රෝසි සේනානායක (විවාහයට පෙර රාමනායක) ශ්රී ලංකාවට නොමද කීර්තියක් ගෙනදුන් කාන්තාවකි. 1980 ලෝක රූ රැජින තරගයට ශ්රී ලංකා රූ රැජින ලෙස සහභාගි වූ ඇය, 1981 වසරේ ආසියානු පැසිෆික් රූ රැජින වූවාය.(Sri Lanka Latest News)
එහෙත් රෝසි ලෝකය පුරා ප්රකට වනුයේ 1985 ලෝක විවාහක රූ රැජින ලෙස අහිෂේක ලැබීමත් සමගය. ඉන් අනතුරුව සිනමාවට පිවිසි ඕ ‘සුරදූතියෝ’ ඇතුළු සිනමා පට කිහිපයක රංගනයට දායක වූවාය. එදා රටට ආඩම්බරයක් ගෙනා ආ රෝසි පිළිබඳ මෙවැනි ලිපියක් ලියන්නට වේයයි ලියුම්කරු කවදාවත් සිතුවේ නැත.
එහෙත් ශ්රී ලංකාව ඇතුළු ආසියානු දේශපාලනය වෙළාගෙන පවතින දූෂණ, අක්රමිකතා නිසා විවිධ ක්ෂේත්රයන්හි කැපීපෙනෙන චරිත බවට පත්වී පසුව දේශපාලනයට පිවිසි බොහෝ දෙනකු පත්වන අවාසනාවන්ත තත්ත්වයට මේ වන විට රෝසි සේනානායකද පත්වෙමින් සිටී.
එක්සත් ජාතික පක්ෂයෙන් දේශපාලනය අරඹන රෝසි, 2015 මැතිවරණයෙන් පරාජයට පත්වුවද තව දුරටත් දේශපාලනයේ නිරත වූවාය. 2018 පළාත් පාලන ආයතන සඳහා වූ මැතිවරණයෙදී කොළඹ නගර සභාවට තරග කරන ඇය, මැතිවරණය දිනා කොළඹ පුරපතිනිය බවට පත්වන්නීය. එහෙත් ඈ නගරාධිපති ධුරයට පත්වූ මුල් යුගයේ සිටම ආන්දෝලනාත්මක චරිතයක් බවට පත්වූවාය.
වරක් සිය නිල නිවෙසේ වැසිකිළිය අධික මිලක් වැයකර අලුත්වැඩියා කළ බවට ඇයට චෝදනා එල්ල විය. එහෙත් පසුගිය මාර්තුවට දින නියමව තිබී මේ වනවිට කල්දමා ඇති පළාත් පාලන මැතිවරණයේදීද කොළඹ මහ නගර සභාවට එජාපයෙන් තරග කරන කණ්ඩායමේ නායිකාව වූයේ ඇයයි.
ධුර කාලය අහෝසි වූ පසු පළාත් පාලන ආයතන නියෝජිතයන් සිය නිල වාහන, නිවාස ආදිය නැවත භාරදිය යුතු නමුත් රෝසි එසේ නොකළ බවට සමජ මාධ්යයන්හි චෝදනා පළවන්නට විය. එමතුදු නොව පළාත් පාලන මැතිවරණයට නාමයෝජනා දී තිබියදී දේශපාලන සදාචාරයේ සියලු සීමාවන් උල්ලංඝනය කරමින් ජනාධිපති රනිල් වික්රමසිංහ ලබාදුන් ‘ජනාධිපති පළාත් පාලන ආයතන උපදේශක’ නම් දේශපාලන පත්වීම භාරගන්නට ඇය ඉදිරිපත් වීම පවා ඇගේ කීර්තියට සිදුවූ හානියකි.
