SLIBFI 2019 සම්මාන උළෙලේදී සෙලාන් බැංකුවට සම්මාන දෙකක්

සෙලාන් බැංකුවේ ඉස්ලාමීය බැංකු ඒකකය 2019 දී පැවැත්වූ ශ්‍රී ලංකා ඉස්ලාමීය බැංකු හා මූල්‍ය ක්ෂේත්‍ර (SLIBFI) සම්මාන උළෙලේදී ඉස්ලාමීය බැංකුකරණය සඳහා ඒකාබද්ධ රන් සම්මානයද, දකුණු ආසියාවේ කලාපීය ඉස්ලාමීය මූල්‍ය සංසදය (IFFSA) පැවැත්වූ සම්මාන උළෙලේදී ඉස්ලාමීය මූල්‍ය ගනුදෙනු සඳහා ලෝකඩ සම්මානයද දිනා ගත්තේය. Timex Bukinda Hydro (U) Ltdහි මුෂාරකා පහසුකමක් සඳහා සාර්ථකව මුදල් යෙදවීම මඟින් සෙලාන් බැංකුව මෙම ඇගයීමට ලක් විය. මෙය ශ්‍රී ලංකාව ඉස්ලාමීය මූල්‍ය ලෝකයේ ප්‍රමුඛ ස්ථානයකට ගෙන ඒම සඳහා විශාල වශයෙන් දායක විය.

ශ්‍රී ලංකාවේ ඉස්ලාමීය මූල්‍ය ක්‍ෂේත්‍රයේ ප්‍රමුඛතම සම්මාන උළෙලක් වන SLIBFI සම්මාන උළෙල, අපක්ෂපාතී ඇගයීම් ක්‍රියාවලියක් සහතික කිරීම සඳහා KPMG ආයතනය සමඟ සම්බන්ධ වේ. KPMG ආයතනයේ මඟ පෙන්වීම යටතේ ස්වාධීන විනිශ්චය මණ්ඩලයක් පත් කරන අතර එම විනිශ්චය මණ්ඩලය විසින් අවසන් විනිශ්චයන් ලබා දේ. IFFSA සම්මාන උළෙලේදී දකුණු ආසියානු කලාපයේ ඉස්ලාමීය බැංකුකරණ ක්‍ෂේත්‍රයේ ඉහළ දක්ෂතා දැක්වූ ආයතන අගය කරනු ලබයි. මෙම සම්මාන උළෙලේදී පාකිස්තානය, බංගලාදේශය, මාලදිවයින, ඉන්දියාව, ශ්‍රී ලංකාව ඇතුළුව අනෙකුත් දකුණු ආසියානු රටවල ඉස්ලාමීය බැංකුකරණ ක්ෂේත්‍රයේ ප්‍රමුඛයෝ සම්මාන සඳහා තරග වදිති.