මේ සතියේ ඔබට මොකද වෙන්නේ?

2019 අගෝස්තු 11 ඉරිදා සිට 17 සෙනසුරාදා දක්වා

මේෂ
අවිවේකී සතියක්
ඔබගේ ලග්නාධිපති කුජ පස්වැන්නේත්, සඳු 9, 10, 11 භාව හරහාද ගමන් ගනිමින් ගෙවී යන මේ සතිය ඔබට කාර්යබහුල අවිවේකී බවෙන් යුතුව ගෙවී යයි. වෙනදාට වඩා අතමිට මුදල් ගැවසෙන අතර කලක් බලාපොරොත්තුවෙන් සිටි වැඩ කොටසක් නිමකර ගැනීමට හැකිවේ. ඥාතියකුගේ වියෝවක් නිසා දුකට පත්වීමටද සිදුවේ. හදිසි අනතුරුවලට මුහුණපෑමට ඇති බැවින් කල්පනාකාරී වන්න. දරුවන්ටද නොයෙක් අසනීප වැලඳිය හැකි සතියකි.
ජය අංකය – 5, ජය වර්ණය – කහ පාට.

වෘෂභ
විශ්වාසය බිඳවැටේ
මෙතෙක් ඔබ කෙරෙහි තිබුණු විශ්වාසය බිඳවැටෙන ආකාරයේ සිදුවීමක් මේ සතිය තුළදී සිදුවිය හැකි බැවින් දුරදිග බලා කටයුතු කරන්න. ලග්නාධිපති සිකුරු 3, 4 භාව හරහාද, සඳු 8, 9, 10 භාව හරහාද ගමන් ගනී. වරින්වර අසනීප ගති මතුවිය හැකිය. ගෘහ ජීවිතයේ සතුට සැනසීම අඩුවන කාලයකි. විදෙස්ගතව සිට පැමිණි ඥාතියකු සමඟ ඇවිදීමට සිදුවන බැවින් අවිවේකී ලෙස කාලය ගෙවේ.
ජය අංකය – 05, ජය වර්ණය – සුදු පාට.

මිථුන
ප්‍රසිද්ධිය
මේ සතිය තුළදී ඔබ ගැන ප්‍රසිද්ධියක් සමාජය තුළ ඇතිවන බවක් පෙනෙන අතර සඳු 7, 8, 9 භාව හරහාද ලග්නාධිපති දෙවැන්නේද ගමන් ගනී. කලක සිට කරගෙන ආ වැඩක නිසි ප්‍රතිඵල ලැබෙන කාලයකි. අලුත් හිත මිතුරන් කීපදෙනකුම හඳුනා ගැනීමට අවස්ථාව සැලසේ. ගුප්ත විද්‍යා කටයුත්තකින් නිසි ප්‍රයෝජන ලබාගත හැකිවේ. අධ්‍යාපන කටයුතුවල යෙදී සිටින මිථුන ලග්න හිමියන්ට අලුත් අලුත් කරුණු හොඳින් තේරුම් ගැනීමට හැකිවන කාලයකි.
ජය අංකය 02, ජය වර්ණය – රන්වන් පාට

කටක
ස්වාධීනව කටයුතු කරයි
බාහිර බලපෑම්, අනුන්ගේ උපදෙස් ගණන් නොගෙන ස්වාධීනව කටයුතු කර ජයග්‍රහණ අත්කර ගන්නා සතියකි. ලග්නාධිපති සඳු 6, 7, 8 භාව හරහා ගමන් ගනී. ජීවිත කාලයටම අමතක නොවන විශේෂ ජයග්‍රහණයක් අත්කරගෙන තමන්ගේ තත්ත්වය උසස් කරගනී. පදිංචි ස්ථානයේ වෙනසක් සිදුවීමටද ඉඩ තිබේ. දරුවකුගේ අසනීප ගතියක් නිසා දුකට පත්වීමටත් කරගෙන යන අනෙකුත් කටයුතු කලට වේලාවට කරගෙන යෑමටත් නොහැකි විය හැකිය.
ජය අංකය – 07, ජය වර්ණය – ළා කහ පාට

