මේ දවස්වල හතර වටෙන්ම අපට ඇහෙන්නේ සුබදායක ආරංචි නෙවෙයි. ඒ අතරේ කලා ලෝකයට ආදරය කරන හැමෝගෙම හිතට කඳුළක් එකතු කෙරුව කනගාටුදායක ආරංචියකුත් පසුගිය දවසක දැන ගන්න ලැබුණා. ඩබ්. ඩී. ආරියසිංහ නැමැති ප්රවීණ කලාකරුවා අප අතරින් වියෝ වූ බව තමයි ඒ කනගාටුදායක ආරංචිය. මියයන විට ඒ මහතා පසු වුණේ 64 වැනි වියේ.
ශ්රී ලංකාවෙන් බිහි වූ මහා ගාන්ධර්වයා විදියට සැලකෙන පණ්ඩිත් අමරදේවයන්ගේ කටහඬට සමාන හඬක් ඇති ගායන ශිල්පියෙක් විදියට තමයි බොහෝ දෙනා ඩබ්. ඩී. ආරියසිංහයන්ව දැන හඳුනා ගත්තේ. ලංකාවේ අමරදේවයන් හා සම කළ හැකි හඬක් හිමි වුණු එකම ගායන ශිල්පියාත් ඩබ්. ඩී. ආරියසිංහයන් පමණයි.
ප්රේමසිරි කේමදාසයන් යටතේ සංගීතය හදාරමින් කේමදාසයන්ගේ සංගීත සංධවනි රැසකට ගායනයෙන් දායක වූ ආරියසිංහයන්, සන්ෆ්ලවර් සංගීත කණ්ඩායම සමඟ කැසට් පටයක් එළි දැක්වීම ඒ කාලේ දැඩි ආන්දෝලනයක් ඇති කරන්න සමත් වුණා. නව පරපුර ආරියසිංහයන්ට ආදරය කරන්න පටන් ගත්තේ එතැනින් පස්සේ කියලා කිව්වත් ඒකේ වැරැද්දක් නැහැ.
දශක කිහිපයක් පුරා ලංකාවේ කලා කෙත පෝෂණය කරන්න තම දායකත්වය සැපිරුවත් ආරියසිංහයන් ගත කළේ ඉතාම නිහඬ දිවියක්. ඔහු ගායනා කළ ගීත අතරින් ජනප්රියත්වයට පත් වුණේ ගීත කිහිපයක් පමණක් වුණත්, ඔහු ගායනා කළ ගීත ප්රමාණය ඉතා විශාලයි. ඒ අතරේ ඉතාම ලස්සන ගීත කිහිපයක්ම තියෙනවා. කොහොම වුණත් ඒ නිහඬ කලාකරුවාගේ හඬ දැන් සදහටම නිහඬ වෙලා. නමුත් තව කාලාන්තරයක් යන තුරු ඒ සොඳුරු ගීතාවලිය අපේ හදවත් සනසාවි. ඒ වගේම ඩබ්. ඩී. ආරියසිංහයන්ගේ ගීතාවලිය තුළ ඇති ජනප්රිය නොවුණු ගීත නැවත ප්රචාරය කරන්න ගුවන් විදුලි සේවා හෝ මැදිහත් වෙනවා නම් ඒක ඒ මහතාට කරන ගෞරවයක් වනවා නොඅනුමානයි. මව්රට හාට් පාඨකයන් වෙනුවෙන් ඒ සොඳුරු කලාකරුවාට අපි නිවන් සුව ප්රාර්ථනා කරමු.
චන්දන පොන්නම්පෙරුම
