විනය හේතුවක් මත ස්ථාන මාරු කරන ලද පොලිස් සැරයන්වරයකු විසින් එම ස්ථාන මාරු වීම අවංගු කරන ලෙස ඉල්ලා පැමිණ තමාට මරණීය තර්ජනය කළ බව අනුරාධපුර කොට්ඨාසය භාර ජ්යෙෂ්ඨ පොලිස් අධිකාරී කේ.ජේ. පුෂ්පකුමාර මහතා අනුරාධපුර පොලිස් ස්ථානයට පෙරේදා (15) පැමිණිල්ලක් කර තිබේ. Sri Lanka Latest News
අනුරාධපුර හුරීගස්වැව පොලිස් ස්ථානයට අනුයුක්තව සේවයේ නිරතව සිටින දිසානායක නමැති සැරයන්වරයාද කොට්ඨාසය භාර ජ්යෙෂ්ඨ පොලිස් අධිකාරිවරයා තමාට බැණ තර්ජනය කළ බවත්, එහිදී තමාද පෙරළා ඔහුට බැණ වැදුණු බවත් සඳහන් කරමින් අනුරාධපුර පොලිසියට පැමිණිලක් කර ඇත.
මේ සිදුවීම වී ඇත්තේ පසුගිය 12 දාය. පොලිස් සැරයන්වරයා පොලිස් ස්ථානයේ සේවයේ නිරතව සිටින කාන්තා නිලධාරිනියක සමඟ සමීප සම්බන්ධයක් පවත්වන බවට ජ්යෙෂ්ඨ පොලිස් අධිකාරිවරයාට ලැබී තිබුණු වාර්තාවක් පදනම් කරගෙන හුරීගස්වැව පොලිස් ස්ථානයේ සිට මේ නිලධාරියා විලච්චිය පොලිස් ස්ථානයට මාරු කර යවා ඇත. මේ නිලධාරියාට ස්ථාන මාරුවීම දී ඇත්තේ සේවා අවශ්යතා මත යැයි කියාය. ඔහු මේ ගැන විමසීමට පොලිස් අධිකාරි කාර්යාලය වෙත පැමිණ ඇත්තේ සිය බිරිය සමඟිනි. එහිදී පැය ගානක් ඔවුන් දෙදෙනා රස්තියාදු කරමින් ජ්යෙෂ්ඨ පොලිස් අධිකාරිවරයා මුණගැසීමට අවස්ථාවක් දී නැත. ඔහු ජ්යෙෂ්ඨ පොලිස් අධිකාරිවරයාව මුණගැසීමට ඔහුගේ පෞද්ගලික සහකාර පොලිස් නිලධාරියාට පවසා ඇතත් එම නිලධාරියා පවසා ඇත්තේ මෙම ස්ථානමාරු වීම කිසි සේත් අවලංගු නොකරන බවයි. අවසානයේදී පොලිස් අධිකාරි කාර්යාලයේ සේවයේ නිරත ප්රධාන පොලිස් පරීක්ෂිකාවකගේ මැදිහත් වීමක් මත පැය 5කට පමණ පසු සැරයන්වරයාට පොලිස් අධිකාරිවරයා මුණගැසීමට අවස්ථාව ලැබී ඇත.
එහිදී මේ සැරයන්වරයා පොලිස් අධිකාරිවරයාට පවසා ඇත්තේ අදාළ නිලධාරිනිය සමඟ තමාගේ අනියම් සම්බන්ධයක් නැති බවත්, ඇය තම ඥාතිවරියක බවත්ය. ඒ බව පොලිස් නිලධාරියාගේ බිරිය පවා පොලිස් අධිකාරිවරයාට පවසා ඇත. එහිදී පොලිස් අධිකාරිවරයා මේ ස්ථාන මාරු වීම කිසි සේත් අවලංගු නොකරන බව පවසා ඇති බව සඳහන්ය. එවිට මේ නිලධාරියා පවසා ඇත්තේ විනය හේතුවක් මත තමාට ස්ථාන මාරු වීමක් කරන්නේ නම් එය සඳහන් නොකර සේවා අවශ්යතා යැයි කියමින් ස්ථාන මාරු දීම සිදු කළේ මන්දැයි කියාය. එහිදී දෙදෙනා අතර උස් හඬින් බහින්බස් වීමක් සිදුව ඇති බව පොලිස් තොරතුරු සඳහන් කළේය.
මේ සම්බන්ධයෙන් ජ්යෙෂ්ඨ පොලිස් අධිකාරිවරයා පොලිසියට පැමිණිලි කරමින් සඳහන් කර ඇත්තේ සැරයන්වරයා බිරිය සමඟ සිය කාර්යාලට ඇතුළු වී උස් හඬින් අමතමින් ස්ථාන මාරු වීමක් කළේ ඇයිදැයි විමසමින් ඔහු අත වූ කොළ කිහිපයක් මේසය මතට විසි කළ බවයි. අනතුරුව සැරයන්වරයා තමාට තර්ජනය කරමින් ස්ථාන මාරු වීම් කිරීමට හේතුව විමසමින් එම ස්ථාන මාරු වීම අවලංගු කරනවාද? නැද්ද? යන්න විමසා සිටි බවද ජ්යෙෂ්ඨ පොලිස් අධිකාරිවරයා පවසා ඇත. තමා මේ ස්ථාන මාරු වීම සිදු කළේ හුරීගස්වැව පොලිස් ස්ථානාධිපතිවරයා විසින් තඹුත්තේගම සහකාර පොලිස් අධිකාරිවරයාට කළ දැනුම් දීමකට කළ විමර්ශනයකින් අනතුරුව තමාට ඉදිරිපත් කළ වාර්තාවකට අනුව බව සැරයන්වරයාට පැහැදිලි කර දුන් බවද ජ්යෙෂ්ඨ පොලිස් අධිකාරිවරයා සිය පැමිණිල්ලේ සඳහන් කර තිබේ. ඒ අවස්ථාවේදී මෙම සැරයන්වරයා ප්රකෝප වෙමින් තමාට පරුෂ වචනයෙන් බැණ වැදී මරණීය තර්ජන කළ බවද ජ්යෙෂ්ඨ පොලිස් අධිකාරීවරයා සිය පැමිණිල්ලේ වැඩිදුරටත් සඳහන් කර ඇත.
ජ්යෙෂ්ඨ පොලිස් අධිකාරිවරයා මේ පැමිණිල්ල කර ඇත්තේ සැරයන්වරයා විසින් කළ පැමිණිල්ලට පසුවය. මේ පැමිණිලි දෙකම සම්බන්ධයෙන් අනුරාධපුර නියෝජ්ය පොලිස්පති මඟින් විමර්ශනයක් පැවැත්වෙන බව උසස් පොලිස් නිලධාරියෙක් සඳහන් කළේය. මේ ජ්යෙෂ්ඨ පොලිස් අධිකාරිවරයා විසින් අසභ්ය ලෙස බැණ වැදුණු බවට වූ තවත් පොලිස් නිලධාරිනියක විසින් කළ පැමිණිල්ලක්ද අනුරාධපුර නියෝජ්ය පොලිස්පති යටතේ මේ වන විටත් විමර්ශනයට ලක් වෙමින් ඇති බවද මේ නිලධාරියා වැඩි දුරටත් සඳහන් කළේය.
ගයාන් කුමාර වීරසිංහ
