දැන් නාට්යයක් කරගන්න බැරි තැනටම ඇවිල්ලා…
මම කැමැතියි විවිධ චරිත හරහා ප්රේක්ෂකයාට සමීප වෙන්න…
වේදිකාවේ අභිෂේක ලබමින් රටවටා සැරිසැරූ ඔහු අද ටෙලිනාට්යවල වගේම චිත්රපටවලද චරිතාංග රංගන ශිල්පියෙක් බවට පත්වෙලා. ඉතින් මේ දවස්වල ටෙලිනාට්ය කිහිපයකින් ඔබ හමුවට එන ජනප්රිය රංගන ශිල්පී සරත් කරුණාරත්නගේ රංගනයේ සුවිශේෂී රංගනයක් ලෙස ඔහු නිරූපණය කරන ‘බන්ටි’ චරිතය අපි දකිනවා. ඒ සුවිශේෂී බව අපට වගේම ඔහුට දැනුණු විදිහ දැනගැනීමට අපි ඔහුව සම්බන්ධ කරගත්තා.
සරත් ඔබගේ සුවිශේෂී රංගනයක් අපි මේ දවස්වල දකිනවා. ඒ සුවිශේෂී බව ඔබට දැනුණේ කොහොමද?
මම සම්බන්ධ වුණු ටෙලිනාට්ය කිහිපයක් විකාශය වෙනවා. දිවිතුරා, ධරණි. එයට අමතරව ‘ටීචර් අම්මා’ නිර්මාණවල මම එකිනෙකට වෙනස් චරිත කරනවා. හැබැයි මේ දවස්වල මම නිරූපණය කරන ‘බන්ටි’ චරිතය ගැන ගොඩදෙනෙක් කතා වෙනවා. කාලෙකට පස්සේ ආශාවෙන් හොඳ චරිතයක් කරන්න ලැබුණා. මම කරපු අනෙකුත් චරිතවලට අකැමැති කියනවා නෙවේ. මම මේ කරන ‘බන්ටි’ චරිතය මට වගේම මගේ ආදරණීය ප්රේක්ෂකයන්ට වගේ අපේ කලා ක්ෂේත්රයේ ජනප්රිය රංගන ශිල්පීන් පවා මගේ රඟපෑම ගැන අගය කළා.
‘බන්ටි’ චරිතය කිරීමට ඔබ වෙනම උත්සාහයක් ගත්තාද?
‘ටීචර් අම්මා’ ටෙලිනාට්යයේ තිමිර උඩලවත්ත ඒ වගේම ටෙලිනාට්යයේ අධ්යක්ෂ සුදත්ත තිලකසිරි සමග මම මේ ‘බන්ටි’ චරිතය ගැන නිරන්තරයෙන්ම කතා කිරීමට උත්සාහ කළා. ඔවුන් දුන්න උපදෙස් අනුව දැකපු ‘බන්ටි’ තමයි මම නිරූපණය කිරීමට උත්සාහ කළේ. නැතුව මම බාහිර වෙනසක් කිරීමට උත්සාහ කළේ නැහැ. මම හිතනවා පිටපතට මම උපරිම සාධාරණයක් කරලා ඇති කියලා. මම ගොඩාක් අවධානයෙන් තමයි මේ චරිතය නිරූපණය කළේ.
ඔබ නිරන්තරයෙන්ම ඒකාකාරී බවින් මිදීමට තමයි උත්සාහ ගන්නේ?
ඇත්තටම මම කැමැති විවිධ චරිත හරහා ප්රේක්ෂකයාට සමීප වීමට. මොකද ඔවුන්ටත්, අපිටත් දැනුමක් වගේම ප්රේක්ෂකයන්ටත් හොඳ රසවින්දනයක් දෙන්න පුළුවන්.
මම වේදිකාවෙන් ලබපු ආභාෂයත් එක්ක මට ලැබෙන චරිතවලට උපරිම සාධාරණයක් කිරීමට ශක්තියක් ලැබෙනවා.
තවත් පැත්තකින් ඔබ මේ කියන්න යන පහේ කතාව මොකක්ද?
අද වේදිකාව වගේම සිනමාව ගොඩාක් කඩාවැටිලා මේ කොවිඩ් ප්රශ්නයත් එක්ක. වේදිකා නාට්යයක් තවම හරියාකාරව කරන්න බැරි තැනට පත්වෙලා. ඉතින් මමත්, බුද්ධික දමන්ත, අඛිල සපුමල්, අසංක සායක්කාර සහ එම්. සහේල් එකතුවෙලා අපි පස්දෙනා වේදිකා නාට්ය උළෙලක් එකම වේදිකාවේ පැවැත්වීමට කටයුතු කිරීමට සූදානම් වෙමින් තමයි මේ දවස්වල ඉන්නේ. එකම වේදිකාවේ එහෙම වේදිකා නාට්යයක් නරඹන්න ලැබෙන කාලය අඩු නිසා අපි මේ වෙනස්ම අත්දැකීමක් ප්රේක්ෂකයන්ට විඳීමට ඉඩකඩ සලසන්න තමයි හදන්නේ.
ඔබ වේදිකාවෙන් පෙරළියක් කරමින් ඇවිත් සිනමාවට ඔබේ ලොකු දායකත්වයක් නැහැ නේද?
මගේ හදවත වේදිකාව. සතියකට වේදිකා නාට්ය හතරක වැඩ කළ මම සමහර අවස්ථාවල මට දින වෙන් කිරීමේ ප්රශ්න ගැටලු පවා මතුවුණා. වේදිකාව වෙනුවෙන් ඒ තරමට මම කැපවෙලා වැඩ කළා. මම අදටත් කැමැතියි මාව වේදිකා රංගන ශිල්පියෙක් විදියට හඳුන්වනවාට. චිත්රපට කිහිපයකට මම සම්බන්ධ වුණා. ඒත් ලොකුවට මම සිනමාව වෙනුවෙන් යොමු වෙලා වැඩ කරලා නැහැ.
ගොඩදෙනෙක් කියනවා මෙගා නාට්ය කියන්නේ ගුණාත්මක භවින් අඩු නිර්මාණ කියලා. ඔබත් මෙගා නාට්යවල රඟපානවා?
එහෙම කියන්නේ අපේ ක්ෂේත්රයේ අයම තමයි. මෙගා කියන්නේ ගුණාත්මක අඩු බවට නෙවේ. කොටස් වැඩි ප්රමාණයක් නිසා. ඒ දෙක තේරුම් ගන්න බැරි පිරිසක් ඉන්නවා. මම හිතන්නේ එදා මෙගා නාට්යයවලට බැනපු අය අද ආශාවෙන් නරඹනවා. මොකද ගුණාත්මක නිර්මාණ නිසා. අලුත් රැල්ලක් හැදිලා තියෙනවා දැන් මෙගා වුණත් සෞන්දර්ය මූලාශ්රය කරගෙන දුරබැහැර ප්රදේශවලට ගිහින් හොඳ නිර්මාණ ප්රේක්ෂකයාට රසවිඳීමට ඉඩකඩ සැලැසීමට. දිවිතුරා ටෙලිනාට්ය නුවරඑළිය ප්රදේශයේ, ටීචර් අම්මා බෙලිහුල්ඔය වැනි දුෂ්කර පළාත්වලට ගිහින් නිර්මාණ නොකර කොළඹ අවට කරන්න තිබුණානේ. නැහැ ඒ නිර්මාණකරුවන් උත්සාහ කළේ කරන දේ හරියට වටිනාකමක් ඇතිව කරන්නයි. අපි එය අගය කළ යුතුයි.
–වසන්ත විතාරණගේ
