තම ලෙයින් දරුවන් ලක්ෂ 24කට ජීවය දුන් ආදරණීය තාත්තා

ලේ, නැත්නම් රුධිරය දන්දීමක් යනු කියා අවසන් කළ නොහැකි තරමේ උතුම් පින්කමකි. එහෙත් එම උතුම් පින්කම 1,773 වතාවක් කළ අපූරුම මිනිසකු පිළිබඳ පසුගියදා අපට ආරංචි විය. ඒ අනුව මා දැන් පැවැසීමට යන්නේ 1,773 වතාවක් දරුවන් ලක්ෂ 24කට (මිලියන 2.4) තම ලේ පරිත්‍යාග කළ පින්වන්ත මිනිසකු ගැනය. ඔහු නමින් ඔස්ටේ්‍රලියානු ජාතික ජේම්ස් ක්‍රිස්ටෝපර් හැරිසන්ය. සැබෑවටම ඔහු මිනිසුන් අතර උත්පත්තිය ලැබූ එක් දෙවියෙකි. මෙම කතාව අවසානයේදී ඔබට එසේ සිතෙනු ඇත.

ඕස්ටේ්‍රලියානු ජාතික ජේම්ස් ක්‍රිස්ටෝපර් හැරිසන් තම ලෙයින් දරුවන් ලක්ෂ 24ක් මරණයෙන් බේරාගත් බව මා පවසන විට කියවන ඔබට එය සත්‍යක්දැයි සිතනු ඇත. එහෙත් එය සත්‍යයකි. ඊට හේතුව මෙම කරුණ සනාථ කරනුයේ ලියන මා නොව, ජාත්‍යන්තර රතුකුරුස සංවිධානයේ ඕස්ටේ්‍රලියානු ශාඛාවයි. (Australia Red Cross Blood Service) මෙහි ප්‍රතිඵලයක් ලෙස ජේම්ස් ක්‍රිස්ටෝපර් හැරිසන්ට ලෝකයේ වැඩිම වරක් ලේ දන්දුන් මිනිසා ලෙස 2003 වසරේ ගිනස් වාර්තාවක් තැබීමට හැකිවිය. මේ වාර්තාව සම්බන්ධයෙන් අදහස් දක්වන ඔහු, තමා තැබුවේ වර්තාවක් නම් එය කවුරුන් හෝ බිඳදමනු බලන්නට කැමැති බවත්, මියයන්නට සිටිය දරුවන් විශාල සංඛ්‍යාවකට ජීවිතය දීමට හැකිවීම පිළිබඳ තමාට විශාල සතුටක් දැනෙන බවත් පවසා තිබේ. තවද වරක් 1999 වසරේදී Medal of the Order of Australia (OAM) සම්මානය පවා ලබාගැනීමට ජේම්ස් ක්‍රිස්ටෝපර් හැරිසන්ට හැකිවිය.

ජේම්ස් ක්‍රිස්ටෝපර් ඉපදෙන්නේ 1951 වසරේදීය. ඔහුගේ අන්වර්ථ නාමය ‘ගෝල්ඩන් ආම්’ විය. එහෙත් පෙරභවයක කළ එක්තරා පවකට දෝ වයස අවුරුදු 14දී කුඩා ජේම්ස්ගේ දිවියට මාරයා අත වනන්නට වූයේ ඔහු දරුණු පෙණහලු රෝගයකට ලක්කරමිනි. අනතුරුව ඔහුගේ ජීවිතය බේරාගැනීමට පැය ගණනක බරපතළ සැත්කමක් කරන්නට සිදුවූ අතර, එය සිදුකිරීමට විශාල වශයෙන් ඔහුට රුධිරය දීමට සිදුවිය. ප්‍රමාණයෙන් එය රුධිරය ලීටර් දහතුනකි. පසු කලෙක ඔහු ඒ පිළිබඳ CNN පුවත් සේවය වෙත අදහස් දක්වමින් පවසා සිටියේ එදා තමාට රුධිරය ලීටර් දහතුනක් ලබාදුන් බවට තම පියා පැවැසූ බවත් තමාගේ ජීවිතය බේරාගත් ඒ උතුම් මිනිසුන් කවුද කියා තමා අදටත් නොදන්නා බවත්ය. කෙසේ වුවද එදා ඔහුගේ ජීවිතය බේරුණද අසනීපයේ ප්‍රතිඵලයක් වූයේ ඔහුගේ එක් පෙණහැල්ලක් ඔහුට අහිමිවීමයි. ඒ අනුව මාස ගණනක් රෝහලේ සිට ඔහු එයින් පිටව යන්නේ මරණය පෙනි පෙනී සිට නැවතත් හුස්ම ගනිමිනි.

