විවාහයට පොරොන්දම් ගැළපුණත් කාන්තා කේන්දරය විමසුම් කිරීම විවාහයේ සුබ අසුබ තීරණය කිරීමට මූලික වෙයි. බෝසත් උපතට මූලික වන්නේද තවුසන්ගේ දැහැන් බිඳින්නේද ගැහැනියකි. රාගය නිසා පර පුරුෂයන් ඇසුරට ළොල්ව තම හිමි රජුට වසදී මරාදැමූ කාමිනියක් පිළිබඳවද ඉතිහාසයේ අපූරු මතක සටහන් ඇත. මුදලිවරයකුගේ දියණියක වන ගජමන් නෝනාද සැමියාගේ වියෝවෙන් පසුව විශේෂිත පුරුෂයන් ඇසුරු කළ කලාකාමී කාන්තාවකි. ප්රමිලා දේවියද ඉතිහාසයට එක්වී අත්තේ කාමයට ළැදිවූ පරපුරුෂ පහස පැතූ කාන්තාවක ලෙසය.
විවාහයෙන් සෑහීමකට පත් නොවන කාන්තාවන් මෙන්ම පුරුෂයන් පිළිබඳවද නොයෙක් විට අසන්නට ලැබෙයි. එය අතීතයට පමණක් සීමාවී නැත. වර්තමානයේදී පමණක් නොව අනාගතයටද වලංගු වන මෙම ස්ත්රී පුරුෂ නොමනා බැඳීම් ජන්මියකුගේ කේන්දර සටහන මගින් නිවැරැදිව දැකිය හැකිය. තම විවාහක පුරුෂයාගෙන් සෑහීමකට පත් නොවන ස්ත්රියත් තම විවාහක ස්ත්රියගෙන් සෑහීමකට පත් නොවන පුරුෂයාත් කේන්දර සටහන මගින් හඳුනාගත හැකිය. එවන් කාන්තාවක් හෝ පුරුෂයා දඩාවතේ යන්නන් ලෙස සමාජය මගින් හඳුන්වයි.
ජ්යොතිෂයෙහි සත්යමය සිද්ධාන්තයන් කිසිවකුට ප්රතික්ෂේප කළ නොහැකිය.
වෘශ්චික ලග්නය හිමි කාන්තාවක රවි හයවැන්නට යෝග වීමත්, මීන ලග්න හිමි කාන්තාවකගේ රවි දොළොස්වැන්නට යෝග වීමත් ඇගේ හිතුවක්කාර ගති ලක්ෂණ ප්රකට කරවයි. අතිධාවන කාම යෝග පිහිටන්නේ දූෂිත චරිතයන්ගේ පෙර කරන ලද අකුසල් ශක්තිය අනුවයි. සුබ පල විපරීත කරන මෙම ග්රහ යෝගයන් හඳුනාගැනීම වැදගත්ය.
කුජ, බුධ, සිකුරු අතිධාවන කාම යෝගයන් බිහිකිරීමට ප්රධාන වන ග්රහයන්ය.
කාන්තාවකගේ කුජගෙන්ද, පුරුෂයකුගේ සිකුරුගෙන්ද විවාහයේ බල දුබලකම් කියැවෙයි. විවාහය ගැන කියැවෙන හත්වැන්නේ රවි පිහිටා, සිවුවැන්නේ හෝ දොළොස්වැන්නේ කුජ පිහිටීම ජන්මියා ලබන කායික ශක්තිය අනුව පර ස්ත්රී හෝ පර පුරුෂ ඇසුරෙන් කායික අවශ්යතා සපුරාගැනීමයි.
ලග්නය තුලාව වී එහි හත්වැන්න වූ මේෂ රාශියේ සෙනසුරු නීචවී හතරවැන්නේ හෝ දොළොස්වැන්නේ කුජගේ දැකීමට හසුවීම වියපත් වූවන් හා වැන්දඹු පුරුෂයන් සමග අනාචාරයේ හැසිරීමකි.
උපතේදී සඳු, ශනි හත්වැන්නට සංයෝග වී පාප දෘෂ්ටියකට හසුවීමද අයහපත් ගහ බලපෑමකි. විවාහයට පත්ව සැමියාගේ අනුදැනුම මත හෝ විරුද්ධත්වය හමුවේ අන් ඇසුරට යොමුවන ස්ත්රිය විවාහය නමැති ප්රේමණීය බන්ධනය විනාශ කර දමයි.
කේන්දර සටහනක නොයෙදිය යුතු යෝග රැසකි.
