⬤ මාලිනි ෆොන්සේකා කියන නම මම අලෙවි කළේ නැහැ…
⬤ තව යන්න ගොඩක් දුර තියෙනවා…
සෙනාලි ෆොන්සේකා ගැන අලුතින් යමක් ලියන්නට ‘ඉන්ට්රෝ’ එකට වැඩි යමක් එකතු කළ යුතු නැතැයි අප සිතුවෙමු.
ඒ සිතුවිල්ලට බොහෝමයක් වූ කරුණු කාරණා හේතුපාඨ වී තිබිණ.
ඉන් සමහර දෑ කෙටියෙන් කියනවා නම්..,
මේ සොඳුරු නිළි කෙල්ල ශ්රී ලාංකේය සිනමාවේ නිළි රැජනගේ ලේලියකි.
තවත් සුවිශේෂී සඳහනක් කරන්නේ නම් ඈ.., ‘නාඩගම්කාරයෝ’හි ‘සරා’ට පෙම් කරන ‘සුදු චූටිය..’ එහෙමත් නැතිනම් ‘පාඨලීය’
‘සුමති’ සම්මානය දෝත දරා විශ්වයට දෑස ඔසවා සිනාසෙන්නට සෙනාලි වාසනාවන්ත වූයේද ‘සුදු චූටි’ට ප්රේක්ෂකයන් අසීමිතව ආදරය කරන්නට ගත් නිසාය.
ඉතින්… සෙනාලි සමඟ ලෙන්ගතුව දොඩන්නට හදවත වෙන්කර ගත් කෙටිකාලීන හෝරාවක මිහිරිතම විරාමය මේ විය.
🔴 පළමුව ‘මව්රට’ වෙනුවෙන් අපේ සුබ පැතුම්! පිළිගන්න සෙනාලි…
බොහොම ස්තුතියි. මාව මෙතැනට ගෙනාවේ ඔයාලා හැමෝගෙම ආදරය තමයි…
🔴 හිතුවේ නෑ නේද ඔබ ‘සුදු චූටි’ට ප්රේක්ෂකය මේ තරමට ලෙන්ගතුය කියලා?
අපොයි නැහැ… ඒ ආදරය, ලෙන්ගතුකම දැනෙන්න ගත්තේ ‘නාඩගම්කාරයෝ’ විකාශනය වී ගෙවී යන පළමු සහ දෙවන සතිය තුළදීමයි. මඟතොටට බහින්න බැරි තරමේ ජනතා ප්රතිචාරය දැඩිව තිබුණා. ඇත්තටම මට අදහගන්නත් බැරි තරමට ඔවුන් මා වටා රොක් වුණා.
‘සුමති’ ටෙලිනාට්ය සම්මාන උළෙල සඳහා මගේ නම ‘ජනප්රියව’ ටිකෙන් ටික ඉහළට එනවා දකින කොටත් ඇස් දෙක පිරෙන්න කඳුළු ඉනුවා.සත්තකින්ම මම මගේ ආදරණීය ප්රේක්ෂකයනට ආචාර කරනවා මාව මෙතැනට ඔසවා තැබීම ගැන.
🔴 ‘සුදු චූටි’ නිසා ඔබට ලැබෙන ආරාධනාවලට සීමාවක් නැහැ කියනවා?
ඔව්… මට හිතාගන්න බැරි තරම් ආරාධනා ගොඩගැහිලා… හැබැයි මම ඉන් තෝරා ගන්නා ප්රමාණය නම් ඉතාම අල්ප වේවි.
🔴 ඒ තෝරන බේරන සීමාව මොකක්ද සෙනාලි?
එකක්.., චරිත පොදියක් ගොඩගහගන්න මම කැමැති නැහැ. අනෙක සීමාවක් නැතිව විකාශනය වන මෙගා ටෙලිනාට්යය කලාවට මම කැමැති නැහැ. නාට්ය පිටපතක් අතට ලැබුණාම බලන්නේ මගේ චරිතය මොකක්ද… එය මට දැනෙනවද..? ප්රේක්ෂකයා වෙනුවෙන් මට එතැන කරන්නට යමක් තිබෙනවද..? අවසානය පෙනෙන ඉමක තියෙනවාද? ඒ අවසානයට මගේ චරිතය තුළින් සිදුවන වටිනාකමක් තියෙනවද යන කරුණු කාරණා මට හරිම වැදගත් ඇත්තටම.
🔴 ඕනෑවට වඩා තෝරන්නට යෑමෙන් ඔබට බොහෝ චරිත අහිමි විය හැකියි?
වෙන්න පුළුවන්.., නමුත් මට ඕනෑ කරන්නේ එක් ටෙලියකින් හෝ මතක හිටින යමක් කිරීමටයි. සෙනාලි නාට්ය සිය ගණනක රඟපෑවා කියන උජාරුවට වැඩිය, ‘සුදු චූටි’ව නම් කවදාවත් අමතක වෙන්නෙ නැහැ කියලා ප්රේක්ෂකයන් දෙන සොඳුරු තීන්දුවට මම හරි කැමැතියි.
වැඩිදුර යන්නට ඕනෑ නැහැ. ‘නාඩගම්කාරයෝ’ හී ‘පාඨලී’ හෝ ‘සුදු චූටි’ කළ හපන්කමම ඇති ඒ නිදසුන දෙන්න.
🔴 ඔබේ පරමාදර්ශි චරිතය හෙළ නිළි රැජන මාලනී සෙනෙහලතා ෆොන්සේකා?
