සාමාන්‍ය පෙළ විශිෂ්ට ප්‍රතිඵල ගත් දෙව්මිට මහජන බැංකුවෙන් ලැප්ටොප් පරිගණකයක්…

විශේෂ අවශ්‍යතා සහිත දැරියක ලෙස මෙවර සාමාන්‍ය පෙළ විභාගයට පෙනීසිට ‘ඒ’ සාමාර්ථ 9ක් ලබාගත් දික්වැල්ල, රත්මලේ බඹරැන්ද සද්ධර්මරාජ මහා විද්‍යාලයේ දෙව්මි රන්සරා රාජපක්ෂ දියණියගේ අධ්‍යාපන කටයුතු වෙනුවෙන් ලැප්ටොප් පරිගණකයක් හා අධ්‍යාපනික උපකරණ පිරිනැමීමට මහජන බැංකුව පසුගියදා කටයුතු කළේය.

විවිධ අභියෝග මැද වීර්යයෙන් ජීවිතයට මුහුණදී විශිෂ්ට ප්‍රතිඵලයක් ලැබූ රත්මලේ කුරුඳුගහ හේනේ පදිංචි දෙව්මි දියණියගේ දෙපා ඇතු`ඵ ශරීරයේ බොහෝ කොටස් අප්‍රාණිකය. ඇයව වඩාගෙන පාසලට කැඳවාගෙන ඒම හා නැවත කැඳවා ඒම මාපියන් සිදුකරයි.

මෙම දියණියගේ දක්ෂතා අගයමින් ඇගේ ඉදිරි අධ්‍යාපන කටයුතු සඳහා මහජන බැංකුවේ මාතර ප්‍රාදේශිකය මෙම ලැප්ටොප් පරිගණකය පිරිනැමුවේය. පහ ශිෂ්‍යත්ව විභාගයෙන්ද විශිෂ්ට ප්‍රතිඵල වාර්තා කළ දෙව්මි රන්සරා දියණිය කුඩා කල සිටම මහජන බැංකුවේ ‘සිසු උදාන’ ගිණුමක් පවත්වාගෙන යාම විශේෂත්වයකි.

මෙම අවස්ථාවට කුරුඹුරේ රජමහා විහාරයේ විහාරාධිපති පූජ්‍ය කතරගම මහානාම හිමි, රත්මලේ බඹරැන්ද සද්ධර්මරාජ මහා විද්‍යාලයේ විදුහල්පතිනි රසිකා අබේවර්ණ, දැරියගේ පියා වන මහින්ද කුලතුංග රාජපක්ෂ, මව වන කුසුමිනි අබේගුණවර්ධන, මහජන බැංකුවේ මාතර ප්‍රාදේශීය කළමනාකාර අයි.කේ. ඉන්දික, සහකාර ප්‍රාදේශීය කළමනාකාර ඩබ්.කේ.එස්. කුමාරසිංහ ඇතුළු මහත්ම මහත්මීහු පිරිසක් සහභාගි වූහ.