ඔබට ලක්ෂ්මී යෝගය උදාවන දවස දැනගන්න

උත්සාහයෙන් හම්බකරලා, ඉතුරු කරලා තව, තව ආදායම් මාර්ග හදාගත්තොත් සියලු සැප සම්පත් බුක්ති විඳින්න පුළුවන් කියලනේ අපි හිතාගෙන ඉන්නේ. ඒත් ඉතින් හැමෝටම එහෙම බැහැනේ. සමහරු නම් වැඩි ගානක් නැතුව ඔහේ හිටියට ඒගොල්ලන්ට සියලු සැප සම්පත් පහළ වෙලා. ඉන්නේ හරිම සතුටින්. මෙහෙම වෙන්නේ කොහොමද කේන්දරයක් අරගෙන ග්‍රහ පිහිටීම දිහා බැලුවොත් සමහර කේන්දරවල ප්‍රබල යෝග පිහිටා තිබෙනවා. ඒ වගේ යෝග පිහිටි අයට සියලු සැප සම්පත් ලැබෙනවා. අන්න එහෙම යෝගයක් වන ලක්‍ෂ්මී යෝගය ගැන අද සොයා බලමු.

ලග්නාධිපතියා බලවත්ව සිටියදී නව වැන්න අධිපතියා කේන්ද්‍රස්ථානයක හෝ ත්‍රිකෝණ ස්ථානයක උච්ච හෝ ස්වක්‍ෂේත්‍ර බලයෙන් ඉන්නවා නම් ඒ තමයි ලක්‍ෂ්මී යෝගය. මේ යෝගය පිහිටි අයගේ පෙනුම ඉතාමත් සිත් ඇදගන්නාසුලුයි. හරිම අවංකයි. පාලන බලය ඇතුව රාජ්‍ය ගෞරව ලබමින්, ධන ධාන්‍ය, සම්පත් අනූනව, උගත්කම, තේජස් සහිතව නිතරම සතුටින් සහ සුවපහසුවෙන් කාලය ගතකිරීමට වාසනාවන්ත වෙනවා. කොටින්ම කියනවා නම් මේගොල්ලන්ට කිසිම දෙයකින් අඩුවක් නැහැ. සත්කීර්තිමත්.

