විසිරුණු ජීවිතයට වාස්තු සැනසුම

ශමල්ට රන්දි හමුවූ සමයේ ඇය ආධුනික ගායිකාවක්. කිසිදු ලාභ ප්‍රයෝජනයක් නොතකා ශමල් කළ උදව් සහ ලබා දුන් සහයෝගයෙන් රන්දි ප්‍රසිද්ධ ගායිකාවක් බවට පත්විය. වසර ගණනක හිතවත්කම ආදරයකට පෙරළී රන්දි සාමාන්‍ය පුද්ගලයකු වූ ශමල්ව විවාහ කරගත්තේ ව්‍යාපාරිකයන්, කලාකරුවන්, දේශපාලනඥයන් බොහෝ දෙනෙකුගේ විවාහ යෝජනා ඉවත දමමිනි. සංගීත දිවියේ පහසුව තකා අගනුවරට ආසන්නව ගංගාවක් සමීපව පිහිටි මනරම් පරිසරයක තනා තිබූ අලංකාර නිවෙසක් මිලදී ගත්තේ කුලී නිවාස ජීවිතයට සමුදෙමිනි.
නිවෙසේ පදිංචි වී ටික කලෙකින් කිසිදු හේතුවක් නොමැතිව දෙදෙනා අතර නිතර අඬ දබර මතුවිණි. රන්දිගේ ජනප්‍රියතාව දවසින් දවස අඩුවිය. එළිදැක්වූ ගීත ඇල්බමද ජනප්‍රිය නොවීය. මූල්‍ය ගැටලු බහුල විණි. ගැටුම් උත්සන්න වී රන්දි, ශමල් හැර දා මහගෙදර පදිංචියට ගියාය. ශමල් නිවෙසේ තනි විණි. සාර්ථකත්වයේ සිටි යුවළක් අසාර්ථකත්වයට පත්ව, පවුල් ජීවිතය සුනුවිසුනු වන තත්ත්වයකට ඇද වැටීම නිවෙසේ වාස්තු පරීක්ෂා කිරීමට හේතු විණි. නිවෙසේ සහ ඉඩමේ කොටසින් කොටස පරීක්ෂා කිරීමේදී රන්දි සහ ශමල්ගේ ජීවිත බිඳ වැටීමට හේතු වූ වාස්තු දෝෂ සොයා ගැනීමට මට හැකිවිය. පැවැති වාස්තු දෝෂ ඉවත්කොට සාර්ථකත්වයට පැමිණීමට මා උපදෙස් ලබා දුන්නේ මෙසේය.

ස්තම්භ දෝෂය
ස්තම්භ යනු කණුවක් හඳුන්වන ලබන සමාන වචනයකි. වාස්තු පුරුෂයාගේ හදවත නිවෙසේ හරි මැද වූ බ්‍රහ්ම පාදයයි. මෙම නිවෙසේ බ්‍රහ්ම පාදය පැවැතියේ සාලය තුළ වූ කණුවක් තුළය. බ්‍රහ්ම පාදය මත ඉදිකිරීම ඉතා අසුබ වෙයි. බ්‍රහ්ම පාදය මත කණුවක් පැවැතීම නිවෙසියන්ගේ හෘදය මත ඇණයක් ගැසීමට උපමා කළ හැකිය. නිවෙසක මෙලෙස පිහිටි විට පවුල් ජීවිත කඩා කප්පල් වීම සිදුවේ. හේතුවක් නොමැතිව අඬදබර ඇති වෙයි. ශමල්, රන්දිට වූයේ එයයි. හෘදයාබාධ වැනි රෝග වැලඳෙයි. නිවෙසේ බර දරන කණුවක් ඉවත් කිරීම අපහසු බැවින් නිවෙසට නව කොටස් එකතු කොට බ්‍රහ්ම පාදය සාලයේ නිදහස් තැනකට එන පරිදි සකස් කර දෝෂය ඉවත් කළේය.

කුස්සියේ ළිප
මර්මස්ථාන රේඛාවකට කැපීම මෙම නිවෙසේ කුස්සියේ ළිප නිවෙසේ හරි මැදින් ගමන් කරන මර්මස්ථාන රේඛාවකට කැපිණි. කුස්සියේ ළිප හෝ පෝරනුව මර්මස්ථාන රේඛාවකට කැපීමෙන් නිවෙසක උයාගත් බත් පත කන්නට නොහැකි වාතාවරණයක් උදාවේ. නිවෙසේ බිරිඳ නිරන්තරයෙන් පීඩාවට පත්වෙයි. නිතර අඬදබර ඇති වී පවුලේ සමගිය සමාදානය නැතිවේ. දික්කසාද, පවුල් ජීවිතය සීසීකඩ යයි. මර්මස්ථාන රේඛාවකට පෝරනුව, ළිප නොකැපෙන පරිදි නිවෙසට කොටසක් එකතු කොට දෝෂය ඉවත් කළ හැකිය.

ව්‍යංජනාකාර භූමිය
ව්‍යංජනාකාර භූමියක් යනු පොරොව හැඩයේ ඛ හැඩැති ඉඩමකි. ශමල්, රන්දිගේ නිවෙස පිහිටි ඉඩම පැවැතියේ සෘජු කෝණාස්‍රාකාර හැඩයකටය. නමුත් යාබද ඉඩමත් මිලදී ගැනීමත් සමඟ ඉඩම පොරොව හැඩයක් බවට පත් විය. ප්‍රතිඵලය නිවෙසියන්ගේ ජීවිත කෙසෙල් දල්ලක් වරින්වර කපා දමා, දලු ලනවා සේ කැපි කැපී වැටීමයි. ජීවිත අසාර්ථක වී බංකොලොත් බවට පත්වෙයි. පවුල් ජීවිත සීසී කඩ වෙයි.
ඉඩමේ මායිම් වෙන්කොට පොරොව හැඩ දෝෂය ඉවත් කළේය. සියලු දෝෂ ඉවත් කිරීමෙන් පසු ශමල් සහ රන්දි සමාදාන වී නිවෙසේ පදිංචියට පැමිණි අතර, රන්දි නැවැත ජනප්‍රිය වී සාර්ථකත්වයට පත්ව ශමල් සමඟ සතුටින් ජීවත් වෙයි.
ජ්‍යොතිෂවේදී අමාලි අගස්පතිරණ