රට වටේම යන්න හදන කොළ කැඳ මල්ලී

“කොළ කැඳ ඉතිරෙන නව වසරක් වේවා” පසුගිය ජනවාරි 01 වැනිදා ශ්‍රී ලංකාවේ අලුත්ම මොබයිල් ඇප් එක පළමු වරට භාවිතයට එකතු වූයේ එම තේමා පාඨයත් සමඟිනි. කැඳ ඩිලිවරියක් වෙනුවෙන්ම වූ ලංකාවේ ප්‍රථම මොබයිල් ඇප්ලිකේෂන් එක එලෙස හඳුන්වා දුන්නේ පරිසහිතකාමී ක්‍රියාකාරිකයෙක්, ව්‍යවසායකයෙක් වගේම සමාජ මාධ්‍ය සමාජ සුබසිද්ධිය වෙනුවෙන් යොදාගනිමින් බොහෝ සාධනීය දේවල් කළ හැකි බව සනාථ කළ මොහොමඩ් ෆර්ශාන් විසිනි.

2016 යේදී මුලින්ම කැඳ කල්දේරමක් සහ ළිපක් ඩිමෝ බට්ටෙක් මත පටවාගෙන කොළ කැඳ විකිණීමට ෆර්ශාන් එළියට ආවේ මහපොළොවේ පැළ හිටවීමට මුදල් සොයාගැනීම පිණිසයි. ජොගින් පාත්වල උදේම ව්‍යායාම කරන්නට එන අය ඉලක්ක කරමින් එවක ෆර්ශාන් විසින් රට වටා දියත් කළ පැළ සිටුවීමේ ව්‍යාපෘති වෙනුවෙන් මුදල් සම්පාදනය සඳහා දියත් කළ කොළ කැඳ අලෙවිය ඉතා සාර්ථක සංකල්පයක් ලෙස ක්‍රියාත්මක විය.

පසුකාලීනව කොළ කැඳවලට අලුත් හැඩයක් දියත් කරමින් වෙනස් ව්‍යාපාර සංකල්පයක් ලෙස ඉහළ මධ්‍යම පාන්තික පවුල් සහ පෞද්ගලික ආයතන ඉලක්ක කරගත් කොළ කැඳ ඩිලිවරියක් ෆර්ශාන් කොළඹට හඳුන්වා දෙන්නේ සමාජ මාධ්‍ය තුළින්මය. ඔහුගේ අවශ්‍යතාවය වූයේ ජැන්ඩියට කොළ කැඳ T ෂර්ට් හැඳගත් කඩවම් තරුණයින් යොදවා වීථිවල විකුණන කැඳ වීදුරුවක් බීමට වැඩි කැමැත්තක් නොදක්වන පන්තියට ඔවුන් කැමති රටාවකට කොළ කැඳ හඳුන්වාදීමය.
හැබැයි දැන් ෆර්ශාන් කැඳ හදන්නේ නැත. ඔහු ඒ සඳහා සිය ඇප් එක හරහා නියෝජිත ජාලයක් බඳවාගෙන තිබේ.

“හැමෝටම තමන්ගෙ කියලා දෙයක් කරන්න වුවමනාව තියෙනවා. හැමතිස්සෙම ඒ හීනයට බාධාවක් වෙන්නෙ සල්ලි” යැයි කියමින් ෆර්ශාන් එම නියෝජිතයින්ට අවශ්‍ය සියලුම දේ ඔහු විසින්ම සපයා දෙන්නටත් කටයුතු කළේය.
කොළඹ දිස්ත්‍රික්කය ආවරණය කරන්නට මේ වන විට කොළ කැඳ සාදා බෙදාහරින නියෝජිතිතයින් හය දෙනෙකුත්, ගම්පහ දිස්ත්‍රික්කය ආවරණය කරන්නට නියෝජිතයින් හතර දෙනෙකුත් කටයුතු කරන අතර ජනවාරි මස අග වනවිට මහනුවර, මාතලේ, කළුතර, රත්නපුර, ගාල්ල සහ මාතරත් ආවරණය කිරීම ඔවුන්ගේ බලාපොරොත්තුව වේ.