අපි දැන් බලමු මේ ලක්‍ෂ්මී යෝගය තමන්ගෙ හඳහනේ සැඟවිලා තියෙනවද කියලා හොයා ගන්නා හැටි ඉතාමත් සරලව. පළමුවෙන්ම පහත වගුවෙන් බලාගන්න. තමන්ගේ ලග්නාධිපති කවුද කියලා සහ එයා බලවත් වන්නේ මොන රාශි තුළදීද කියලා.
ලග්නය ලග්නාධිපති උච්චරාශිය ස්වක්‍ෂේත්‍ර රාශි
මේෂ කුජ මකර මේෂ, වෘශ්චික
වෘෂභ ශුක්‍ර මීන වෘෂභ, තුලා
මිථුන බුධ කන්‍යා මිථුන, කන්‍යා
කටක චන්ද්‍ර වෘෂභ කටක
සිංහ රවි මේෂ සිංහ
කන්‍යා බුධ කන්‍යා මිථුන, කන්‍යා
තුලා ශුක්‍ර මීන වෘෂභ, තුලා
වෘශ්චික කුජ මකර මේෂ, වෘශ්චික
ධනු ගුරු කටක ධනු, මීන
මකර ශනි තුලා මකර, කුම්භ
කුම්භ ශනි තුලා මකර, කුම්භ
මීන ගුරු කටක ධනු, මීන
ලක්‍ෂ්මී යෝගය පිහිටන්න නම එක පැත්තකින් ලග්නාධිපතියා බලවත් වෙන්න ඕනෑ. ග්‍රහයෙක් උච්ච වීම ස්වක්‍ෂේත්‍ර වීම වැනි තත්ත්වයක් තමන් තැන්පත්වෙලා ඉන්න රාශිය තුළදී ලබා ගන්නවා නම්, එයා බලවත්. තමන්ගේ කේන්දරයේ කොටු දොළහ අයිති වන්නේ මොන මොන රාශියටද කියලා සොයා ගන්න එක අමාරු නැහැනෙ. ලග්න අනු පිළිවෙළ වන්නේ ඉහත වගුවේ 1, 2, 3, 4,… පිළිවෙළටයි. ඉතින් ඔයාගේ ලග්නයට අනුව ලග්න කොටුවේ (කේන්දරයේ ඉහළින්ම තියෙන ලොකු කොටුවේ) ඉඳන් පිළිවෙළට වම් පැත්තට රාශි ලකුණු කරගෙන ගියාම කොටුවල රාශි අයිතිය හොයා ගන්න පුළුවන්. දැන් බලන්න තමන්ගේ ලග්නාධිපති බලවත්ද කියලා. පහත වගුවෙන් තමන්ගේ නව වැන්න අධිපතියා හඳුනාගෙන ඉහත වගුවේ දෙවැනි පේළියට අනුව එයා බලවත් වන රාශි හඳුනා ගන්න.
ලග්නය 9 වැන්න අධිපති
මේෂ ගුරු
වෘෂභ ශනි
මිථුන ශනි
කටක ගුරු
සිංහ කුජ
කන්‍යා ශුක්‍ර
තුලා බුධ
වෘශ්චික චන්ද්‍ර
ධනු රවි
මකර බුධ
කුම්භ ශුක්‍ර
මීන කුජ
දැන් ඔබ ඔබගේ ලග්නාධිපතියා හඳුනනවා. ඒ වගේම එයා බලවත්ව ඉන්නවාද කියලත් දන්නවා. ඊළඟට ඔබ ඔබගේ නවවැන්න අධිපතියාත් හඳුනනවා. එයා බලවත්ව ඉන්නවාද කියලත් හොයා ගත්තා. නව වැන්න අධිපතියා ඕනෑම ස්ථානයක බලවත්ව ඉඳලා හරියන්නේ නැහැ. එයා බලවත්ව ඉන්න ඕනෑ එක්කෝ කේන්ද්‍රස්ථානයක නැති නම් ත්‍රිකෝණ ස්ථානයක.
කේන්ද්‍රස්ථාන කියන්නේ ජන්ම පත්‍රයේ 1, 4, 7, 10 යන ස්ථානයි. (ලොකු කොටු) ත්‍රිකෝණ ස්ථාන කියන්නේ 1, 5, 9 යන ස්ථානයි. මේ අනුව ඔබගේ නව වැන්න අධිපතියා උච්ච හෝ ස්වක්‍ෂේත්‍ර බලය අත්පත් කරගන්නා ගමන්ම එයා 1, 4, 5, 7, 9, 10 යන ස්ථානයක ඉන්නවා නම් ලග්නාධිපතියාත් ජන්ම පත්‍රයේ බලවත්ව ඉන්නවා නම් ඔබට ලක්‍ෂ්මී යෝගය පිහිටා තිබෙන අතර, කලින් සඳහන් කරපු වාසි ඔබට අත්වෙනවා. මෙහෙම වන්නේ බොහෝ පෙර පින් තියෙන අයටයි.

පුද්ගලයා සමාජය තුළ ඉහළ තලයකට ඔසවා තබමින් සියලු සැප සම්පත් ලබා දෙන ග්‍රහ පිහිටීම ගණනාවක් ගැන ජ්‍යොතිෂයේදී හඳුන්වා දී තිබෙනවා. ප්‍රායෝගිකව පෙනෙන කරුණක් තමයි මෙවැනි සුබ ග්‍රහ පිහිටීම් ඇති අය සමාජයේ හොඳින් ජීවත් වන බව. බොහෝ ජන්ම පත්‍ර හිමියන් තමන්ගේ ජන්ම පත්‍රය තුළ තිබෙන වටිනාකම් හඳුනාගෙන, ඒවාට අනුව නිසි මඟ යමින් ලස්සන ජීවිත ගතකරන බව වර්තමානයේ පෙනෙන්නට තිබීම සතුටට කරුණක්.
ජ්‍යොතිෂ විදශා විශාරද අගලවත්තේ චන්දන වීරක්කොඩි