එකී ආන්දෝලනාත්මක පත්වීම ලබාගෙන දින දෙක තුනක් යන්නට මත්තෙන් රෝසි සේනානායක යළිත් මාධ්ය සහ සමාජ මාධ්ය ඔස්සේ පුවත් මවන්නට වූවාය. මෙවර වාර්තා වූ ප්රධාන පුවත වූයේ නගරාධිපතිනියක ලෙස ඕ සිය බලය අවභාවිත කර ඇති බවය.
කොළඹ පුරපතිනිය ලෙස කටයුතු කළ කාලයේ ඇයගේ නිල නිවෙසේ විදුලි බිල ගෙවා ඇත්තේ කොළඹ මහ නගර සභාවෙනි. විදුලි ගිණුම් අංක 0794414982 යටතේ පුරපති නිල නිවෙසේ විදුලි සබඳතාව ක්රියාත්මක වෙයි. නගරාධිපතිනිය ලෙස වැඩ භාරගැනීමෙන් අනතුරුව රෝසි සේනානායක එම නිවෙසේ පදිංචිවනුයේ 2018 මාර්තු මාසයේදී පමණය.
එම වසරේ මාස 9ක් සඳහා පුරපතිනියගේ නිල නිවෙස සඳහා නගර සභාව ගෙවා ඇති විදුලි බිල රුපියල් 143,052.95කි. 2019 වසර සඳහා රුපියල් 115,2509.20ක්ද, 2020 වසර සඳහා රුපියල් 220,9039.89ක්ද පුරපතිනියගේ නිල නිවෙස වෙනුවෙන් නගර සභාව විදුලි බිල ලෙස ගෙවා ඇත. එම මුදල 2021 දී රුපියල් 216,366,7.40කි. 2022 දී රුපියල් 242,8032.06ක් දක්වා ඉහළ යන අතර, 2023 වසරේ මුල් මාස 3 සඳහා පමණක් විදුලි බිල ලෙස රුපියල් 947,254.06ක මුදලක් ගෙවා ඇත.
ඒ අනුව 2018 සිට 2023 දක්ව කොළඹ මහනගර සභාව පුරපතිනි රෝසි සේනානායක වෙනුවෙන් ගෙවා ඇති සමස්ත විදුලි බිල රුපියල් 90,43533කි. මේ අනුව ඇය මසකට රුපියල් ලක්ෂ දෙකකට ආසන්න විදුලි පරිභෝජනයක් සිදුකර ඇති බව පෙනේ. මේ දැවැන්ත විදුලි පිරිවැය මහනගර සභාව විසින් දරනුයේ පුරපතිනි වෙනුවෙන් දරනා සෙසු වියදම්වලට අමතරවය.
පුරපතිනි රෝසි සේනානායකගේ වියදම් අධික පැවැත්ම විදුලි බිල සඳහා සිමාවන්නක් නොවේ. තවත් බොහෝ කාරුණු කාරණා අතින් ගත්තද එය සීමාවන් ඉක්මවා යයි. ඊට හොඳම උදාහරණය පුරපතිනී නිල නිවෙස සහ ගෙමිදුල පිරිසිදු කිරීමට කොළඹ මහ නගර සභාව දරා ඇති වියදමය. නගර සභාව විසින් අනුමත කර ඇති නිල ප්රතිපාදනවලට අනුව පුරපති නිවෙස සඳහා සේවකයන් 04 දෙනකු යොදාගත හැකිය.
එහෙත් වත්මන් පුරපතිනිය එකී ප්රතිපාදනයන් ඉක්මවා යමින් නගර සභාවේ සේවකයන් 03 දෙනකු සහ නගර සභාවේ නොවන, පිරිසිදු කිරීමේ සේවාවන් සපයන ආයතනයක සේවකයන් 09 දෙනකු 2021 පෙබරවාරි 06 වැනිදා සිට සිය නිල නිවෙසේ පිරිසිදු කිරීම් සඳහා යොදාගෙන ඇත. ඒ අනුව ඇය සිය නිල නිවෙසේ පිරිසිදු කිරීම් සඳහා පමණක් සේවකයන් 12 දෙනකු යොදාගෙන ඇත.
