පාකිස්තාන් අගමැති ඉම්රාන් ඛාන් මාර්තු තුන් වැනිදා සිට පස්වැනිදා දක්වා චීන සංචාරයක් සඳහා දින නියම කරගෙන තිබේ. සංචාරය එක ගලකින් කුරුල්ලන් දෙදෙනකු බිම දමාගැනීම බව ඇතැම් මාධ්ය කියයි.
ගමන සම්බන්ධයෙන් එළිපිට ප්රකාශ කෙරෙන මතය ඒ දිනවල චීනයේ පැවැත්වෙන “ශීත ඍතු ඔලිම්පික්” ක්රීඩා උත්සවයට අගමැතිවරයා සහභාගිවීමයි. එහෙත් යටි අරමුණ චීනෙන් ඇමෙරිකානු ඩොලර් බිලියන දහයක් හෙවත් කෝටි දාහක (10,000,000,000) අතමාරුවක් ඉල්ලා ගැනීමය.
පාකිස්තානය මෙසේ ණය වෙන්නේද රටේ ආර්ථිකය හොඳටම වැටී උද්ධමනයද වැඩිවෙන තත්ත්වයක ඇති හෙයිනි.
ණය ඉල්ලීමට හේතු ගණනාවකි. එකක් පාකිස්තානු චීන ආයෝජන සමාගමට Pakistan Chin Investment Company ගෙවිය යුතු ණයක් ගෙවීමටය. දෙවැන්න ආයෝජන කිපයක් උදෙසාය. ඒ ආයෝජන බොහෝ සෙයින්ම “මල් වෙඩි සංදර්ශනයක්” බවටද මතයකි. මන්ද රටේ මහ මැතිවරණය අත ළඟම ඇති හෙයිනි. පාකිස්තානයේ ආර්ථිකය හොඳටම පහළ මට්ටමකට වැටී ඇතිවා පමණක් නොව මුදලේ අගයද හීන වෙමින් තිබේ. විදේශ සංචිතයද පිරිහෙන මට්ටමකය. මේ හේතුවලට සමගාමීව අගමැති ඉම්රාන් ඛාන්ගේ ප්රතිරූපයේද “වර්ණය” (සායම) යමින් පවතී.
අගමැති ඛාන් China Pakistan Economic Corridor-CPEC කෙරෙහි පැවති අධි තක්සේරුවද මේවන විට ගිලිහෙමින් ඇති බව කියයි. ඊට හේතුව චීනය ඒ ව්යාපෘතිවලින් “උලුප්පා” (මතුකර) පෙන්වූ “සෞභාග්යයේ දැක්ම” මායාවක් බව ප්රත්යක්ෂ වෙමින් පවත්නා හෙයින් යැයි කියත්.
ඒ අසාර්ථක ව්යාපෘති වෙනුවට නව ව්යාපෘති වශයෙන් ස්මාර්ට් ෆෝන්, කෘෂි තාක්ෂණ, ආරක්ෂිත තාක්ෂණ, චන්ද්රිකා තාක්ෂණය සහජීව තාක්ෂණය ආදී රැකියා උත්පාදනය කෙරෙන ඵලදායී ව්යාපෘති ආරම්භ කරන ලෙසට පාකිස්තාන් අගමැතිවරයා ඉල්ලීමක්ද කර තිබේ.
