අතීතයේ අද මෙන් රසායනික තෙල් පොහොර භාවිතයක් නොවූ අතර ගොවීන් සිය වගා කටයුතුවල සියලු ගැටලු නිරාකරණය කරගත්තේ යන්ත්ර මන්ත්ර කෙම් ක්රම භාවිතයෙනි. එහෙයින් එම විස්මිත කෙම් ක්රම වර්තමානයේ ගොවීන්ද දැන සිටීම ඉතා වැදගත් වෙතැයි සිතේ. එහෙයින් මෙම ඉතා පැරැණි කෙම් ක්රම මෙලෙස ඉදිරිපත් කරමි.
මීයන් ගොයම් කනවාට
නොපෑගුණු ඇළකින් හෝ දොළකින් කතා නොකර වැලි මිටක් ගෙන වියළා පූජාසනයක තබා මෙම මන්ත්රයෙන් 108 වරක් මතුරාගෙන කුඹුරේ සෑම තැනම ඉසින්න. යල ඉවර වෙන තුරුම මීයෝ නොකති.
ඕං නමෝ ඇති හිමියේ ස්වාහඃ
මා නැකැතින් මීගසක බස්නාහිර දිසාවට ඇදීගිය මුලක් කතා නොකර ගලවාගෙන කුඹුරේ මැද සිටුවීමෙන් මීයන්, ඌරන්, හාවුන්, කුරුල්ලන්ගෙන් රැකගත හැකි වේ.
කෘමි උවදුරට ගොදුරුවී ඇති වෙලකින් අල්ලාගත් ගොයම් මැස්සාට මෙම මන්ත්රයෙන් 108 වරක් මතුරා කුඹුරට අතහරින්න. ඌ ඉගිළී යන විට සියලු මැස්සන් කුඹුරෙන් ඉගිළී යනු ඇත.
ඕං නමෝ නිරේස්වාහඃ ආරේස්වාහඃ නමෝ පරකේස්වාහඃ
ගොයම් මැස්සන්ගෙන් වන උවදුරුවලට
නොපෑගුණු තැනකින් වැලි ගෙන මන්ත්රයෙන් 108 වරක් මතුරා කුඹුරට කතා නොකර ඉසින්න.
ඕං නමෝ නික්ක මන්තං සාරිපුත්තම් මහා මොග්ගල්ලානම් ථෙර යාවජීව ඕං හනේස්වාහඃ
කුරුලු උවදුරට
මා නැකැතින් මීගසක මුලක් කතා නොකර ගලවාගෙන කතා නොකර ඉර මුදුන් මධ්යාහ්න කාලයේදී කුඹුර මැද සිටුවන්න.
බදාදා හෝ සෙනසුරාදා දිනෙක දිය කිරිල්ල අත්තක් කඩාගෙන මතුරා කුඹුර මැද කතා නොකර සිටුවන්න.
ඕං නමෝ වෙනි වෙනි වලාවෙහි ඒස්වාහඃ
(108 වරක් මතුරන්න)
කතා නොකර කිතුල් අතු කැබැලි හතරක් හෝ මල්කෑර කෝටු 4ක් ගෙන මෙම මන්ත්රයෙන් 108 වරක් මතුරා කුඹුරේ සතර කොන සිටුවන්න.
කුරුල්ලන් නොකයි. අත්දුටුවයි.
නමෝ මහා මේ ගත්තේ මමයි ඒහි ඒස්වාහඃ
පීදෙන ගොයම් ආරක්ෂාවට
පොල් ගෙඩියක් කතා නොකර කඩා තෙල් සිඳ එම තෙල් ඉහත සඳහන් මන්ත්රයෙන් 108 වරක් මතුරා කුඹුරේ, නියරේ සතර කොන ගස්ලබු පහන් 4ක් පත්තු කරන්න.
මැස්සන් එළවීමට
නමෝ නීල නීල අනිලේ ස්වාහඃ
කුඹුරට ගොස් වක්කඩෙන් කතා නොකර වැලි ගෙන කුඹුරේ නියර උඩ සිටගෙන 21 වරක් මතුරා කුඹුරට ඉසින්න.
