යෝගය නම් පඤ්චාංගයේ සිව්වැනි අංගයයි. යෝග යන්නෙහි අර්ථයද එක්වීම, සම්බන්ධ වීම යන්නයි. ඖෂධ කිහිපයක් එකතු කිරීම යෝගයක් වශයෙන් ආයුර්වේදයේ හඳුන්වනවා සේම, ව්යායාම මගින් ශාරීරික මානසික සෞඛ්ය රැක ගැනීම යෝග ව්යායාම වශයෙන්ද හඳුන්වනු ලබන අවස්ථාවන් පවතිනු ඇත. මේ අන්දමින් ජ්යොතිෂයේද විවිධ යෝග පෙන්වා දී ඇත. විශ්කම්භාදී සත්විසි යෝග, ආනන්දා දී අටවිසි යෝග, විශිෂ්ට යෝග සහ ග්රහ යෝග දහස් ගණනකි. මින් පඤ්චාංගයට අයත් වන්නේ විෂ්කම්භාදී සත්විසි යෝගයන්ය. ඒ ඒ දිනවල උදාව පවතිනා යෝගය ලිත්වලින් බලා ගත හැකි සේම යෝග 27හි ශුභ අශුභ සහ ඒ එක් එක් යෝගයෙන් උපන් අයගේ ගති ලක්ෂණ අද ඔබට පෙන්වා දීමට කැමැත්තෙමි.
- විශ්කම්භ – යෝගයෙන් උපදින අය මුදු මොළොක් ඉරියව්වලින් යුක්ත වන අතර, මිතුරු මිතුරියන් සමඟ සුහදව කටයුතු සිදු කිරීමේ හැකියාව ඇති එදිනෙදා කටයුතුවල උනන්දුවෙන් යෙදෙන සැමියාගේ හෝ බිරියගේ ආදරය දිනාගෙන යහපත්ව දිවි ගෙවන අයෙකි.
- ප්රීති – යෝගයෙන් උපන් අය ප්රසන්න පෙනුමෙන් සහ ප්රිය මනාප කතා බහෙන් සමාජයේ කැපී පෙනෙන අතර, ඥාන ශක්තිය, ධාරණ ශක්තිය යහපත් බැවින් ශිල්ප ශාස්ත්රාදියේ උසස් දියුණුවක් ලබයි.
- ආයුෂ්මන් – ගුණ යහපත් සාධාරණ හැඟීම්වලින් යුතු ස්වභාව දහමට ඇලුම් කරන නිරහංකාර ජන්මියකු ඇති කරයි.
- සෞභාග්ය – යෝගයෙන් උපදින විට ධනයෙන් බලයෙන් බුද්ධියෙන් යුතු අය ගුණ යහපත්කමින් සත්යවාදී බවින් සමාජයේ ප්රභූත්වයක් ලබන උත්තමයන්ය.
- ශෝභන – යෝගයෙන් උපදින අය ප්රසන්න පෙනුමෙන් යුතු පරිත්යාගශීලී දක්ෂ බුද්ධිමතුන්ය.
- අතිගණ්ඩ – යෝගයෙන් උපන්නෝ කරදර මධ්යයේ කල් යවන විරූපී හෝ අංගවිකල කලහකාරී පුද්ගලයන්ය.
- සුකර්ම – යෝගයෙන් උපදින අය ක්රියාශීලී, උපක්රම ශීලී, කලා කුසලතාවලින් යුතු සමාජ සේවයට කැමැති අය වෙති.
- ධෘති – යෝගයෙන් උපන්නෝ කාර්යයබහුල විවිධ අංශවලට දක්ෂ ආගමික භක්තියෙන් යුතු සංවේදී පුද්ගලයන් වෙති.
- ශූල – මෙවැන්නෝ උදරාබාධවලින් පෙළෙන ගුණ නැණ හීන අහංකාර අශෝභන, සමාජයෙන් කොන්වන පුද්ගලයන්ය.
- ගණ්ඩ – යෝගයද සැරපරුෂ, ප්රකෝපකාරී නෑ හිත මිතුරන් අඩු, දුරාචාරයට පොලඹවන අසත්පුරුෂයන් උපදවයි.
- වෘද්ධ – බොහෝ ඇසූපිරූ තැන් ඇති අයෙකුගේ ගති ඉරියව් පෙන්නුම් කරන රූපයෙන්, ධනයෙන්, බලයෙන් යහපත් සමාජ තත්ත්වයෙන් යුතු ජන්මියකු වෙයි.
- ධෘව – යෝගයෙන් උපදින අය දැනුමෙන් බුද්ධියෙන්, චතුර කථිකත්වයෙන් ධන සම්පත්, දරු සම්පත් හිමි වාසනාවන්ත අයයි.
