2022 අප්රේල් 29 දින රාශි මාරු කළ සෙනසුරු පැමිණ සිටින්නේ ඔබට අපල ඇති රාශියකටදැයි ඔබ දැන සිටීම වැදගත් වේ. නැතහොත් ඔබටත් නොදැනීම ඔබගේ විවිධ කාරණා කටයුතු අඩාළ වීම අතපසු වීම ආදිය සිදුවීමට ඉඩ තිබේ. කෙසේ නමුත් ඔබට සෙනසුරු හෙවත් ශනි ග්රහයාගෙන් එවැනි යම් අසුබතාවක් වේ නම් ඊට කලබල විය යුතු නැත. මන්ද ඔබ කලබල වීම තුළ සිදුවනුයේ සෙනසුරුට තම අපල ක්රියාත්මක කිරීමට පහසු වීම පමණකි. එනිසා යම් අපලයක් ඇතැයි සිතුණු විගස දැනගත් විගස එම අපල තත්ත්වයන්ගෙන් මිදෙන්නට හැකි සරල හා පහසු පිළිවෙත් මොනවාද යන්න දැන සිටීම වැදගත් වෙයි. එම වත්පිළිවෙත් ඔබට පහසු පරිදි අනුගමනය කරමින් අපල වළකා ජීවිතය බාධාවකින් තොරව ගෙවා දමන්නට ඔබට හැකියාව ලැබෙනු ඇත.
ශනිගෙන් යෙදෙන අපල ක්රියාත්මක කරනුයේ අවර යක්ෂයාත්, අවගිරි යක්ෂණියත් බවට මතයක් වෙයි. එහෙයින් ඔබට හැකි අයුරින් විෂ්ණු දෙවියන්ට හා ආඩි හෙළඟ බහිරව දේවතාවාට පූජා තැබීම පින් දීම ආදී කටයුතු කිරීමෙන් පිහිට පැතිය හැකි වේ.
නිල් මැණික්, ලෝකඩ භාජන, මී හරක්, කළු රෙදි, තල, කොල්ලු දන්දීමෙන්ද, කළුතල, අංජන කැට ලොන් සිඹුළු, බැවිල, වීපොරි, සතකුප්ප තැම්බූ වතුර ස්නානය කිරීමද ඉතා යෝග්ය ප්රතිකර්මයන්ය.
එසේම නීල වර්ණ මල් හැකි අයුරින් පූජා කිරීමෙන්ද නිල් මැණික් (කාක නිල් විශේෂයි) පැලඳීම, යකඩයෙන් තැනූ ආභරණ පැලඳීම, නුග වෘක්ෂයට සාත්තු කිරීම, ස්පර්ශ කිරීම ආදී කටයුතුවලින්ද අපල දුරුවේ.
ඔබට හැකි පරිදි කකුලක් ආබාධිත යාචකයන්ට සෙනසුරාදා දිනයක උදේ කාලයේ කැකුළු බත් සමග එළවළු ව්යංජන දානයක් දෙන්න. කපුටන්ට සෙනසුරාදා දින අලුයම ගිතෙල් මිශ්ර කිරිබත් දීමද ඉතා යහපත් කාර්යයකි. අපල ගැන සිතමින් දුක් නොවිඳ මේ පහසු සරල වත්පිළිවෙත් අනුමගමනය කර තම අපල දුරු කරගැනීම ඔබේ වගකීමකි. එය ඔබට යහපතකි.
ප්රවීණ ජ්යොතිෂවේදී සත්යජිත් සම්පත්