මේ අනුව එදා පුංචි ජේම්ස් ක්‍රිස්ටෝපර් හැරිසන් රෝහලෙන් පිටව යන විට තම පියාට පොරොන්දුවක් විය. ඒ, තමාගේ වයස අවුරුදු දහඅට සම්පූර්ණ වූ පසු දිගින් දිගටම ලේ දන්දෙන බවයි. එය ඔහු ජීවත්වීමට ලේ දන් දුන් උතුම් මිනිසුන් වෙනුවෙන් කරන කළගුණ සැලකීමක් බඳු විය. එහෙත් මුල්වරට ලේ දන් දෙන විට වෛද්‍යවරුන් පවා පුදුමයෙන් පුදුමයට පත්විය. ඒ, මෙම තරුණ ජේම්ස් ක්‍රිස්ටෝපර්ගේ ලේ ඉතා දුර්ලභ ගණයේ ලේ වර්ගයක් බව එහිදී හඳුනා ගැනීම නිසයි. සැබෑවටම ඔහුගේ රුධිර ප්ලාස්මාවල ඇති විශේෂත්වය වූයේ ඒවා ප්‍රති – Dනම් ප්‍රතිජීවකවලින් පොහොසත් වී තිබීමයි. වෛද්‍ය ක්ෂේත්‍රයේ එය Anti – D Products ලෙස හඳුන්වයි. ඒ මගින් මිනිස් සෛල තුළ නිපදවෙන Anti – D Immunoglobulin නමින් හඳුන්වන ඉමියුනෝග්ලොබියුලිනය ‘රීයස්’ නම් රෝගයට එය ස්වර්ණමය ඔසුවක් විය. පසුවට රුධිර ප්ලාස්මාවල Anti – D එන්නත එරටේ නිපදවන අතර මුලින්ම එය නිපදවූයේද ජේම්ස්ගේ රුධිරයෙනි.

ඉහතින් සඳහන් කළ ‘රීයස්’ රෝගය යනු තරමක් අමුතු වූ රෝගයකි. එය 1967 වසරේදී ඕස්ටේ්‍රලියානු වෛද්‍ය ක්ෂේත්‍රය පවා කැලඹවීය. දරුවන් ගබ්සාවලට ලක්වීමත් මළදරු උපත් වැඩිවීමත් මොළය දුර්වල දරුවන් ඉපදීමත් දරුවන් මියයාමත් මෙම රෝගයේ දරුණු ප්‍රතිඵල විය. නමුත් ජේම්ස් ක්‍රිස්ටෝපර්ගේ රුධිරය රීයස් රෝගයට එරෙහිව සටන් කළේ එරටේ දරුවන්ගේ වාසනාවටය. ඒ අනුව අදටත් ඕස්ටේ්‍රලියානු ගැබිනි මවුවරුන්ගෙන් 17%ක් පමණ දරු සුරතල් බලන්නේ ඔහු නිසාය. මේ අතර අදටත් ජේම්ස්ගේ සිරුර තුළින් මෙම සුවිශේෂ ප්‍රතිජීවකය නිපදවෙන්නේ කෙසේදැයි එරටේ වෛද්‍යවරුන්ට පවා ප්‍රශ්නයකි. ඔවුන්ගේ එකම අනුමානය වන්නේ කුඩා කල ඔහුට සිදුකළ සැත්කම අවස්ථාවේ ලබාදුන් අතිවිශාල රුධිර පරිමාව මීට හේතුව බවයි.

නොකඩවා වසර හැටක් තිස්සේ ජේම්ස් හැරිසන් තම ලේ දන් දී ඇති අතර මේ වෙනවිට ඔහුගේ වයස ප්‍රශ්නය නිසා ඔහුගෙන් තව දුරටත් ලේ නොගැනීමට රතු කුරුස සංවිධානය තීරණය කර තිබේ. ඒ අනුව මේ ලියන මොහොත වන විට ජේම්ස් අවුරුදු හැටක් තිස්සේ සතියකට වරක් බැගින් 1,773 වතාවක් ලේ දන්දී තිබේ. ‘ස්වර්ණමය දෑත් හිමි මිනිසා’ ලෙස මෙදා හඳුන්වන ඔහුගේ දකුණු අතින් 1,763 වතාවක් මෙන්ම වම් අතින් 10 වතාවක් ලේ දන්දී ඇත. සැබෑ ලෙසටම මෙවන් මිනිසුන් රටකට සම්පතකි. ඕස්ටේ්‍රලියාව ඒ අතින් පින්වන්ත භූමියකි. මෙම හේතුව නිසාම මෙදා ජේම්ස්ගේ වටිනාකම හොඳින්ම දන්නා එරට සිටින වෛද්‍යවරුන් පවසන්නේ ජේම්ස් වැනි තවත් අයෙක් ඔවුන්ට කිසිදිනෙක යළිත් නොලැබෙන බවත් ජීවිත මිලියන 2.4ක් බේරාගන්නට තරම් ඔහුගේ නහර ශක්තිමත් බවත්ය. එසේම මේ ලෝකයට අවශ්‍ය වී තිබෙන්නේ එවැනි වූ නහරකාරයන් බවත් ඔවුන්ගේ අදහසයි.

රුවන් එස්. සෙනවිරත්න