සිංහ
මුරණ්ඩු ගතිගුණ
වෙනදාට වඩා හිතුවක්කාර, මුරණ්ඩු ගතිගුණ සිතට පහළ විය හැකි බැවින් ඉතාමත් ඉවසීමෙන් සාමකාමීව වැඩකටයතු ඉටුකිරීමට වගබලා ගන්න. ඔබගේ ලග්නාධිපති රවි 12, 1 භාව හරහාද සඳු 5, 6, 7 භාව හරහාද ගමන් ගනිමින් සතිය ගෙවී යයි. සිත් තැවුල්, කරදර නිතර ඇතිවන ශරීර සෞඛ්‍ය පිරිහෙන කාලයක් වුවද වැඩකටයුතු අධික බැවින් නිසි ප්‍රතිකාර පවා ලබාගැනීමට නොහැකි වේ. ලාභ බලාපොරොත්තුවෙන් මුදල් වියදම් කරන වැඩකින් පාඩුවක් විඳීමට සිදුවේ.
ජය අංකය – 03, ජය වර්ණය – රතු පාට

කන්‍යා
දියුණුව සැලසේ
ලග්නාධිපති බුධ අයස්ථානය වන 11 වැන්නේද, සඳු 4, 5, 6 භාව හරහාද ගමන් ගනිමින් ගෙවී යයි. මේ සතිය තුළදී ඔබගේ වැඩකටයුතුවල විශේෂ දියුණුවක් සැලසෙන බව පෙනේ. කාර්යබහුල වුවද ආදායම් තත්ත්වය යහපත් වී මුදලක් ඉතිරිකර ගැනීමට අවස්ථාව සැලසේ. කලක් අසනීපයෙන් පසුවූ කන්‍යා ලග්න හිමියන්ට සුවය ලැබී නැවත එදිනෙදා වැඩකටයුතුවල නියැලීමට අවස්ථාව උදාවේ. ඉගෙනීමේ කටයුතුවල යෙදෙන අයට උසස් අධ්‍යාපන කටයුතුවලට යොමුවීමට අවස්ථාව ලැබේ.
ජය අංකය – 02, ජය වර්ණය – දම් පාට.

තුලා
ආදර බන්ධන
අවිවාහක තුලා ලග්න හිමියන්ට මංගල යෝග උදාවන අතර විවාහක අඹු සැමියන් අතර සාමය සමගිය ඇතිවී ගෘහ ජීවිතය සතුටින් ගෙවී යයි. ලග්නාධිපති සිකුරු 10, 11 භාව හරහාද, සඳු 3, 4, 5 භාව හරහාද ගමන් ගනී. රැකියා ව්‍යාපාර ආදියෙහි දියුණුවක් ඇතිවී අතමිට සරු වුවද ඊර්ෂ්‍යාකරුවන් නිසා යම් යම් හානිද සිදුවිය හැකි බැවින් කල්පනාකාරී වන්න. සතිය මුලදී ඇතිවන හෘද රෝගයක් නිසා ප්‍රතිකාර ගැනීමට සිදුවිය හැක.
ජය අංකය 01, ජය වර්ණය – කොළ පාට

වෘශ්චික
සිත් වේදනා
මේ සතිය තුළදී ඔබට නොයෙකුත් සිත් වේදනා විඳීමට සිදුවන අතර ලග්නාධිපති කුජ 10 වැන්නේද, සඳු 3, 4 භාව හරහාද ගමන් ගනී. වැඩිහිටියකුගේ වියෝවක් සිදුවිය හැකි කාලයකි. මුදල් ගනුදෙනුවකින් බලාපොරොත්තු නොවූ ලෙස පාඩුවක් සිදුවිය හැකිය. දරුවකුගේ අවශ්‍යතාවක් වෙනුවෙන් මුදලක් වැය කිරීමට සිදුවේ.
ජය අංකය – 01, ජය වර්ණය – දුඹුරු පාට.

