අධිකරණ නියෝග කඩකරමින් අම්පාර පොතුවිල් සිට පේදුරුතුඩුව දක්වා වූ විරෝධතා පෙළපාළියට සහභාගී වූ දෙමළ ජාතික සන්ධාන පාර්ලිමේන්තු මන්ත්රීවරුන් වන රාසමානික්කම් චානක්යන්, එම්.ඒ සුමන්තිරන්, චාල්ස් නිර්මලනාදන්, තවරාසා කලියිඅරසන් ඇතුළු හඳුනාගත් පුද්ගලයන් 30 දෙනකුට එරෙහිව අධිකරණ නියෝග කඩකිරීම හා රාජකාරියට බාධාකිරීමේ චෝදනා යටතේ පියවර ගැනීමට නියමිතය.
සෙසු පිරිස් හඳුනාගැනීම සදහා සී.සී.ටී.වී කැමරා හා ආරක්ෂක අංශ සටහන් කරගත් දර්ශන ආශ්රයෙන් පරීක්ෂණ සිදුවන බව දැනගන්නට ඇත.
දෙමළ ජනතාවගේ අයිතිවාසිකම් වෙනුවෙන් අම්පාර පොතුවිල් සිට පේදුරුතුඩුව පෝලිකන්ඩි දක්වා තෙදිනක විරෝධතා පෙළපාළියක් ඊයේ (3 වැනිදා) ආරම්භ වූ අතර අම්පාර දිස්ත්රික්කයේ විරෝධතා කිරීම හා පෙළපාළි යාම වළකාලමින් පොතුවිල්, අක්කරයිපත්තු, කලවංචිකුඩි, හා කල්මුනේ යන අධිකරණ විසින් දේශපාලකයන් සිවිල් ක්රියාකාරීන් ඇතුළු පිරිසකගේ නමින් තහනම් නියෝග ලබා දී තිබුණි.
එමෙන්ම යාපනය මහෙස්ත්රාත් අධිකරණ ප්රදේශ බල සීමාවේ මෙම 7 වැනිදා තෙක් දින හතරක කාලයක් කිසිදු විරෝධතාවක් පෙළපාළියක් සිදු නොකරන්නැයි නියෝගයක් යාපනය මහෙස්ත්රාත් අධිකරණයද ඊයේ (03 වැනිදා) ලබාදී තිබුණි.
යාපනය දිස්ත්රික් හිටපු පාර්ලිමේන්තු මන්ත්රී මාවෙයි සේනාධිරාජා, යාපනය නගරාධිපති වී.මනිවන්නන්, හිටපු පාර්ලිමේන්තු මන්ත්රී ඊ. සරවණබවන්, උතුරු පළාත් හිටපු සභාපති සී.වී.කේ සිවඥානම්, එම්.කේ සිවාජිලිංගම් ඇතුළු දේශපාලකයන් හා ක්රියාකාරීන් 11 දෙනකුගේ නමින් යාපනය මහෙස්ත්රාත් අධිකරණය වෙත කරන ලද කරුණු දැක්වීමක් මත මෙම නියෝගය ලබාදී ඇතැයි යාපනය දිසාව භාර නියෝජ්ය පොලිස්පති මහේෂ් සේනාරත්න පැවසීය.
මෙලෙස අධිකරණ නියෝග ලබාගත්තද ඊයේ පොතුවිල්වලින් ඇරඹි පෙළපාළියට එම නියෝග නිකුත් කළ බොහෝ දෙනකු සම්බන්ධ වී තිබිණි.
පොතුවිල්වලින් ආරම්භ කළ මෙම විරෝධතාව නැවැත්වීමට පොලිසිය හා ආරක්ෂක අංශ ප්රදේශ කිහිපයකදී උත්සාහ කළ අතර එම අවස්ථාවල දෙපාර්ශ්වය අතර උණුසුම් තත්ත්වයන් ද මතුව තිබුණි.
කෙසේ වෙතත් අම්පාරෙන් පොතුවිල්වලින් ඇරඹී පෙළපාළිය පොලිසියේ බාධා නොතකමින් ඊයේ (3 වැනිදා) දිනයෙන් මඩකලපුවෙන් අවසන් විය.
