ගෙයක් හදන්න කලින් බලන්නම ඕනෑ දේවල්

ජීවිත කාලයටම ජීවත් වන්න සාදාගනු ලබන පුංචි කැදැල්ල හරිම විදියට ගැටලුවකින් තොරව සාදා නිමකර ගන්න කවුරුත් කැමැතියි. හැබැයි ඒ කාරණාව පහසුවෙන් සිදුකරන්නට හැකියාව පවතින දෙයක් නොවන බවත් දතයුතුය. බොහෝ කරුණු කාරණා මත පදනම්ව නිවැරැදිව වාස්තු විද්‍යාත්මක පදනම් මත පිහිටා මේ නිර්මාණයට යොමු වුවහොත් මේ කාරණාව අසීරු නොවන බවත් සිහි තබාගත යුතුය. අද මා ඔබට මෙමඟින් පෙන්වා දෙනු ලබන්නේ ඒ සොඳුරු කැදැල්ල ගොඩනඟන්නට බලපානු ලබන ප්‍රධාන කාරණාවන් කිහිපයක් පිළිබඳවයි. නිවෙස හදන්න කලින් මේවා ගැන අවබෝධයක් නැතිනම් පසුකාලීනව ඔබ පසුතැවීමට ලක්වෙන්න පුළුවනි.

මෙහිදී ප්‍රධාන කාරණාවක් ලෙසින් ඔබට නිවෙසක් තැනීමේදී ගෙබිම දිශාගත කරනා ආකාරය පිළිබඳ සැලකිල්ලට ගනිමු. ගෙබිම දිශාගත කිරීමේදී මූලික වශයෙන් ඉඩමේ මාණක සැලසුමත්, ගොඩනැඟිලි සැලසුමත් කෙරේ මූලිකවම අවධානය යොමු කිරීම වටී. මන්ද ඉඩමේ මාණක සැලසුම සැලකීමේදී බලයලත් මිනින්දෝරුවකු මැන සකස් කරන ලද, සහතික කරන ලද පිඹුරුපතක් විය යුතුය. එසේම එය දිස්ත්‍රික් ඉඩම් රෙජිස්ට්‍රාර් කාර්යාලයේ ලියාපදිංචි වී තිබිය යුතුය. එය නීත්‍යනුකූල තත්ත්වයයි. ගොඩනැඟිලි සැලසුම සැලකීමේදී එය විවිධ ආකාර ගනී. එක් එක් පුද්ගලයාට අවශ්‍ය ආකාරයට පවතිනා ඉඩමේ ප්‍රමාණය, ඉඩමේ පිහිටීම, ආර්ථික තත්ත්වය මත ගොඩනැඟිලි සැලසුම තීරණාත්මක වෙයි. අප මෙසේ උචිත අන්දමින් සකසා ගනු ලබන ගොඩනැඟිලි සැලසුම ඉඩම මත ස්ථාපනය කරනු ලැබේ. මේ ස්ථාපනය කිරීමේදී, පවතිනා ගැටලුකාරී තත්ත්වයන් පහත ආදර්ශයන් උපයෝගීකොට ගනිමින් නිරාකරණය කර ගැනීමට ඔබ සමත් විය යුතුය. වරලත් වාස්තු විද්‍යාඥයන් සහ ලියාපදිංචි වාස්තු විද්‍යාඥයන් වශයෙන් සුදුසුකම් ලත් ශිල්පියෝ දෙයාකාර වුවද, බොහෝ විට මේ දෙදෙනාම නිවාස සැලසුම් සකස් කරන්නේ ඉන්ජිනේරු වාස්තු විද්‍යාවට අනුකූලවය. එහිදී වාස්තු දෝෂ පිළිබඳ අවධානයට නොයෙදෙන හෙයින් වාස්තු දෝෂ රහිතව තම ඉඩමේ ගොඩනැඟිලි සැලසුම ගෙබිම මත යෝග්‍ය අයුරින් දිශා ගතකර ගැනීම සඳහා ජ්‍යොතිෂය වාස්තු විද්‍යාඥයකු මඟින් කටයුතු සිදුකර ගතයුතු බවද විශේෂයෙන් සඳහන් කළ යුතුය.

ගිනිකොන දිශාවට ගෙයි මුල්ලක් යොමු වන සේ දිශා ගතකොට ගෙය තැනීම මහා දෝෂයක් බව වාස්තු විද්‍යාවේ පෙන්වා දී ඇත. එහි විපාක වශයෙන් ජන්මියා ශීඝ්‍රයෙන් පරිහානියට ගොස් වැඩි කාලයක් යන්නට මත්තෙන් නිවෙස පාළු වීම සිදුවන බව අත්දැකීමෙන් මා අත්විඳ ඇත. මෙසේ ඔබගේ නිවෙසේ එක මුල්ලක් ගිනිකොන දිශාවට යොමු වූ විට අනෙකුත් මුළු තුන ඊශාන, වයඹ සහ නිරිත දිශාවට යොමු වන අතර, සමහර වාස්තු දෝෂ නිවෙස තැනීමෙන් පසුව වුවත් නිදොස් කරගත හැකි වුවත්, මේ දෝෂය නැවැත වෙනස් කිරීමට නොහැකි වීම මෙහි පවතින විශේෂත්වය වෙයි. එනිසා මුල් සැලැසුමේ පටන් කල්පනාකාරීව දෝෂ ඉවත් කර හෝ මඟහරවා ගැනීමෙන් නිවාස වාසීන්ගේ සතුට, සැපත වැඩිදියුණු වන අතරම, අනවශ්‍ය වියදම්, අසහන ආදී අපහසුතාවන්ද මඟහරවා ගතහැකි බව දතයුතුය.

වාස්තු විද්‍යාවේදී,
කේ.පී. ක්‍රිෂාන්ත ප්‍රියදර්ශන