී යන ඒ හිස්තැන් නිසා ඔබේ නම කැපුණා වෙන්නට බැරිද?
මම එහෙම හිතන්නේ නැහැ. අනෙක නිළිකම උකස් නොකොට රැල්ලකට හසුනොවී, අත්දැකීම් සහ යම් දැක්මක් මත දේශපාලනයට පැමිණි මට ජනතාවට හෝ රටට සේවය කිරීමට ‘වියත්මග’ ලැයිස්තුවේ ඉන්නට අවශ්‍ය නැහැ. ඇත්තටම මගේ නම එහි තිබෙනවාද? නැතිද? කියා එදා නම දැම්මාට පසු මම හොයලා බලලාවත් නැහැ. නාම යෝජනා ලබාගෙන පාර්ලිමේන්තුවට තරග කිරීම සඳහා සුදුසුකම් ලබා ගැනීමට මා ලද පන්නරය, මිල කළ නොහැකි බව මා වටා සිටින හැමෝම දන්නවා. එය ඇඟිල්ලෙන් ඇන කිසිවකුට පෙන්විය යුතු නැහැ. එලෙසම ලැයිස්තුවක නම තිබූ හෝ නොතිබූ පමණින් එම පන්නරයට හානි සිදුවන්නේද නැහැ.
දමයන්ති රේණුකා ප්‍රනාන්දු