පරිගණකයෙන් කේන්දරේ ගැලපුවාම වෙන දේ

දෙදෙනකු අතර විවාහයක් ගිවිස ගැනීමේදී ජ්‍යොතිෂයට අනුව පොරොන්දම් බැලීම සිදුකිරීම අනාදිමත් කාලයක පටන් පැවත එන කටයුත්තකි. දෙදෙනකුට සාර්ථක යුග දිවියක් ගතකිරීමට හැකිවේද යන්න මේ තුළින් ස්ථිරවම කිව හැකිය. සිත් දෙකක්, චරිත දෙකක් එකිනෙකට ජීවත් වීමට ඇති කායික, ශාරීරික, සාමාජික සමානාත්මතාවක් දෙදෙනකු අතර තිබේද යන්න පොරොන්දම බැලීම තුළින් කිව හැකිය.

බොහෝ දුරට පරිසර දෙකක ප්‍රදේශ දෙකක ජීවත් වුණු දෙදෙනකු ගැළපීම අසීරු කටයුත්තකි. මෙය කළහැකි වන්නේ නිවැරැදි පොරොන්දම් ගැළපීමකින් පමණි. මවුපියන් තම දරුවන්ගේ හඳහන් අරන් නිවැරැදි දක්‍ෂ ජ්‍යොතිෂවේදීන් වෙත යන්නේ මෙහි හොඳ – නරක නිවැරැදිව බලා ගැනීමේ අභිලාෂයෙනි. නමුත් වර්තමානයේ මෙය පරිගණකවලින් තීරණය කරන අවස්ථා අනන්තවත් ඇත. මෙය නිවැරැදියි කියා පිළිගන්න මවුපියෝද බොහෝ සිටිති. මේ තුළින් විවාහක දෙපළට සාධාරණයක් ඉටුවේද යන්න ගැටලුවකි.

පොරොන්දම් බැලීමක්, නැකැත් දෙකකට පමණක් සීමා කළ නොහැකිය. නමුත් පරිගණකයෙන් සිදුකරන්නේ නැකැත් දෙකකට පමණක් සීමාකර බැලීමකි. අද ගමෙන් ගමට, නගරයෙන් නගරයට පොරොන්දම් නිරීක්‍ෂණය කරන කොම්පියුටර් ජ්‍යොතිර්වේදීන් අනන්තවත් දකින්නට ඇත. මෙය පරිහරණය කරන මහතුන් බොහෝ දුරට ග්‍රහයන් නවදෙනාවත් නොදැන තිබීම කනගාටුවට හේතුවකි.

පොරොන්දම් බැලීමට ප්‍රථම දෙදෙනාට විවාහ වීමට සුදුසු කල එළඹී ඇත්ද, මංගල යෝග තිබේද යන්න සොයාබැලිය යුතුයි. විවාහයට මූලිකව බලපාන අඟහරු ග්‍රහයා මංගල යන අරුතෙන් හඳුන්වයි. අඟහරු දෝෂ කේන්දරවල පිහිටා තිබේද, දෝෂ භංගවේද යන්න සොයාබැලිය යුතුයි.
ශනි මංගල යෝගය, විෂකන්‍යා යෝගය, කඩහන්දි මාරකය, නාශාංශක දෝෂ, වෛධව්‍ය දෝෂය, බහුවිවාහ යෝග, සරාගී යෝග, අවිවාහක යෝග, වඳ යෝග, කළු කුමාර දෝෂ, තුන්කුලුඳුල් දෝෂ, චාරිත්‍ර දෝෂ, 22 දෙර්කාන අධිපතිගේ බලපෑම යන කරුණු රාශියක් පිළිබඳ විමසිල්ලට ලක්කළ යුතුය. එපමණක් නොව තම රුව, ආයුබල තිබේද, දරුණු ලෙඩ රෝගවලට ලක්වේද, මාරක අනතුරු ඇතිකරයිද, සිරගත වෙයිද, ධන ලාභ නැති, ධනය විනාශ කරන අයකුද මේවා පිළිබඳ නිසි දැනීමක් ඇත්තේ දක්‍ෂ ජ්‍යොතිෂවේදී මහතුන්ට පමණි.

එම නිසා ඔබ පොරොන්දමක් ගළපා ගැනීමේදී ඒ පිළිබඳ ගැඹුරින් සිතා බලා කටයුතු කිරීම ඉතා වැදගත්ය. කිසිම මවක් හෝ පියෙක් තමන්ගේ දරුවන්ගේ විවාහය අසාර්ථක වීමට කැමැති නැත. ඔවුන්ගේ එකම අභිලාසය ඔවුන්ගේ යුග ජීවිත සාර්ථක වීමයි. එබැවින් මෙහි වගකීම ඔබ සතු විය යුතු වගේම ජ්‍යොතිෂවේදී මහතාටද මෙහි පූර්ණ වගකීම පැවරෙනු ඇත.

ප්‍රවීණ ජ්‍යොතිෂවේදී සරත්චන්ද්‍ර බෝතලාගේ