විවාහයක් අසාර්ථක වීම යනු විවාහක දෙදෙනාගේ නොගැළපීම පමණක් නොවේ. ඔවුන්ගේ දරුවන්ද අසරණ කිරීමකි. දූදරුවන් නොමඟට යොමුවීම මවුපියන්ගේ නොගැළපෙන විවාහයන් අනුව සිදුවීම කනගාටුවකි.
පස්වැන්නේ කුජ සතුරුගත වීම ක්ෂණික තීන්දු තීරණ සහ එයින් අසාර්ථක විසඳුම් පෙන්වන අතර පස්වැන්න පුත්ර ස්ථානය වීම දරුවන් හටද අපලකාරී බව උරුම වීමකි. අයහපත් ග්රහ යෙදුම් මත ගුරු සතුරුව සයවැන්නට යෝග වීම තම යහපත පතා තාවකාලිකව හෝ අයුතුව අනෙකා අවනත කරගැනීමකි. කාන්තාවක හට බාල, තරුණ, මහලු යන තුන් කාලයටම මවුපිය, ස්වාමි, දූදරු රැකවරණය අවැසි වෙයි. එම කාල නියමයනට අනුගත රැකවරණය අහිමි වීම කාන්තාවකට අසුබයකි.
විවාහයෙන් දරුඵල අහිමි වීමත් විවාහය පමා වීමත් ග්රහයෝග අනුව සිදුවන්නකි. කේන්දර සටහනක දෙවැන්න, සිවුවැන්න, හත්වැන්න යන භාවයන් දුර්වල වීම විවාහය පමාවට සහ අවාසනාවන්ත විවාහයකට කරුණු ගොනුකරවයි.
කාම අපරාධයකට පොලඹවන රාග චේතනාව උපතින්ම හිමිවන ග්රහ බලපෑම සහ කර්ම ශක්තිය මත ගොඩනැඟුණකි. ලග්නයෙන් හත්වැන්නේ රාහු හෝ කේතු සමග සෙනසුරු පිහිටීම දූෂිත පිහිටීමකි. වැඩිවිය පත්වීමට පෙර බාලිකාවන් අපයෝජනයට ලක්වන්නේද බලහත්කාරයෙන් රවටාගැනීමෙන් තරුණියන් දූෂණය කරන්නේද එම ග්රහ බලපෑම් අයහපත්ව පිහිටි විටදීය. වෘෂභ ලග්නයට සඳු හත්වැන්නේ පිහිටීම සඳු නීච වීමකි. ලග්නයේ හතරවැන්නේ හෝ දොළොස්වැන්නේ සිටින කුජ, සඳු දැකීම යනු විවාහයට පෙර තරුණියකගේ චරිතය දූෂණය වීමකි. කවර ලග්නයක කාන්තාවකට වුවද කුජ සඳු යෝගය අයහපත් චරිතයකට උරුමකම් ලබාදෙන ග්රහ පිහිටීමක් බව කියැවෙයි.
නීච සඳු දොළොස්වැන්නේ පිහිටීමද කාන්තාවන් අනියම් ඇසුරට යොමුවන යෝගයකි. මංගල යහනේ සුවය පැවසෙන්නේ කේන්දර සටහනේ දොළොස්වැන්නේය. නීච සඳු දොළොස්වැන්නේ සිටීම හෙවත් ධනු ලග්න හිමියන්ගේ දොළොස්වැනි රාශියේ සඳු පිහිටීම අතෘප්තිමත් කාම යෝගයකි. එවන් කාන්තාව අනියම් ඇසුරට පහසුවෙන් යොමුවන බව පැවසෙයි. මෙහි සඳහන් කර ඇත්තේ ස්වල්ප වූ අයහපත් ග්රහ පිහිටීම් විවරණයකි. මෙම ග්රහ පිහිටීම් 22 වැනි දෙර්කාණාධිපතිගෙන් තවත් බලවත් වන අතර යෝගකාරක ග්රහයාගෙන්ද ගුරුගේ දැකීමෙන්ද අයහපත අවම වෙයි. ඇතැම් ස්ත්රී කේන්දරයක අයහපත් ග්රහ පිහිටීම් පුරුෂ කේන්දරය මගින් දෝෂ භංග කරවනු ඇත.
කේන්දර සටහනක් දුටු පමණින් කාන්තාවකට අසුබ බවක් ආරෝපණය කිරීම යුක්තිසහගත නොවේ.
ජ්යොතිෂවේදී මතුගම ජයනෙත්ති
