මානව හිමිකම් කොමිසම ඉදිරියේ විදුලිබල මණ්ඩලයේ නිලධාරීන් බලපෑමකට ලක් නොවුණු බවත් විදුලි ඉංජිනේරුවරුන් ලෙස මීට මාස ගණනකට පෙර සිට සියලුම සැලසුම් සකස් කළේ උසස් පෙළ විභාගය කාලය තුළ අඛණ්ඩ විදුලිය ලබාදීමේ වැඩපිළිවෙළක් වෙනුවෙන් බවත් ඔහු කියා සිටියේය.
එම තීන්දුව ගැනීමේ අභිලාෂය සහිතව මානව හිමිකම් කොමිසම හමුවට ගිය අතිරේක සාමාන්යාධිකාරීවරයා ඇතුළු නිලධාරීන් විසින් විදුලි බල මණ්ඩලය ලෙස ඇති කරගත් එකඟතාවය ඉන් පසුව වෙනස් කරනු ලැබුවේ සභාපතිවරයා විසින් බව කී විදුලි ඉංජිනේර සංගමයේ සභාපති නිහාල් වීරරත්න ඒ වෙනස් කිරීම සිදුවන්නේ ඇමතිවරයාගේ බලපෑම හේතුවෙන් බව හෙළි වූ ආකාරය කීවේය.
මේ සම්බන්ධව ඉංජිනේරු සංගමයේ සභාපති නිහාල් වීරරතන් ලංකාසරට මෙම පැහැදිලි කිරීම කළේය.
‘25 දා උදේ වරුවෙ ලංකා විදුලිබල මණ්ඩලයත් මානව හිමිකම් කොමිසමට කැඳවලා තිබුණා. ඒකට අපේ සම්ප්රේක්ෂණ අංශයේ අතිරේක සාමාන්යාධිකාරී සහ පද්ධති පාලන අංශයේ නියෝජ්ය සාමාන්යාධිකාරීතුමා සහභාගී වුණා. ඔවුන්ට විදුලිබල මණ්ඩලය ලෙස බලය පවරලා තිබුණා ගිහින් ඒ සඳහා කටයුතු කරන්න. තීන්දු ගන්න. එතැනදි ප්රමුඛ වුණේ ඉන්ධන ප්රශ්නයක්. ගැටලුව වෙලා තිබුණේ විදුලි ජනනය සඳහා විදුලිබල මණ්ඩලයට ඉන්ධන නොලැබීම. ඉන්ධන මිල වැඩිකරලා තිබුණා. ඒ මිල ගෙව්වෙ නැතිනම් ඉන්ධන ලබාදෙන්නෙ නෑ කියන කතාව ඛණිජ තෙල් නීතිගත සංස්ථාව කිව්වා.’
‘ඉන්ධන තියනවා නම් මේ අහිංසක දරුවො වෙනුවෙන් විදුලිය ජනනය කරලා දෙන්න බලාගාර ඕන තරම් තියනවා. ඒ සඳහා කිසිම ගැටලුවක් නෑ…’
උසස් පෙළ විභාග කාලය තුළ අඛණ්ඩ විදුලි සැපයුමක් ලබාදිය යුතුයි කියන වගකීම් සහගත ස්ථාවරයෙ අපි හිටියා. ඒ නිසා අපි කලින්ම ක්රියාමාර්ග ගත්තා. ගල් අඟුරු ටික පරක්කුවෙලා ආවත් අපි ඉක්මනට බාගත්තා. විභාගයට කලින් නොරොච්චෝලෙ විදුලි බලාගාරයෙ ජනන යන්ත්ර දෙකයි වැඩ කළේ. තුන්වැනි ජනන යන්ත්රයත් අපි ඉක්මනට පණගැන්නුවා. පණගන්වලා මේ කාලසීමාව ඇතුළෙ අඛණ්ඩ විදුලි ජනනය වෙනුවෙන් කටයුතු කළා.
ඒ අතරෙ තමයි එක්වරම නැප්තා මිල වැඩි කළේ. කිසිම විද්යාත්මක හේතුවක් නෑ. ලෝක වෙළෙඳපළේ බොරතෙල් මිල වැඩිවුණෙත් නෑ. මිල අඩුවීමේ ප්රවණතාවක් තමයි පෙනුනෙ. අනික කලින් ආපු බොරතෙල් නැව පිරිපහදුවෙන් ලැබුණු අතුරු ඵලයක් තමයි මේ නැප්තා ටික. අපි ඇරෙන්න ඒ නැප්තා ටික ගන්න කෙනෙකුත් නෑ. ඒකට මිලක් වැඩි කළා. අපට තේරෙන්නේ නෑ ඇයි මෙහෙම කරන්නෙ කියලා.
අපි අඛණ්ඩ විදුලි සැපයුමක් දෙන්න සියල්ල සූදානම් කරනකොට ඇමැතිවරයා ඛණිජ තෙල් නීතිගත සංස්ථාව මේ ආකාරයෙන් හසුරවනවා. එහෙම තත්ත්වයක් යටතේ තමයි අපිව මානව හිමිකම් කොමිසමෙන් කැඳෙව්වෙ.
අපි එතැනදි කිව්වෙ අපට සල්ලි නෑ. ණයට හරි තෙල්ටික දුන්නොත් විදුලිය ජනනය කරන්න පුලුවන් කියලා.
