බණ්ඩාරවෙල බිඳුණුවැව ප්රදේශයේ සුසාන භූමියක මිහිදන් කරන ලද තරුණියකගේ මළ සිරුරක් නැවත ගොඩදමා තිබියදී ඊයේ (07) දින හමුවූ බව බණ්ඩාරවෙල මූලස්ථාන පොලිසිය පවසයි.Sri Lanka Latest News
බදුලුගස්තැන්න ප්රදේශයේ පදිංචිව සිටි ආර්. එම්. රශ්මිකා නදීශානි නැමැති 25 හැවිරිදි තරුණිය නිව්මෝනියා රොගය වැලඳීමෙන් පසු මියගොස් ඇති අතර ඇයගේ දේහය පසුගිය 4 දින බදුලුගස්තැන්න පොදු සුසානභූමියේ මිහිදන් කර ඇත.
එම තරුණිය මිහිදන් කර තිබූ සුසානභූමිය අසලින් ඇයගේ පවුලේ අයෙකු ඊයේ (7) දහවල් ගමන් කරන අවස්ථාවේ දී ඇයගේ දේහය ගොඩ දමා තිබෙනු දැක ඒ පිළිබඳව පොලිසියට දැනුම්දීමක් කළ බව පොලිසිය පැවසීය.
ඒ අනුව අදාළ ස්ථානය වෙත පැමිණි පොලිස් කණ්ඩායමක් විසින් සිදුකළ පරීක්ෂාවේදී මෙම මියගිය තරුණිය මිහිදන් කර තිබූ වළ සවලක් ආධාරයෙන් හාරා මිනී පෙට්ට්යේ උඩ පියන ඇර ඒ තුළ තිබු මෘතදේහය ගොඩට ගෙන පැත්තක තබා ඇති අයුරු නිරීක්ෂණය වු බවත් ඒ වෙනවිට මළ සිරුර නිරුවත්ව තිබූ බවද පොලිසිය පවසන ලදි.
බණ්ඩාරවෙල ජ්යෙෂ්ඨ පොලිස් අධිකාරි ප්රදීප් කලුපහන මහතාගේ උපදෙස් මත බණ්ඩාරවෙල මහේස්ත්රාත් අධිකරණය වෙත කරුණු වාර්තා කර ඉදිරි විමර්ශන සිදුකිරීමට අවශ්ය පියවර ගත් බව වැඩබලන මූලස්ථාන පොලිසිය කියයි.
