මේ වන විටත් ඔබ භද්ර යෞවනයේ සෞන්දර්ය චාරිකාවේ සැරිසරණ තරුණයකු හෝ තරුණියක් විය හැකිය. තාරුණ්යයේ එළිපත්ත පාගන්ඩ සිතට කාන්දු වන පෙම් සිතුවිලිවල කෙළවරක් නැත. ලොව අති සුන්දරම මහා වස්තුව ස්ත්රිය වෙයි. ගැහැනියක් නැති තැන ඝන අඳුරුපටලයකින් වැසී ඇත. දැන් අපි කතාබහ කරන්නට සූදානම් වන්නේ තාරුණ්යයේ ප්රේමය පිළිබඳවයි. ප්රේමයට මුල පුරන්නේ නම් දෙදෙනා මුලින්ම හරි හැටි හදවතින්ම දැනහඳුනා ගතයුතු වෙයි. ප්රේමය ස්ථාවරත්වයට පත්වන්නේ (Art of Love) ප්රේම කිරීමේ කලාව හරිහැටි දෙදෙනාම හඳුනා ගැනීමෙනි. තරුණ වියේ පෙම් කිරීමේදී හැසිරීම්වලට පමණක් හුදෙක්ම වහල් වියයුතු නොවේ. විශේෂයෙන්ම පෙම්වතිය තමාගේ ජීවිතයේ ඇතුල් පැත්ත ගැන දැඩි සේ ආත්ම විශ්වාසයෙන් යුතුව සිතිය යුතුයි. ඕනෑම පෙම්වතකුට සිය පෙම්වතිය සමඟ සහ සබඳතා ගොඩනඟාගෙන සිටින අතර, ඇයගෙන් වෙන්වී යෑමට ඉතාම පහසු වෙයි.
නමුත් පෙම්වතියට එසේ නොකළ හැක්කේ තමා සමාජය තුළ යම් යම් දෝෂ දර්ශනයකට ලක්වීම නිසාය. ප්රේමය අත්හැරුණු විට පෙම්වතිය මෙලොව සම්පූර්ණයෙන්ම අතරමං වන්නේය. එය ඉවසා සිටීමට නොහැකි වූ විට හදවතින් හඬා වැළපෙයි. කරකියාගත හැකි කිසිවක් තමා ඉදිරියේ නැති නිසා මානසිකව ඇදවැටේ. සමහර පෙම්වතියන්ගේ ප්රථම ප්රේමය අත්හැරුණු විට දෙලොවක් අතර මානසික සටනකට මැදිවන බැව් පැහැදිලිය.
පාසල් වියේ මෙවැනි ප්රේමයකට අවතීර්ණ වී සිය පෙම්වතා අනපේක්ෂිත අන්දමට තමා තනිකර දමා පලා ගිය විටදී සිය ජීවිතය පවා එපා වන තැනට පත්වීම පුදුමයට කරුණක් නොවනු ඇත.
මේ නිසා සමහරු යන්ත්ර – මන්ත්ර, වශී – ගුරුකම් පසුපස හඹා ගොස් තව තවත් අමාරුවේ වැටෙන බව නම් සක්සුදක් සේ පැහැදිලිය. මනසින් කළ නොහැකි දෙයක් නැති බව තේරුම්ගත යුතුය. එක්තරා පෙම්වතියක් සිය පෙම්වතා වෙනත් තරුණියක් සමඟ පෙම් සබඳතාවක් ගොඩනඟාගත් බැව් දැනගැනීමෙන් අනතුරුව සිත පාලනය කරගැනීමට නොහැකි වූ නිසා සියදිවි හානිකර ගැනීමට පෙළඹුණාය. රාගය මහා ගින්නකි. එය ඇවිලෙනසුලුයි. අද වන විට දුරකතනය ඔස්සේ සෑම නිමේෂයකම වාතලය තුළ පාවෙන ආදර ප්රේම දෙබස් ජාලය පැතිර පවතී.
රුපියල් දහස් ගණන් වැයකර දුරකතනයෙන් පෙම්බස් හුවමාරු, ගනුදෙනු කරන පෙම්වතුන්, පෙම්වතියන් මෙතෙකැයි කියා ගණනය කළ නොහැකිය. රූපය හා කටහඬට වශී වී ආකර්ෂණය වීමේ ප්රවණතාවය වැඩි නිසා රාගය තවතවත් ඉක්මන් වී ජීවිත අවුල් කරවයි. එසේම ඔවුන් මවාගත් සිහින ලෝකවල සැරිසරන බව පැහැදිලිය. කාමය උත්සන්න වීම නිසා සිය නග්න සේයා රූ තම පෙම්වතාට යවමින් කරන ලද ගනුදෙනුවල ප්රතිඵලයක් වූයේ මානසික රෝහලක ගාල්වීමකි.
සමහර පෙම්වතුන් පෙම්වතියන් සේ හැසිරෙන අතරම මොනර දඩයමකටද සැරැසෙයි. එක්තරා තරුණයකු සිය ව්යාපාර දියුණුකර ගැනීම සඳහා තම පෙම්වතිය සමඟ දෙබස් හුවමාරු කරගෙන සබඳතා යුගල (ජොයින්ට් එකවුන්ට්) ගිණුමක් අරඹා මාස කිහිපයකදී ගිණුමේ සුළු මුදලක් ඉතිරි වනසේ ගිණුමේ ලක්ෂ 50කට අධික මුදලක් ආපසු අතට ගෙන පලාගියේය.
ඇය අදටත් මානසික රෝගියෙකි. මේ අන්දමේ සිදුවීම් ඉතාම රහසිගතව ක්රියාත්මක වනු ඇත. ප්රේමය මිරිඟුවක් නොකර ගැනීමට සෑම විටම බුද්ධිමත්ව ක්රියා කළ යුතුයි.
ඇත්ත තිත්තයි බොරුව මිහිරියි.
ප්රේමය නෙල්ලි ගෙඩියක් කරගන්න. දෙහි ඇට හැපෙන තැනට නොයන්න. වගබලා ගැනීමට සිතන්න.
ජ්යොතිෂවේදී ටී. හෙන්රි බෙම්මුල්ල