යහන්ගල, ගලේ බණ්ඩාර දෙවියන් සමග රාවණා රජ්ජුරුවෝ, මීමුරේ කියන ගමත්, ලකේගල කියන කන්දත් ඔබ අහලා ඇතිවාට සැකයක් නැහැ. මේ දෙකම පිහිටලා තියෙන්නේ නකල්ස් කියන රක්ෂිත වනාන්තරය ඇතුළේ. හෙක්ටයාර 22,000කටත් වඩා වැඩි වපසරියක විහිදෙන නකල්ස් වනාන්තරයේ දුම්බර මිටියාවත කියන්නේ ලංකාවේ ලස්සනම තැනක්. ඉස්සෙල්ලා කිව්වා වගේ මීමුරේට අමතරව නකල්ස්වල තියෙන ලස්සනම ගම්මාන තමයි රඹුක්කොළුව, පන්විල, බඹරැල්ල, හුළුගල, රණමුරේ, ඇටන්වල, උඩුගල් දෙබොක්ක, කරඹකැටිය, කළුගල හා ලුණුවත්ත කියන්නේ.Sri Lanka Latest News
නකල්ස් කියන්නේ කඳු තරණය කරන්න, දියඇලි ගුහා සොයාගෙන යන්න, පතන හා තැනිතලා බිම් ගවේෂණය කරන්න කියාපු තැනක්. කඳු නැගලා කෑම්පින්වලට වගේම දිගුදුර දුෂ්කර වනාන්තර චාරිකා සඳහාත් මසුරං. නකල්ස්වල කඳු හතළිස් ගණනක් තියෙනවා. දියඇලිත් 50කට වැඩි මිසක් අඩු නැහැ. නකල්ස්වල ප්රසිද්ධම ගුහාවක් තමයි අළුගල්ලෙන, කපුඅටුව ලෙන, ලකේගල ගුහාව, දූවිලි ඇල්ල ගුහාව, වෙඩිලුණු ගුහාව සහ රහස් ගේ ගුහාව.
ලකේගල ගුහාව තියෙන්නේ වෙලන්ගොල්ල පතනේ. පතන බිම් ගැන කිව්වොත් නකල්ස් වන බිමේ පතන බිම් රැසයි. පිටවල පතන ගොඩක් ප්රසිද්ධයි. ඊට අමතරව ගෝන පතන, කොමල පතන, අප්පල පතන වගේ පතන බිම් ගොඩයි. අපි කියන්න යන්නේ ඔය ඔක්කොටම වඩා අමාරු තැනක් ගැන. ඒ තමයි යහන්ගල.
මොකක්ද යහන්ගලේ ඇති ඵලය? ගලේබණ්ඩාර දෙවියන් වැඩසිටිය කන්ද විදිහට ජනප්රවාදයේ එන යහන්ගල රාවණ රජ්ජුරුවන්ගේ දේහය තැන්පත් කරපු කන්ද විදිහට බොහොම ජනප්රියයි. වෙලන්ගොල්ල පතන මීටර් 1,100ක් උසයි. යහන්ගල පිහිටා තිබෙන්නේ වෙලන්ගොල්ල පතන තුළමයි. ඒ කියන්නේ යහන්ගල කියන්නේ කන්දක් උඩ කන්දක්.
යහන්ගලට යන පාර මෙහෙමයි. මුලින්ම නුවර මහියංගන පාරේ උඩුදුම්බරට එන්න ඕනෙ. එතැනින් කඩගල පාර කෙළවරට ආපුවාම කැලය පටන් ගන්නවා. උඩක්කාව, උඩත්තාව කියන පැත්තට තමයි මේ වනගත මග දිවෙන්නේ. ටික දුරක් යද්දී මේ පාර අඩි හතරක පාරකට වැටෙනවා. වෙලන්ගොල්ල පතන හරියේ වනාලි ගැවසෙනවා කියලා කතාවක් තියෙනවා. පාර දෙපැත්තේ තියෙන්නේ කටු සහිත ශාක හා පඳුරු. වෙලන්ගොල්ල පතන උඩට එද්දී වන අලි සහ කටු පඳුරු තමයි ප්රධාන බාධක වෙන්නේ.
වෙලන්ගොල්ල පතන උඩ එක යායට තියෙන්නේ මාන පඳුරු. පයිනස් ගස් කීපයකුත් තිබුණා කියලා පතනේ ස්වභාවයට කිසිම හානියක් වෙලා නැහැ. වෙලන්ගොල්ල පතන උඩ තියෙන යහන්ගලේ වම් පාදම බලාගන්න ඕනෙ නම් වෙලන්ගොල්ල පතනට නැගලා වම් පැත්තට පොළොවට සමාන්තරව ඇවිදගෙන යන්න ඕනෙ. මාන පඳුරු යාය කිලෝමීටර් දෙකකට වඩා විහිදිලා තියෙනවා වගේම සමහර තැන්වල මාන පඳුරු අඩි අටකටත් වඩා උසට වැවිලා තියෙනවා.
