⬤ ලොකු බයික් පදිද්දි පොඩි සතුටක් එනවා…
⬤ මම සීනිබෝල චරිතවලට කැමැති නැහැ…
පසුගියදා ‘හාට්’ කලා විශේෂාංගය හරහා අපි ඔබට ප්රවීණ රංගන ශිල්පී බැප්ටිස්ට් ප්රනාන්දුගේ ‘මුණුපුරා’ ගැන හැඳුන්වූවා. මේ ඒ ප්රවීණ රංගන ශිල්පියාගේ ‘මිණිපිරි’. ඇය කවිතා අංජලි විජේවර්ධන. මේ වන විට කවිතා ‘ධරණි’ ටෙලිනාට්යයේ සුවිශේෂී චරිතයක් නිරූපණය කරනවා. ඉතින් ඇයගේ කලා තොරතුරු ගැන ප්රථම වතාවට ‘මව්රට – හාට්’ තුළින් හෙළි කළා.
🔴 කවිතා දැන් දරුණු වෙලා වගෙයි?
කවිතා නම් දරුණු වෙලා නැහැ. හැබැයි ඉතින් ‘ධරණි’ ටෙලිනාට්යයේ ‘මීසා’ දරුණු වෙලා. මම දුෂ්ට චරිතයක් රඟපාන පළමු අවස්ථාව තමයි මේ. නොසිතූ ප්රතිචාර ලැබෙනවා ‘මීසා’ට.
🔴 නොසිතූ කියලා ඔබ අදහස් කළේ?
හිතුවේ නැහැ මේ තරම් හොඳ ප්රතිචාර ලැබෙයි කියලා. හැබැයි ඉතින් ලැබෙන ප්රතිචාර බැනුම් තමයි. ‘මීසා’ට කවුරුත් කැමැති නැහැ වගේ. සමහරු අන්තර්ජාල හරහා මට බැනලා ප්රතිචාර දක්වනවා. ඔය අතර ‘මීසා’ට ආදරය කරන පිරිසකුත් ඉන්නවා. මම ඉතින් හැම ප්රතිචාරයක්ම සතුටින් බාරගන්නවා. චරිතය හොඳට කරන නිසානේ මෙහෙම චරිත ලැබෙන්නේ.
🔴 ඔබ මේ ක්ෂේත්රයට ඇවිත් එතරම් කාලයකුත් නැහැ. ඇයි මෙවැනි චරිතයක් කළේ?
මම සීනිබෝල චරිත කරන්න ලොකු කැමැත්තක් නැහැ. මේ ‘මීසා’ චරිතය තුළින් මට දැනෙන විදියට යමක් කරන්න ලැබුණා. හරිම ආශාවෙන් තමයි රඟපාන්නේ.
🔴 ඒ ආශාව ගොඩාක්ම ඇත්තේ බයිසිකල් පදින්න තියෙන නිසා වෙන්න ඇති?
ලොකු බයික් එකක් පැදගෙන වේගයෙන් යද්දි නම් පුංචි සතුටක් එනවා. මෙච්චර කාලයක් සමාජයේ ගැහැනු ගහගන්න විදිය වසන් කරලානේ තිබ්බේ. ‘ධරණි’ හරහා ඔවුන්ගේ වීර හපන්කම් තාත්වික විදියටම පෙන්වනවා. මටත් හොඳට සටන් කරන්න, බයික් පදින්න පුළුවන් වුණු නිසා චරිතයට සාධාරණයක් කරන්න පුළුවන් වුණා.
🔴 ‘ධරණි’ නිසා රටපුරා ‘ධරණි’ලා වැහිවැහැලා නේද?
ඔව්… රටපුරා ‘ධරණි’ලා පැතිරලා සිටින බව මටත් ආරංචියි. හැබැයි අපි කරන්නේ නිර්මාණයක්. ප්රේක්ෂකයන්ට රසවිඳින්නයි. ඒ දේවල් තමන්ගේ ජීවිතයට අරගෙන අත්විඳින එක වැරැදියි. හොඳ නරක තේරුම් ගන්න තමන් දැනගන්න ඕනෑ කියලා තමයි මම නම් හිතන්නේ.
🔴 ඔබේ පළමු සිනමා නිර්මාණය ‘අපට සැදුණු අපේ ලෝකය’ චිත්රපටය. කොහොමද එහි සාර්ථකත්වය?
සිනමාවට සම්බන්ධ වෙන්න මගේ ලොකු හීනයක් තිබුණා. මේ දවස්වල චිත්රපටය ගැන විවිධ කතාවන් යනවා. ඉතින් මේ කාලවකවානුවේ මෙහෙම හරි චිත්රපටය ගැන කතාවෙන එක ගැන සතුටුයි.
🔴 ඔබ මේ ගමන යන්නේ සීයාගේ අවසන් බලාපොරොත්තුවත් ඉටුකරමින් නේද?
මගේ සීයා තමයි බැප්ටිස්ට් ප්රනාන්දු කියන්නේ. ඔහු ජනප්රිය රංගන ශිල්පියෙක් වගේම, චිත්රපට අධ්යක්ෂවරයෙක්. සීයාගේ ලොකු ආශාවක් තිබුණා මාව සිනමාවට සම්බන්ධ කරන්න. ඉතින් ඒ සිහිනය මම ඉටුකරනවා මගේ තිබුණ ආශාවත් එක්ක. අනෙක දැන් මම විතරක් නෙවේ මගේ මල්ලි තමයි ක්රිෂ් විජේවර්ධන කියන්නේ. අපි දෙන්නම මේ ක්ෂේත්රයෙන් ඉදිරියට යන්න තමයි බලාපොරොත්තු.
🔴 ඔබේ ආදරණීය සහෝදරයා ගැන යමක් පැවැසුවොත්?
ඔහු පුංචි කාලේ ඉඳලා කලාවට ලොකු ළැදියාවක් තිබුණ බව අපි දැක්කා. ඉතින් මම එක්ක පවා රූපගත කිරීම්වලට සම්බන්ධ වෙනවා. ඉතින් ඔහුටත් මේ ක්ෂේත්රයට සම්බන්ධ වීමට මම උදවු කළා. අපි දෙන්නම මේ ගමන යන්නේ සීයාගේ නමත්
රැකගෙන තමයි.
වසන්ත විතාරණගේ