ඒ වෙනුවෙන් කොළඹ මහ නගර සභාව ගෙවා ඇති මුළු මුදල රුපියල් 15,107,894.20කි. ඊට අමතරව ගෙමිදුල ඇමදීම සහ එහි පිරිසිදු කිරීම් වෙනුවෙන් කොළඹ මහ නගර සභාව දරා ඇති මුදල රුපියල් 909,000.00කි.
පුරපති නිවෙස වෙනුවෙන් ජල සම්බන්ධතා දෙකක් භාවිත කර ඇති අතර, ඒ වෙනුවෙන්ද දැවැන්ත වියදමක් දැරීමට කොළඹ මහ නගර සභාවට සිදුව ඇත්තේය. ඉන් පැරැණි සබඳතාව ගිණුම් අංක 10/14/352/251/11 යටතේ ක්රියාත්මක වන අතර, එම සබඳතාව වෙනුවෙන් 2018 වසරේ මාර්තු මස සිට 2023 මාර්තු මස තෙක් කොළඹ මහ නගර සභාව ගෙවා ඇති ජල බිල රුපියල් 91856.00කි. පුරපති නිල නිවෙසට තවත් ජල සැපයුමක් 2021 වසරේ ලබාගෙන ඇත. එහි ගිණුම් අංකය 10/14/352/251/11 වන අතර 2021 සිට 2023 මාර්තු දක්වා එම ජල සබඳතාවය වෙනුවෙන් කොළඹ මහ නගර සභාව ගෙවා ඇති මුදල රුපියල් 802,645.00කි.
මේ අනුව බලනා කළ පුරපතිනිය වෙනුවෙන් කොළඹ මහ නගර සභාව ජල සබඳතා දෙකක්, විදුලි සබඳතා එකක් සහ පිරිසිදු කිරීමේ සේවකයන් 12 දෙනෙක් වෙනුවෙන් පමණක් 2018 මාර්තු සිට 2023 මාර්තු දක්වා වැය කර ඇති මුදල රුපියල් 25,954,928.00කි. රට මේ තරම් දරුණු අර්බුදයක ගිලී සිටින සමයක මේසා දැවැන්ත මුදලක් එක තැනැත්තියක් වෙනුවෙන් වැයකිරීම වූ කලී බරපතළ අපරාධයක් බව අමුතුවෙන් කිව යුතු නොවේ. මෙම දැවැන්ත මුදල් අපහරණය පිළිබඳ මේ වන විටත් අල්ලස් හෝ දූෂණ වැළැක්වීමේ කොමිසමට පමිණිල්ලක් ඉදිරිපත්ව ඇත.
එහි තීන්දුව ඉදිරි අනාගතයේ ලැබෙනු ඇත. එම තීන්දුව කුමක් වෙතත් මහජන සේවයට දේශපාලනයට එන පුද්ගලයන් මහජන මුදලින් නඩත්තු කිරීම තවදුරටත් සාදාරණීකරණය කළ යුතු නොවේ. මේ සටහනේ අරමුණ හිටපු පුරපතිනිය විවේචනය කිරීම නොවේ. අනාගතයේ මෙම ධුරයට පත්වන ඕනෑම කෙනෙක් මේ ආකාරයෙන් තම සුඛ විහරණය සඳහා මහජන මුදල් වැයකිරීම නතර කිරීම මෙහි අරමුණ වෙයි. (මෙම ලිපියේ අඩංගු සංඛ්යාලේඛන සියල්ල 2016 අංක 12 දරන තොරතුරු දැනගැනීමේ පනත යටතේ පාර්ශ්ව කිහිපයක් විසින් ලබාගත් විස්තර පදනම් කරගෙන ලබාගත් ඒවාය)
අරුණ ලක්ෂ්මන් ප්රනාන්දු
