අතක් බලලා ජීවිත කතාව කියන්නේ කොහොමද

වර්තමාන සමාජය තුළද අතක් බලා ජීවන තොරතුරු දැනගැනීමට ආශා කරන බොහෝ පිරිසක් සිටී. ඒ අයගේ බලාපොරොත්තු ඉටු කිරීම හස්ත රේඛා ශාස්ත්‍රඥයකුගේ යුතුකමකි. එය ඉටු කිරීමට නම් ශාස්ත්‍රඥයා පරිණත අයකු විය යුතුය. එවැනි අයකු පහත සඳහන් ක්‍රමයන්ට හස්ත රේඛා පරීක්‍ෂාවක් කළහොත් ඉතා නිවැරැදිව පලාපල කිව හැකි බව අපගේ දිගුකාලීන පරීක්‍ෂණයන් තුළින් ඔප්පු වී ඇත. අතක් බලා පලාපල කීමේදී සැලකිය යුතු කරුණු බොහෝය. එම කරුණු අතර ප්‍රධාන වන්නේ තමා අත බලන අත කුමන අත් වර්ගයකට අයත් එකක් දැයි සොයා ගැනීමය. අත් වර්ග අනුව කෙනකුගේ ගතිගුණ අදහස් සිතුම් – පැතුම් එකිනෙකාට වෙනස් වන බැවිනි.

ඊළඟට බැලිය යුත්තේ ප්‍රධාන රේඛාවන් පිළිබඳවයි. හස්ත රේඛා ශාස්ත්‍රයට අනුව ප්‍රධාන රේඛාවන් වන්නේ ජීවන, ශීර්ෂය, හෘදය, දෛවය, රවි හෙවත් සූර්ය රේඛාව, බුධ රේඛාවන්ය. මෙම රේඛාවන්ගේ බල දුබලතාවයන්ට අනුව ඒ ඒ අයගේ ආයුෂය, නිරෝගීකම, ගුණයහපත්කම, වාසනාව හෝ අවාසනාව වැනි කරුණු පිළිබඳව අවබෝධයක් ලැබිය යුතුය. රේඛාවන්ගේ කැඩීම්, බිඳීම්, පලුදුවීම් අනුව ඒ අයගේ හදිසි අනතුරු, මාරක විපත් ආදිය වෙන කාලයන් හඳුනා ගතහැකිය. ඊළඟට ග්‍රහ මණ්ඩලයන්ගේ පිහිටීමට විශේෂ ස්ථානයක් හිමි වෙයි. ග්‍රහ මණ්ඩල වන්නේ රවි, බුධ, ශනි, ගුරු, සිකුරු, සඳු හා කුජ යන මණ්ඩලයන්ය. මෙහිදී කුජට පමණක් ග්‍රහ මණ්ඩල දෙකක් හිමි වන බව ශාස්ත්‍රය පෙන්නා දෙයි. කුජ කලාව වශයෙන් කොටසක්ද වෙන් කර තිබේ. රාහු හා කේතුටද ග්‍රහ මණ්ඩල දෙකක් වෙන්කර තිබුණද වර්තමාන සමාජයේ ඒ පිළිබඳව විශේෂ අවධානයක් යොමු කරවන බවක් දක්නට නොලැබේ.

මෙම ග්‍රහ මණ්ඩලයන්හි බල – දුබලතාවයන්ට අනුව ඒ ඒ අයගේ අධ්‍යාපන මට්ටම, ගතිගුණ, රැකියාවන් හා මානසික ගුණාංග බොහෝ දුරට වෙනස් වන බව පෙනේ. ග්‍රහ මණ්ඩලයන්ගේ බල – දුබලතාවයන්ට අනුව ඒ ඒ අයගේ සමාජ මට්ටම වෙනස් වෙයි. මීළඟට බැලිය යුත්තේ අත්ලේ වැටෙන අප්‍රධාන රේඛාවන් පිළිබඳවයි. අප්‍රධාන රේඛාවන් හැටියට ගණන් ගන්නේ කුජ රේඛාව, පරධන රේඛාව, සහෝදර හා දරුඵල රේඛා, සොලමන්ගේ මුද්ද, ගුප්ත කතිරය, සංචරන රේඛා, සුඛ මේඛලාව හෙවත් ශනි චක්‍රය, විවාහ රේඛා, මණිබද්ධ රේඛා, ශාස්ත්‍රීය රේඛා වැනි රේඛාවන්ය. මෙම රේඛාවන් ප්‍රධාන රේඛාවන්ගේ බලය, ශක්තිය කෙරෙහි බෙහෙවින් බලපායි. මීළඟට බැලිය යුත්තේ ඇඟිලිවල තත්ත්වය, අත්ලේ පාට, හැඩය, වර්ණය හා නියපොතුවල තත්ත්වය පිළිබඳවයි. ඇඟිලිවල අග පුරුක්වල වැටෙන සියුම් සලකුණුද කෙනකුගේ චින්තන ශක්තිය පිළිබඳව තදින් බලපානු ඇත. තවද ප්‍රධාන රේඛාවන් හා ග්‍රහ මණ්ඩලයන් තුළ වැටෙන ළිප, තිත් දැල්, ජාලා හා සුබ සලකුණුවලට අනුව එම ස්ථානයන්ගෙන් නිකුත් වන සුබ හෝ අසුබ පලාපලයන්ගේ තත්ත්වයන්හි වෙනස් වීම් කෙරෙහි තදින් බලපානු ඇත.

ඉහත සඳහන් හස්ත රේඛා සලකුණු හොඳින් නිරීක්‍ෂණය කර පලාපල කීමෙන් අතක් බලා ඉතා නිවැරැදිව පලාපල කිව හැකි බව අපගේ දිගුකාලීන පරීක්‍ෂණයන් තුළින් සනාථ වී ඇත.
ප්‍රවීණ හස්තරේඛා විශේෂඥ ජ්‍යොතිෂවේදී නන්දසේන වීරසිංහ