නමුත් ඒ වෙලාවෙ ඛණිජ තෙල් නීතිගත සංස්ථාව ඒ රැස්වීමට ඇවිත් හිටියේ නෑ. උදේ සාකච්ඡාවට ඇවිත් හිටියෙ අමාත්යාංශයේ අතිරේක ලේකම්වරයෙක් සහ ලංකා විදුලිබල මණ්ඩලයේ නිලධාරීන් තුන්දෙනක්. අපේ එතන හිටියේ මූල්ය කළමණාකාරතුමයි, අතිරේක සාමාන්යාධිකාරීතුමයි, නියෝජ්ය සාමාන්යාධිකාරීතුමයි. ඊට අමතරව මානව හිමිකම් කොමිෂන් සභාවයි, මහජන උපයෝගීතා කොමිෂන් සභාවයි හිටියා. ඒ වෙලාවෙ සාකච්ඡාවට හිටියෙ ඒ කණ්ඩායම.
ඒ රැස්වීමෙදි ඛණිජ තෙල් නීතිගත සංස්ථාව නැතිව තීරණයක් ගන්න බෑ. අපි කිව්වාට තෙල් දෙනවා නම් විදුලිය සපයලා දෙන්නම් කියලා. තෙල් දෙන්න කෙනෙක් ඉන්න ඕන. ඒ නිසා මානව හිමිකම් කොමිසම එදින හවස ඛණිජතෙල් නීතිගත සංස්ථාව කැඳවලා තිබුණා. බැංකුවලිනුත් ඇවිත් තිබුණා.
ඒ අවස්ථාවෙ සාකච්ඡා කළාම ඛණිජ තෙල් නීතිගත සංස්ථාව කියලා තිබුණා මාස දෙකකට ණයට ඉන්ධන නිකුත් කරන්නම් කියලා. එතකොට මානව හිමිකම් කොමිසම සහ මහජන උපයෝගීතා කොමිසම මැදිහත් වෙලා තිබුණා ඒ කටයුත්තට. බැංකුවලින් කියලා තිබුණා ණයක් ලබාදෙන්නම් කියලා ඉන්ධන සැපයීම කරන්න. දැන් මෙතැන ප්රශ්නයක් නෑ. ප්රශ්නය විසඳිලා තිබුණේ.
එහෙම කියලා නිලධාරීන් ගියාට පස්සේ තමයි මේ තීරණය කරන්නෙ මුදල් ගෙවනතුරු විදුලිය දෙන්න බෑ කියලා. ඒ තීරණය එන්නේ විදුලිබල මණ්ඩලයේ සභාපතිවරයාගෙන්. අපිට හෙළිදරවු වෙන විදිහට සභාපතිවරයාට ඒ උපදෙස් දෙන්නෙ ඇමතිවරයා.
ඛණිජ තෙල් නීතිගත සංස්ථාව දැන් කියනවා ඉන්ධන දෙන්න බෑ කියලා ණයට. ඒත් ඔවුන් මානව හිමිකම් කොමිසම ඉදිරියේ ඉන්ධන දෙන්න කැමති වෙලා ගියෙ. ගියාට පස්සෙයි ඔවුන් අකැමැති වෙන්නේ. ඒ අමාත්යවරයාගේ බලපෑම මත.
මේක තමයි තත්ත්වය. දැන් වැඩේ කෙරෙන්නෙ නෑ. අධ්යක්ෂ මණ්ඩලය තීරණයක් අරන්දීලා තියනවා වැඩේ නොකෙරෙන්න.
අමාත්යවරයා හදන්නෙ අය ක්රමය වැඩිකරන්න ළමයින්ගෙ අනාගතය බිල්ලට තියාගෙන.
මේ රට දේශපාලනය කරන්න බෝම්බ තියලා මිනිස්සු මරපු දේශපාලකයො ඉන්න රටක්. ඒ රටේ මෙහෙම දෙයක් සිද්ධ වුණා කියලා අපි පුදුම වෙන්නෙ නෑ.
දැන් අපේ සාමාජිකයින් දෙන්නා බරපතල පීඩනයක ඉන්නේ. ඔවුන් එක් පැත්තකින් මහජන උපයෝගීතා කොමිසමේ සහ මානව හිමිකම් කොමිසමේ පීඩනයට ලක් වෙනවා. අනෙක් පැත්තෙන් අපේ කළමනාකාරීත්වයේ පීඩනයට තෙරපෙනවා.
මේ සම්බන්ධයෙන් ඉංජිනේරු සංගමය ලෙස අපි නිදහසට කාරණා අහන්නයි ඉන්නේ සාමාන්යාධිකාරීවරයාගෙන් සහ සභාපතිවරයාගෙන්. පැහැදිලිව අපේ නිලධාරීන් ගියෙ බලතල පැවරුවට පස්සේ. මානව හිමිකම් කොමිසමට යන්න බෑ බලතල නැතිව. එහෙම තැනකට යන්නේ තීරණයක් දෙන්න. පඹයො වගේ ඉන්න බෑ අපිට තීරණයක් දෙන්න පුළුවන්කමක් නැතිව.
අතිරේක සාමාන්යාධිකාරී සාමාන්යාධිකාරීවරයාට පමණයි දෙවැනි වන්නේ. ඔවුන් සැදීපැහැදී ගියේ අඛණ්ඩ විදුලි සැපයුම ලබාදීමේ තීන්දුව ගන්න. නැවත ඒ තීරණය අනෙක්පැත්තට හරවනවා දේශපාලන බල අධිකාරිය විසින්. මේ රට දුවන්නෙ කොතෙන්ට ද කියලා හිතාගන්න වේවි.
lankasara