ඔව්… සැබෑ ජීවිතය තුළ වාගේම මගේ රංගන ජීවිතයටත් මම මගේ ලොකු නැන්දිගෙන් ඉගෙන ගත්ත දේ බොහොමයි. ඇය සමඟ පැයක් කතා කළත් මට දැනෙන්නේ ‘වැඩමුළුවකින්’ සාර්ථක යමක් ඉගෙනගත් හැඟීමයි.
🔴 සෙනාලි, ඔබ බලාපොරොත්තුවලට ආදරය කරනවා?
ඔව්… නිළියක වුණත් සාමාන්ය යුවතියක වුණත් ඒ හැමෝම බලාපොරොත්තු පොදි බඳිනවා.
🔴 නිළි රැජනක ලෙස කිරුළ දැරීමේ හීනයක් ඒ බලාපොරොත්තු තුළ තියෙනවද?
ඔබ අහන දේ මට පැහැදිලි මදි කියලයි මම හිතන්නේ.
🔴 ඔබ කවදා හෝ හෙළ නිළි රැජන ‘මාලිනිය’ වීමට හීන මවනවාද?
අනේ දෙවියනේ.., මට මාලිනිය නම් සුවිශේෂී නිළි රැජන වීමට තියා ඈ ඉන්නා අහලකටවත් එන්නට පුළුවන් කියා ඔබ හිතනවාද? නැහැ… එවැන්නක් කිසිවිටෙක සිදුවන්නේ නැහැ… ‘මාලිනී සෙනෙහෙලතා ෆොන්සේකා’ නම් ඒ ජාත්යන්තර නිළි තාරකාවට කිසි දවසක විකල්පයක් සොයා ගන්නට කිසිවකුට ඉඩ ලැබෙන්නේ නැහැ.
🔴 ඔබ ඔබේ නැන්දනියගේ රඟපෑම් ශෛලියයන් අනුකරණය කරන්නෙත් නැතිද?
කවදාවත් නැහැ.., මම ඇයගේ ආභාෂය උකහාගන්නවා. නිළි රැජන වීමට ඈ කළ මහා කැපවීම ආදර්ශයට ගන්නවා. ඈ තුළින් රංගනය හදාරනවා. හැබැයි මම මගේ ගමන යන්නේ සෙනාලි ෆොන්සේකා ලෙසයි. සිනමාව හෝ ටෙලිනාට්ය කලාව යන ඉසව්ව තුළදී මාලිනී සෙනෙහලතා ෆොන්සේකා කියන ප්රවීණ නිළිය මගේ ආදරණීය ලොකු නැන්දා පමණයි.
ඒ වගේම අනුකරණය තරම් මා අකැමැති යමක් රංගන කලාව තුළ තවත් නැති තරමයි.
🔴 හැබැයි සෙනාලි… ඔබ පුංචි කෙල්ලක කාලේ ඇයව අනුකරණය කළා?
ඔව්… ඒ මම අවුරුදු හතරක, පහක පුංචි එකියක දවස්වල දැකපු හීනයක කොටසක්, නැන්දාගේ චිත්රපටයක් බලලා ගෙදර ආවම හෝ ටී.වී. එකෙන් දැක්කම මම ඒ විදියටම ඒක කරනවලු.., සමහරදාට හෝල් එකේ සීට් එක උඩ හිටගෙන ඒ විදියටම නටනවලු… නිතරම කිව්වේ, ‘මමත් ලොකු නැන්දි වාගේ නිළියක් වෙනවා’ කියලලු. ඒ මගේ පුංචි හීන ලෝකය මිසක අනුකරණයක් නෙවෙයි. කොච්චරද කියනවා නම් මාලිනී සෙනෙහෙලතා ෆොන්සේකා කියන ප්රවීණ නිළියගේ ඥාති දුවණිය ලෙස මම කලා ලෝකය තුළ කිසිදුම වරමක් ලබාගත්තේ නැහැ. අදටත්, හෙටටත් එය එහෙමයි. නිදසුනක් දෙනවා නම් ‘සිරි පැරකුම්’ චිත්රපටයට ඉල්ලුම් පත්ර දානකොටවත් මම ඇගේ කීර්ති නාමය භාවිතයට ගත්තේ නැහැ.
සෝමරත්න මහතා සහ රේණුකා බාලසූරිය මහත්මිය හමුවට ඉන්ටර්වීව් ආවේද ඒ කිසිවක් ඔවුනට අඟවලාවත් නෙවෙයි. ඇගේ නම මට ලොකු ආඩම්බරයක් වුණත් ඒ කීර්තිය මම කිසිවිටෙක අලෙවි කළේ නැහැ.
🔴 ජනප්රිය නිළිය ලෙස දැරූ කිරුළ හොඳම නිළිය ලෙස දරන්නේ කවදාද සෙනාලි?
බලමු… හොඳ යමක් මා කළහොත් මම හොඳම නිළිය ලෙස සම්මාන ගනීවි. එවැන්නක් මට හිමි වෙන්නට තිබෙයි නම් කිසිවිටෙක එය අහිමි වන එකක් නැහැ.
නමුත් කිව යුතුම යමක් සඳහන් කරන්නම්. ‘ආ මග ඉතාම කෙටියටයි තවම මම දකින්නේ, යන්නට තව බොහෝ දුර තියෙනවා. ඒ සිතුවිල්ල තුළයි සෙනාලි ෆොන්සේකා තම ගමන යන්නෙ.
දමයන්ති රේණුකා ප්රනාන්දු