ධනු
මුදල් ලාභයක්
සඳු 1, 2, 3 භාව හරහාද ලග්නාධිපති ගුරු 12 වැන්නේද ගමන් ගනිමින් ගෙවීයන මේ සතිය තුළදී ඔබට හදිසි මුදල් ලාභයක් ඇතිවිය හැකි බැවින් ලොතරැයි ආදිය මිලදීගෙන වාසනාව උරගා බැලීම සුදුසුය. ව්‍යාපාරික කටයුතුවල යෙදී සිටින ධනු ලග්න හිමියන්ට විශේෂ ලාභ අත්වන කාලයකි. රැකියා ස්ථානයේ වගකීම් හරියාකාරව ඉටුකිරීමෙන් ඉහළ නිලධාරීන්ගේ පැසසුමට ලක්වේ. ශරීර සෞඛ්‍යය යහපත්ව පවතී.
ජය අංකය 02, ජය වර්ණය – කොළ පාට.

මකර
ආදායම අඩුවේ
ඔබගේ ආදායම් තත්ත්වය පැහැදිලි ලෙස අඩුවන සතියක් වන අතර ලග්නාධිපති ශනි වැය ස්ථානය වත දොළොස්වැන්නේද සඳු 12, 1, 2 භාව ස්ථාන හරහාද ගමන් ගනී. වියදම් ත්ත්වය වැඩි වී තැන්පත් ධනයෙන් මුදලක් ලබාගැනීමට සිදුවිය හැකියි. අධ්‍යාපන කටයුතුවල යෙදී සිටින මකර ලග්න හිමියන්ට නව විෂය කරුණු පිළිබඳව දැනීමක් ලබාගැනීමට යහපත් මගපෙන්වීමක් ලැබෙන සතියකි. සෙම් රෝග, උගුරේ ආබාධ ඇතිවිය හැකිය.
ජය අංකය – 09, ජය වර්ණය – සුදු පාට.

කුම්භ
සහෝදරයකුට අපලයි
මේ සතිය තුළදී ඔබගේ සහෝදරයකුට හෝ සහෝදරියකට සිදුවන කරදරයක් වෙනුවෙන් වෙහෙසීමට සිදුවන අතර ලග්නාධිපති ශනි අය ස්ථානය වන 11 වැන්නේද, සඳු 11, 12, 1 වැනි භාව හරහාද ගමන් ගනී. බලාපොරොත්තු රහිත දුර ගමනක් හදිසියේ යෙදෙන අතර එයින් ඔබට තරමක මුදල් අලාභයක් ඇතිවේ. මෙතෙක් කරගෙන ආ කටයතුවල වෙනසක් සිදුවන අතර එය බොහෝ විට ඔබගේ යහපත පිණිස හේතුවේ. සති අන්තය වන විට උදරාබාදයක් ඇතිවිය හැකිය.
ජය අංකය – 04, ජය වර්ණය – නිල් පාට.

මීන
ව්‍යාපාර දියුණුවක්
ලග්නාධිපති ගුරු පුණ්‍යස්ථානය වන නව වැන්නේද, සඳු 10, 11, 12 භාව හරහාද ගමන් ගනිමින් සතිය ගෙවීයයි. රැකී රක්ෂා කටයුතු, වෙළෙඳ ව්‍යාපාර ආදියෙහි දියුණුවක් ඇතිවන කාලයකි. ආදායම කෙතරම් යහපත් වුවද ඔබට මේ සතිය තුළදී මුදලක් ඉතිරි කරගැනීමට නම් නොහැකි වේ. ස්ථීරවූත්, ප්‍රයෝජනවත්වූත් දෙයකට ලොකු මුදලක් යෙදවීම සඳහා දැඩි උත්සාහයක් දරන අතර බොහෝ විට එම උත්සාහය සාර්ථක වේ. ලිපි ලේඛන කටයුතුවල යෙදෙන මීන ලග්න හිමියන්ට විශේෂ ප්‍රසිද්ධියක් ඇතිවන සතියකි.
ජය අංකය – 09, ජය වර්ණය – ළා නිල් පාට.
ජ්‍යොතිෂ විද්‍යා විශාරද ජ්‍යොතිෂ ශිරෝමනී දේශබන්දු අගලවත්තේ චන්දන වීරක්කොඩි
0775489695