ලී දඬු කපා ඒවා උල්කර උල උඩ කතා නොකර මඩුමල් ගසා කුඹුර හතර වටේ සිටුවන්න. එම ගඳට මැස්සන් පලායනු ඇත.
ඇටිකෙසෙල් ඉස්ම බිත්තර වී සමග කළවම් කර ඉසින්න. අස්වැන්න වැඩිවේ.
කලාඳුරු කොළ ගෙඩි වක්කඩේ දැමීමෙන් කෘමීන්ගෙන් කුඹුර ආරක්ෂා වේ.
පඹවැල් තළා වක්කඩේ කතා නොකර බැඳීමෙන් එහි අඩංගු රසායනික ද්රව්ය ජලයට මිශ්ර වීම නිසා කෘමීන් සහමුලින්ම වඳ වේ.
ගෙයි ළිපෙන් අළු කතා නොකර කොළපතකට ගෙන කතා නොකර කුඹුරට පිටිපස්සට යමින් ඉසින්න. කීඩෑ උවදුර දුරුවේ.
වරා අතු වක්කඩේ කතා නොකර දැමීමෙන් කෘමීන් වඳවේ.
කෘමිනාශක දේශීය පැරැණි ඖෂධයක් වූ දළුක් දඬු පෙති ගසා වක්කඩේ දමන්න. කෘමීන් නැතිවේ.
කලවැල් තළා කුඹුරේ වතුර බසින වක්කඩේ කතා නොකර තබන්න. සියලු පණු රෝග නැතිවේ.
කීඩෑවන් සහ වේයන්ගෙන් රැකගැනීමට
ශණිකුණ්ඨ බන්ද පන්දම් යේස්වාහඃ
නොපෑගුණු වැලි ගෙන මෙම මන්ත්රයෙන් 108 වර මතුරා වැලි ඉසින්න.
බුළු ගසේ පිළිලයක් කතා නොකර ගලවාගෙන කමතට එළන මාගල් පැදුරු යට තබන්න. අස්වැන්න වැඩිවේ.
කොහොඹ කුඩා ලෑල්ලක සුදු හඳුන් පිනිදියෙන් ගලගා මෙම යන්ත්රය ලෑල්ලේ ඇඳ ගොයම් පාගන කමතේ මැද කොටස් මධ්ය ලක්ෂ්යයේ පොළොව යට නිදන් කර ගොයම් පාගන්න. කමතේ බහිරව දෝෂ භංග වේ. පැරැණි ගොවි කෙමකි.
හිරු පෑයීමට පෙර ළිපේ අළු කතා නොකර කොළපතකට ගෙන කතා නොකර එළවළු පැළවලට පාන්දරම ඉසින්න. කෘමීන් හා කොඩයි නොකයි.
මෑකරල් වැනි බෝගවලට කොඩයි කූඩිත්තන් වැනි කෘමීන්ගෙන් වන හානිවලට කතා නොකරම (පිටි අතින් දෙඅත් පිටිපස්සට ගෙන) දිමි ගොටුවක් කඩාගෙන ඇවිත් බෝග වගාවන්ට කතා නොකර දමන්න.
දිමියන් තමාවද කන්නට පෙර දිමියකු අල්ලාගෙන ඌ නොමරා තම රෙදිපටේ සඟවාගන්න. (මෙය පැරැණි කෙමකි).
ඌරන් සහ මුවන්ගෙන් රැකගැනීමට නොඉඳුල් තැඹිලි තෙල් ගෙන හේනේ දණ නමාගෙන ඉඳ බෝග වැපිරූ දිනයේ රාත්රියේ මෙම මන්ත්රයෙන් 21 වරක් මතුරා පැපොල් ගෙඩි බෑයක පහන් වැටියක් දමා දල්වන්න.
ඕං නමෝ උග්රමනී ඒස්වාහඃ
පහන හේනේ ඇවරි කණුවක් මත කතා නොකර තබන්න.
දේශබන්දු ටී.හෙන්රි බෙම්මුල්ල