- ව්යාඝාත – ප්රාණ ඝාතයට කැමැති, මස් මාංස අනුභවයට කැමැති, කරුණාව දයාව අනුකම්පාව අඩු, සිතේ සතුට සහනය නොලබන අසත්පුරුෂයන්ය.
- හර්ෂණ – යෝගයෙන් උපදින අය රන් රිදී ආභරණ, මිල මුදල් ලබන රතු වස්ත්රවලට ප්රිය කරන, කාන්තිමත් දේහයකින් යුතු බැබළෙන වාසනාවන්තයෝය.
- වජ්ර – යෝගයෙන් උපදින්නෝ සියලු සැප සම්පත්තීන් බුක්ති විඳීමේ භාග්යයෙන් යුතු, දනට පිනට කැමැති ප්රසන්න පුද්ගලයන්ය.
- සිද්ධි – යෝගයෙන් උපදින අය සිතන පතන සැම දෙයක්ම නිරායාසයෙන්ම සාර්ථක කර ගනු ලබන, රූපයෙන්, ධනයෙන්, ඥානයෙන් යුතු භාග්යවන්තයෝය.
- ව්යතිපාත – අන් අයගේ පීඩාවන්ට ලක් වන , නිතර රෝගාබාධයන්ට හෝ අනතුරුවලට ලක් වන, දුගතියට පහසුවෙන් යොමුවන අවාසනාවන්තයන්ය.
- වාර්යන් – ගුණ යහපත්, සාධාරණ, කාරුණික හැඟීම්වලින් යුතු පාලනයෙහිද දක්ෂ සමාජයට රටට හිතවත් දේශ ප්රේමියකු බිහි කරයි.
- පරිඝ – කතා බහ අඩු, හොර බොරු කරන සුරා සූදු දුෂ්චරිතවලට පෙලඹෙන, නපුරු අය උපදිති.
- ශිව – යෝගයෙන් උපන්නෝ තෘප්තිමත් මෙන්ම ගෞරවනීය විවාහයක් මෙන්ම වාසනාවන්ත දරුවන් ලබන, ගුප්ත ශාස්ත්ර, දේව භක්තිය විශ්වාස කරන තැන්පත් අය වෙති.
- සිද්ධ – යෝගයෙන් උපන් අයට බලාපොරොත්තු පහසුවෙන් සාර්ථක කර ගැනීමේ හැකියාව පවතී. ගුණ නුවණින් යුතු පින්වන්තයෝ ය.
- සාධ්ය – යෝගයෙන් උපන්නෝ රූපයෙන්, ධනයෙන් මෙන්ම ඥාන ශක්තියෙන්, ධාරණ ශක්තියෙන් යුතු බුද්ධිමතුන්ය.
- ශුභ – යෝගයෙන් උපදින ජන්මියා උනන්දුව උත්සාහය ඇති ප්රිය වචන කතා කරන, යහපත් අදහස් ඉදිරිපත් කරන හැම දෙයක්ම ශුභවාදීව බලන අයෙකි.
- ශුභ්ර – ගුණ යහපත්, තැන්පත්, ආත්ම ගෞරවය ආරක්ෂා කරන පතිවත රකින සතුරන්ගෙන් ජය ලබන අයකු උපදියි.
- බ්රහ්ම – යෝගයෙන් උපදින්නේ පෙර කරන ලද කුසල් බලයෙන් මෙලොව සැප සම්පත් භුක්ති විඳීමේ වාසනාවෙන් යුතු අනුන්ට යටත් නොවන තත්ත්වයේ අයයි.
- මහේන්ද්ර – යෝගයෙන් කීර්තිය ප්රසිද්ධිය ලබන වැදගත් සමාජ මෙහෙවරක යෙදෙන සත්යවාදී, ත්යාගශීලී ශ්රේෂ්ඨයන් බිහි කරයි.
- වෛධෘති – යෝගයෙන් අනුකම්පාව අඩු, කරුණාව අඩු, උපායශීලී කපටි පුද්ගලයන් බිහි කරයි.
මේ ආකාරයෙන් දක්වන්නට යෙදුණු යෝගයන්ට අදාළව උපන් යෝගයට අදාළ ඔබගේද ගති ලක්ෂණයන් ඉහතින් පෙන්නනවා ඇත. ඔබගේ උපන් යෝගය පිළිබඳ නිසි අවබෝධයෙන් දී ඇති ගති ලක්ෂණයන් කෙබඳුදැයි ඔබ, ඔබ පිළිබඳවම අවංකව අවබෝධයක් ලබා ගන්න.
ජ්යොතිෂවේදී කේ.පී. ක්රිෂාන්ත ප්රියදර්ශන සුරවීර
