SLT-MOBITEL වෙතින් “සුවවිරු උපහාර”

ශ්‍රී ලංකාවේ ජාතික තොරතුරු සන්නිවේදන තාක්ෂණ හා ජංගම දුරකථන ජාලය වන SLT-MOBITEL, මෙරට ඉදිරිපෙළ සෞඛ්‍ය කාර්ය මණ්ඩල සාමාජිකයින් වෙනුවෙන් ‘සුවවිරු උපහාර’ නමින් විශේෂ වැඩසටහනක් හඳුන්වාදී තිබේ. මෙම වැඩසටහන යටතේ එම සුව විරුවන්ට මාස 3ක කාලයක් සඳහා දුරකතන සහ අන්තර්ජාල සම්බන්ධතාව නොමිලේ හිමිවනු ඇත. මුළු දිවයිනම ආවරණය වන පරිදි තෝරාගත් ප්‍රධාන පෙළේ COVID-19 ප්‍රතිකාර මධ්‍යස්ථානවල සේවය කරන හෙද හෙදියන්, උපස්ථායකයන්, රියැදුරන් සහ ආදාහනාගාර සේවකයන් ඇතුළු කාණ්ඩවලට මෙම ස්ථාවර හෝ ජංගම දුරකතන සේවාවන් ලබාගත හැකි වේ.

මෙම දීමනාව සක්‍රීය කළ දිනයේ සිට මාස 3ක් දක්වා සෑම මාසයකදීම ඕනෑම ජාලයකට SMS 1000ක්, ඕනෑම ජාලයකට විනාඩි 1000ක ඇමතුම් කාලයක් සහ 2GB දත්ත නොමිලේ හිමිවේ. දීමනාවට සුදුසුකම් ලබන පුද්ගලයන්ට, මෙම දීමනා සියල්ල සහිත ජංගම දුරකතන සම්බන්ධතා දෙකක් ලබාගැනීමට අවස්ථාව හිමිවනු ඇත.

දැනටමත් SLT-MOBITEL ස්ථාවර දුරකතන සහ බ්‍රෝඩ්බෑන්ඩ් සම්බන්ධතා හිමි අදාළ පුද්ගලයන්ට, ඕනෑම ජාලයක් සඳහා නොමිලේ අසීමිත ඇමතුම් හිමිවීමට අමතරව, මාස 3ක කාලයක් සඳහා මාසිකව YouTube සඳහා 10GB ඩේටා සමග 100 GB Meet Max Bundle සහ 10 GB Messenger Bundle නොමිලේ හිමි වේ. SLT-Mobitel Fibre, ADSL සහ 4G LTE භාවිත කරන පාරිභෝගිකයන්ට මෙම ඩේටා දීමනාවන් ලබාගත හැක.