විවාහය ඉක්මන් කරන ලේසි පහසු ක්‍රම

වත්මන් සමාජයෙහි මූලික ප්‍රශ්නයක් බවට පත්වී ඇත්තේ විවාහයයි. සති අන්ත පුවත්පත් මෙන්ම අන්තර් ජාලය හරහාද මංගල යෝජනා විශාල සංඛ්‍යාවක් දක්නට ඇත. සියලුම සුදුසුකම් ඇතත් නිසි කල වයසට ගැළපෙන සාර්ථක යුගදිවියකට පා තැබීමට නොහැකි වනතැනට කරුණු යෙදී තිබේ. මෙය පෙර කරන ලද එක්තරා පාපකර්මයක් දැයි යන මතයක්ද ගොඩනැඟී තිබේ.
ජ්‍යොතිෂ විද්‍යාත්මක වශයෙන් ගැඹුරින් නිරීක්ෂණය කරනවිටදී ලග්නය, දෙවැන්න, තුන්වැන්න සහ එකොළොස්වැන්නද විවාහයට බලපෑම් කරන ස්ථානයන්ය. 7 වැන්න සෘජුවම යුගදිවියට කේන්ද්‍රස්ථානය වන්නේය.
විවාහය ඉක්මන් වීමත්, ප්‍රමාද වීමත් කෙරෙහි කුජ, සඳු, ශුක්‍ර, ශනි යන ග්‍රහයන්ගේ හැසිරීම් රටාවට අනුගත වෙයි.
සිකුරු7 වැන්නේ හෝ 11 වැන්නේ නම් විවාහය ප්‍රමාද නොවේ. සිකුරුගේ රාශිය වන වෘෂභගෙන් තුලාවෙහි කුජ තැන්පත්ව සිටීමෙන්ද කඩිනම් යුගදිවියකට මඟ පෑදෙයි.
ශනිට ශුක්‍ර පෙනීමත්, සඳුත් විවාහ ප්‍රමාදයට හේතුවයි. කුජට ශනිගේ පෙනීම නිසාද යුග දිවියට ඉක්මන්කමක්ද ඇති වෙයි. ශනිට ශුක්‍ර පෙනීම හරහාද විවාහය ප්‍රමාද වනු ඇත.
7 වැන්නාධිපති නීච නම් විවාහය අවුල් වනු ඇත. රවි 9 වැන්න තුළ තැන්පත්වීමද විවාහය පමාවීමට හේතු කාරක වෙයි. 7 වැන්නේ කුජ වෙනත් පාපී ග්‍රහයන් දැකීම නිසාද යුග දිවිය කල් යයි. බුධ පාපී සංයෝගව 7 වැන්නේ වීමෙන්ද විවාහය කල්ගත වෙයි.
ශනි සමඟ ශුක්‍ර යෝගවීමද සඳු සමඟ ශනි සිටීමද එයට තවත් හේතුවකි.
රාහු පාප සංයෝගවීම නිසාද කේතු 7 සිටි විටද පාපියකු 3-11 වැන්න තුළ වීමද යුග දිවිය ප්‍රමාද කරනු ඇත.
ශනි 4 වැන්නේ සඳු සමඟ වීම විවාහයට නොවැදගත් වන එක්වීමකි.
විවාහකාරක ශුක්‍ර හතර කේන්දරයේ සිටියදී ඊට 7 වැන්නේ ශනි සිටීමෙන්ද යුගදිවිය කඩිනම් කරයි.
කුටුම්බක ස්ථානයේ 2 වැන්නාධිපතියා 11 වැන්නේ ලග්නාධිපතියා 10හි පිහිටා ඇත්නම් යුගදිවිය කඩිනම් වෙයි.
7 අධිපතියාගේ සිකුරු කේන්ද්‍රගතව පිහිටීමෙන්ද යුගදිවිය ඉක්මන් වෙයි. මෙම යෝගය 5 වැන්නේ හෝ 9 වැන්නේ යෙදී ඇත්නම් විවාහය කඩිනම් වෙයි. 4-10 යන ස්ථානයක 7 අධිපතියා උච්චවීමෙන් විවාහය ඉක්මන් වෙයි. 7 අධිපතියා ස්වක්ෂේත්‍රව ත්‍රිකෝණ රාශියක වීමෙන්ද විවාහය කඩිනම් වන්නේය.
එසේම 3 වැන්නාධිපතියා 11 වැන්නේත් 11 අධිපතියා 3 වැන්නේ වීමෙන් යුගදිවිය සරුසාර වෙයි. කරුණු මෙසේ යෙදී ඇතත් පමාවන විවාහය ඉක්මන් වීම සඳහා ජ්‍යොතිෂයේ විවිධ ග්‍රහපූජා, පිළියම්, ශාන්තිකර්ම, යාග හෝම, පුදපූජා ආදිය සඳහන් වී ඇත.
තවද බෝධිපූජා තබා අවසානයේදී දස දිසා පිරිත කීමෙන් ප්‍රමාද වළකා විවාහයට සහනය සැලසෙනු ඇත. පංචෝපාචාර විධි අනුව දස දිසා යන්ත්‍රය පිරිත් කර පැලඳීමෙන් ප්‍රතිඵල යහපත්ව ලැබෙයි.
කුජ දිනක රත්කෙහෙල් පැළයක් සිටුවා දිනපතා පැන් වත්කිරීමත්, කතරගම දේව මහා පූජාව තැබීමත් කළ යුත්තේ කුජ දින කුජ හෝරාවෙන්ය. කුජ දිනෙක කුජ හෝරාවෙන් උදේ 6-7 අතර කාලය තුළ කොළොන් පැළයක් සිටුවා උදේ සවස දින 21ක් ජලය වත්කිරීම හා කතරගම දෙවියන් නැමද පින් දීමත් ඉතාම සුබයි. තවද කොළොන් ගසක් පාමුල ගිතෙල් පහනක් දල්වා පූජාව තැබීම සුදුසුයි.
රාත්‍රී 12.42ට ගිතෙල් පහනක් දල්වා කතරගම දෙවියන්ට පින්දෙන්න.
බුලත් 14ක්, පහන් 14ක්, රතුපාට මල් වට්ටි 14ක්, රතු කොඩිවැලක්, රතුපාට මල් මාලාවක්, පලතුරු 5ක්, කැවිලි 5ක්, පඬුරු 21ක්, පැන් කළ 7ක් පළමුව බෝම`ඵව ඇමැද විහාරයට සහ චෛත්‍යයට මල් පූජා කරන්න. බෝධිය ඉදිරිමල් අසුනේ මල් තබා රතුකොඩි වැල් මල් මාලය බෝධියේ එල්ලා සුවඳ දුම්අල්ලා බෝධි පූජාව තබා දස දිසා පිරිත කියා අවසානයේ පැන්කළ 7ම බෝධියට වත් කරන්න. තමාගේ පැතුම කියා කතරගම දෙවියන්ට පින්දෙන්න.
අවසානයේ “ඕම් මුනි පද්මේ හුම්” යන ගාථාව 21ක් වරක් කියා ගයත්‍රී මහාවේද මන්ත්‍රය 3 වරක් කියා තමන්ගේ අදහස ඉෂ්ට සිද්ධ වේවායි ප්‍රාර්ථනා කරන්න. ප්‍රමාද වන විවාහය ඉෂ්ට වනු ඇත.
ප්‍රවීණ ජ්‍යොතිෂවේදී ටී. හෙන්රි බෙම්මුල්ල