දකුණු පැත්තට ගියොත් ඉහළට යන පාරක් තියෙනවා. මේ පැත්ත ටිකක් වැඩිපුර අවදානම්, මොකද වම් පැත්තට තියෙන්නේ මහා හෙලක්. යහන්ගල උඩට නැග්ගාම ගල උඩ අහසට විවෘත වෙලා තියෙන කොටස විතරක් අක්කර දෙක තුනක් විතර විශාලයි. කිසිම ජල උල්පතක් හෝ හරිහමන් ගහක් කොළක් නැතුවට යහන්ගල පර්වතය තැනින් තැන කැඩිලා පුපුරලා වගේ තියෙන්නේ නිතරම අකුණු වදින නිසාලු.
යහන්ගල උඩට නැග්ගාම වැඩිපුර ලස්සනට පේන්නේ ගල උඩ ප්රදේශය විතරක් නෙමෙයි. මීමුරේ, ලකේගල, ගැරඬිගල වගේම දුම්බානාගල කන්ද, මැදමහනුවර කන්ද වගේ කඳුත් හරි ලස්සන සිතුවමක් වගේ ඇස් අද්දර මැවෙනවා. දෙපැත්තෙන් පේන ගම්මානවල නම් තමයි උඩුගල් දෙබොක්ක සහ උඩත්තාව. කෙහෙල්පොත්දෙරුවෙ ගල තමයි යහන්ගලේ ලස්සනම අසල්වැසියා. ජල තලය ගැන කතා කළොත් කිලෝමීටර් ගණනාවක් රේඛාවක් වගේ ඇදී යන මහවැලි ගංගා කොමලිය, මහියංගනේ ඉඳන් දෙහිඅත්තකණ්ඩියට ගමන් කරන ලතාව යහන්ගලට හරි ලස්සන දසුනක්. සොරබොර වැවයි, රත්කිඳ උල්හිටිය ජලාශයයි මහවැලි ගඟට දෙපැත්තෙන් තනි රකිනවා.
යහන්ගලින් පහළට බහිද්දි නම් මීටර් තුනක් විතර උස සිසිල් ජල ධාරා දියඇල්ලක් බලාගන්න පුළුවන්. මාන පඳුරුවලින් වැහිලා තියෙන නිසා හොයාගන්න නම් ටිකක් අමාරු වෙයි. කඳවුරු බඳින්න යනවා නම් රෑට වන අලින්ගෙන් ආරක්ෂා වෙන්න ගිනිමැළ එහෙම ගහගෙන ඉන්න එක නුවණට හුරුයි. රෑ වෙද්දී මීදුම් සළුවලින් නැගෙන සීතල නිසා යහන්ගල රෑ ගතකරන්න යද්දී ඒ ගැනත් සැලකිලිමත් වෙන්න ඕනෙ. වල් ඌරා වගේ සතුන් නිතර ගැවසෙන නිසා රෑට නම් ගොඩක් පරිස්සම් වෙන්න ඕනෙ. යහන්ගල රෑටත් වඩා ලස්සන යහන්ගලේ උදයයි. උදා හිරු කිරණින් නැවුම් මීදුම් සේල ඔතාගත් කඳු ලඳුන් බලන්න ඔබත් යන්න. ලස්සන විතරක්ම නෙමෙයි ඓතිහාසික වටිනාකම ගැන හිතුවත් යහන්ගල යන එක පලක් ඇති වැඩක්.
රාම-රාවණා යුද්ධය තිබුණාය කියන්නේ ලකේගල කිට්ටුව. ඒ කියන්නේ ‘රහස් ගේ’ කියන ප්රදේශයටත් කිට්ටුව. ඉතින් රාවණ රජ්ජුරුවන්ගේ දේහය යහන්ගල තිබුණා කියන එකත් බැහැර කරන්න බැරි තර්කයක්.
යහන්ගල කියන්නේම නිදන ඇඳක් වගේ ඈතට පැහැදිලිව පේන කන්දක් නිසාත්, රාවණ රජ්ජුරුවෝ සිහි මූර්ඡා වෙලා තැන්පත් කරපු ශරීරය තිබ්බයි කියන නිසා වගේම, ගලේබණ්ඩාර දෙවියන්ගේ අඩවිය යහන්ගල ආශ්රිතව තියෙනවා කියන එකත් නිසා යහන්ගල ජනප්රවාදගත ඉතිහාසය සොයායෑමත් ඔබ කැමති වේවි. උඩත්තාව ගමට යුද ආධාර ලබාදීලා ගොවිතැන සශ්රීක කරන්න උදව් කරපු ගලේ බණ්ඩාර දෙවියෝ යහන්ගලදී ඔබටත් නිසැකවම උදව් කරාවි.
