ඇස් රවටන කේන්දරේ

කෙනකුගේ පලාපල කීම සඳහා කේන්දරයක් අතර ගත්විට ඇතැම් ග්‍රහයෙක් ජ්‍යොතිෂවේදියාගේ ඇස රවටන්නට බලයි. නමුත් එහෙම වන්නේ ආධුනිකයකුට පමණි. පරිණත ජ්‍යොතිෂවේදියා ග්‍රහයකු උච්චව සිටි පමණින් ඔහුගේ උච්ච බලය භාර ගන්නේ නැත. වෙස්වළාගත් සේ ඇතැම් ග්‍රහයෙක් බලවත් මෙන්ම සුබ වූත් ආකර්ෂණීය වූත් මුහුණුවර පෙන්වයි. නමුත් ග්‍රහයකු නීච වූ පමණින්ද, ඒ ග්‍රහයාගේ බලය අවතක්සේරු කිරීමට ඉක්මන් නොවිය යුතුය. හොඳින් සොයා බලා දීර්ඝ වපසරියක් මත පිහිටා ප්‍රතිඵල කථනයට යොමු වීම වැදගත්ය. මේ සඳහා ඔබ මඳකට පහත කේන්දර සටහන ආදර්ශයට ගන්න. (කේන්දර සටහනේ පැහැදිලි කිරීම්වලට අවශ්‍ය ග්‍රහයන් පමණක් භාව ගතකොට ඇත.

මේ කේන්දරයේ ලග්නගත බලවත් කුජ රුචක යෝගය දරයි. ගුරු හෙවත් බ්‍රහස්පතීද, උච්ච බල සහිතව හංස යෝගය දරයි. එයට අමතරව සෙනසුරු ග්‍රහයාද කේන්ද්‍රස්ථාන ගතව සස යෝගය දරයි. පංච මහා යෝගයට අයත් යෝග 3ක්ම කේන්දරයේ වෙයි. එහෙයින් මෙම උච්ච බල සහිත ග්‍රහයන්ගේ බලය මතුපිටින් පෙන්වන ආකාරයට පිළිගත හොත් අපට නිවැරැදි පලාපල කතනයක යෙදිය නොහැකිය. නවාංශක කේන්දරයේද, අඟහරු ස්වක්‍ෂේත්‍රව සිටින බැවින් වර්ගෝත්තම ශක්තියක්ද වෙයි. එහෙත් හත් වැන්නේ සිටින උච්ච ගුරු මේ කේන්දරයේ 22 වැනි දෙර්කාණාධිපතියාය. කුජ 64 වැනි නවාංශකාධිපතියාය. ඒ නිසා කුජ – ගුරු දෙදෙනාම පාපීන් බවට පත්වෙති. මේ හේතුවෙන්ම ජන්මියාට එකම අරමුණක වැඩ කිරීම අමාරු වෙයි.

7 වැන්නේ සිටින උච්ච ගුරු ගැනද බලමු. මෙම ගුරු කේන්දරයේ 7 වැන්නේ ඵලය විනාශ කර තිබේ. 7 වැන්න යනු විවාහ රාශියයි. විවාහ රාශියේ ඵලය හානි කිරීම යනු විවාහය බිඳවැටීමයි. මේ විවාහය බිඳ වැටෙන්නේ බිරියගේ හෝ සැමියාගේ පැවැත්මේ වරදක් නිසා නොවේ. එසේ නම් වැන්දඹු වීමක් හෙවත් විවාහක බිරියගේ ආයු බලය නොපෙන්වීම නිසාය. එයට විවාහ කාරක සිකුරුද උදව් වෙයි. සිකුරු සිටියේ 11 වැන්නේය. 11 වැන්න මේ කේන්දරයට බාධකය. විවාහ කාරකයාම බාධක ග්‍රහයා වීමත්, කලත්‍රස්ථානයේ අයහපත් දෙර්කාණයක් හිමි ග්‍රහයා සිටීමත් නිසා මෙම කේන්දර හිමියාගේ විවාහය බිඳ වැටෙන බව පෙන්වා දිය හැකිය. එසේම බාධක ග්‍රහයා වන සිකුරුත්, 7 වැන්නට දෘෂ්ටි හෙළයි.

එසේම මෙම කේන්දරයේ උච්ච ගුරුට උච්ච කුජගේ දෘෂ්ටිය වැටෙයි. ඒ නිසා දෙදෙනාගේම උච්ච බලය යම් ප්‍රමාණයකින් බිඳ වැටෙයි. ජන්ම කේන්දරය යම් ප්‍රමාණයකින් බලවත්ය. එහෙයින් ජන්මියාද බලවත්ය. ලග්නගත කුජ සතර දිග ජය යෝගයට නෑකම් කියයි. එහෙයින් විදෙස් බල සහිතයි. කුජ සිටින්නේ චර රාශියකත්, කුජ හිමි 4 වැන්නත්, චර රාශියක් බැවිනුත් මව් රටට වඩා ලොව වෙනත් රටවල පදිංචියටද උරුමකම් කියන බවකින්ද යුක්ත වනු ඇත. එසේම මෙහි පවත්නා රුචක යෝගය, හංස යෝගය, ගජකේශරී යෝගය, සස යෝගය, නීච භංග රාජ යෝගය ආදී පවත්නා බලවත් යෝග ජන්මියා පෞරුෂයෙන් කැපී පෙනෙන කෙනකුට දෙවැනි වීමට අකැමැති අභිමානවත් පුද්ගලයකුද බව අඟවන්නකි.

මේ ආකාරයෙන් ගත්කල සත්‍ය වශයෙන්ම ඕනෑම කේන්දරයක අපගේ ඇසට එකවර නොපෙනෙන සුබ – අසුබතා ගැබ්ව පවතී. නමුත් දක්‍ෂ ජ්‍යොතිෂවේදියා කේන්දරය අතට ගෙන කෙමෙන් කෙමෙන් මල නොතළා රොන් ගන්නා බඹරකු සේ මේ කාරණා ජන්මියාට තේරුම්කර දීමට සමත් වීම ඉතාමත් විiාත්මකය.
ජ්‍යොතිෂවේදී කේ.පී. ක්‍රිෂාන්ත ප්‍රියදර්ශන