සෙනසුරු අපලෙට කියාපු විසඳුම

ග්‍රහ ලෝකයට අයිති අන්‍ය සෑම තරුවකටම වඩා බරපතළ වෙනස්කමක් සෙනසුරාට තිබේ. එනම් තෙතමනය අඩුකමයි. දියෙහි දැම්මොත් දිය මතුපිටට මතුවෙයි. අනෙක් සෑම ග්‍රහ තාරකාවක්ම දියේ ගිලෙයි. ප්‍රමාණයෙන් ගුරුට වඩා ස්වල්පයක් කුඩා වෙයි. එහෙත් බරෙන් සහ ඝන ප්‍රමාණයෙන් බොහෝ අඩු වෙයි.

දිළිඳුකම, අවාසනාව, කෙළවරක් නැති දුක් විඳීම, දුක් විඳිද්දී තව තවත් දුක් දීම, මරණය, මහ කම්මැළිකම, සීමාවක් නැතිව කටයුතු කල් දැමීම, කටයුතු බාධා, අධෛර්යය, බලාපොරොත්තු සුන්වීම, තද දුක් විඳ එම රෝග සුව වූ පසු ලකුණු, ඉතිරි වන රෝග, බර කටුක වැඩ, ශරීරය කෙට්ටුවීම, දුර්වරණ වීම, ඇට බිඳීම ආදී කටුක දේවල් සෙනසුරාට අයිති කර දී තිබේ. මෙසේ නරක් වූ සෙනසුරු ඒරාෂ්ටකය ලබලද? කියා ඇසීම සාමාන්‍ය මිනිසුන්ගෙන් වුවත් පිටවන කීම්ය. ලෙඩ රෝග, නඩු හබ, අකාල මරණ, දුක් ආදියට මුහුණ පානවා දුටුවහොත් මෙසේ ප්‍රශ්න කිරීම සිරිතකි. එනිසාම සෙනසුරාගේ මේ තද ගති නිසාම ස්වර්ගයේ හෝ අපායේ යතුර තිබෙන්නේ සෙනසුරාගේ අතේ යැයි ව්‍යවහාරයේ පැවැතෙයි.

කෙසේ නමුත් මෙසේ දෝෂ ගෙන දෙන සෙනසුරු හේතු පාදක කර ගනිමින් මෙවන් අසුබතා ගෙන එද්දී මේවායින් නිසි ලෙස මිදෙන්නට හැකියාව පවතින්නා වූ කාරණා කටයුතුද ජ්‍යොතිෂයේ බලාත්මකව පවතින බව සිහිපත් කළ යුතුය. මෙසේ සෙනසුරු අපල ලද විටදී ජන්මියකුට අපල ගෙන දෙනු ලබන්නේ අවර යක්ෂයා සහ අවරගිරි යක්ෂණී විසිනි. මේ දෝෂයෙන් මිදෙන්නට නම් නිසියාකාරව අදාළ ජන්මියා විෂ්ණු දෙවිඳුන්ට සහ ආඬි තෙළඟු භෛරව දේවතාවන්ට භාර කළ යුතුය. එසේම මේ සඳහා නිසි ක්‍රමවේදයන්ට නතු වූ ශාන්ති කර්මයන්ද පවතින බව කිව යුතුය. ශනි දශාවේ මුල් කොටසේ අපලවලට දශ ක්‍රෝධ බලියද, මැද කොටසේ අපලවලට නිළඟ රාක්ෂ බලියද, අග කොටසේ අපලවලට ගෞඩි රාක්ෂ බලියද ඇරීමෙන් අපල දුරුකරවා ගත හැකිය.

එසේම තවත් ආකාරයකින් ග්‍රහ දානයන් වශයෙන් නිල් මැණික්, ලෝකඩ භාජන, මී හරක්, කඵ රෙදි, තල, කොල්ලු ආදියද නිසි ලෙස දන්දීමෙන් මෙම සෙනසුරුගේ දෝෂයන් නිසිලෙස දුරු කරවා ගැනීමට හැකියාව පවතින්නේය. කඵ තල, අංජන කැට, බැබිල, වී පොරි, සතකුප්ප තැම්බූ ජලය ස්නානය කිරීමෙන්ද, මෙම දෝෂ බලවත් ලෙස හරණය වන බව පැරැණි සෘෂිවරුන්ගේද ප්‍රබල මතයකි. නීල වර්ණ මල් වැඩි වශයෙන් පිදීමෙන්ද, නිල් මැණික් සහ කාක නිල යන මැණික් වර්ගයන් පැලඳීමද මෙම දෝෂ මකා දැමීම සඳහා බලවත් අයුරින් යොදා ගත හැකි වන්නේය.
එසේම අවසාන වශයෙන් ඉතා ප්‍රත්‍යක්ෂ ම කාරණාව වන්නේ නිසි ලෙස ජීවම් කිරීමෙන් අනතුරුව නීල මණ්ඩලය, මෘතුංජය, විෂ්ණු ආඝෝරය යන යන්ත්‍රයන්ගෙන් එකක් හෝ පැලැඳීමයි. දෝෂ ලත් ජන්මියා තම ශරීරයේ ස්පර්ශවන අයුරින්, සකසා ගත් මේ යන්ත්‍රයන්ගෙන් එකක් පැලැඳීම, පැලැඳි මොහොතේ පටන් ගුණ දෙන්නට සමත් බවද සිහිපත් කළ යුතුය. තවත් සිදුකරනු ලබන ක්‍රමවේදයක් නම් නුග වෘක්ෂයට සාත්තු කිරීමයි. ගස නිසි ලෙස ස්පර්ශ කිරීමත්, නුග වෘක්ෂයට ආවතේව කටයුතු සිදු කිරීමත්, මෙම සෙනසුරුගේ දෝෂ නසන්නට මහඟු බලයක් වනු ඇත. කපුටන්ට සෙනසුරාදා අලුයම ගිතෙල් මිශ්‍ර කිරිබත් (කපුටන් වෙනත් ආහාර ගැනීමට පෙරාතුව) ලබා දීමෙන්ද අතීතයේ පටන්ම සෙනසුරු දොස් නසන්නට බලවත් ආශීර්වාදයක් වීමද අදටත් අමතක නොකළ යුතු වන්නේය.
මෙසේ සඳහන් කරන්නට යෙදුණා වූ ශාන්ති කර්මයන් නිසි ලෙස සිදු කිරීමෙන් බිය සැකයකින් තොරව ශනි දෝෂ හරණය කරගැනීමට නිත්‍ය හැකියාව පවත්නා බැව් තරයේ සිතට ගත යුතු වන්නේය. ඔබට තුන් රුවනේ ආශීර්වාදය ලැබේවා.
ජ්‍යොතිෂවේදී කේ.පී. ක්‍රිෂාන්ත ප්‍රියදර්ශන