විවාහයේදී නොගැළපෙන ලග්න ඇවිළෙන හැටි

විවාහයක් සිදුකිරීමට පෙර පොරොන්දම් ගැළපීම, හඳහන් බැලීම සාමාන්‍ය දෙයක් බවට පත්ව තිබේ. මෙහිදී රාශීන්ගේ බලපෑම ගැනද යම් සොයාබැලීමක් සිදුකරයි. කෙසේ වෙතත් ඒ ඒ ලග්න අනුවත් එම ලග්නවලට බලපාන ග්‍රහචාර අනුවත් එකිනෙක ලග්න රාශීන්ට අයත් සහ ආවේණික ගුණ ලක්‍ෂණ තිබේ. එම ලක්‍ෂණ අනුව ඊට ගැළපෙන අනෙකුත් ලග්න හඳුනාගත යුතුය. එවිට ගැළපෙන අය හඳුනා ගැනීම පහසුය. ඒ තොරතුරු අනුව එකිනෙක ලග්නවල ස්වභාවය පහත පරිදි වෙයි.
* මේෂ රාශිය කෲර රාශියකි. පුරුෂ රාශියක් වන අතරම විෂම චර රාශියකි. තේජෝ බලයෙන් යුතු වෙයි. කුජ ග්‍රහයාට අයත් වෙයි.
* වෘෂභ රාශිය සෞම්‍ය වූ ස්ත්‍රී රාශියකි. පඨවි ධාතුවේ සිකුරු ග්‍රහයාට අයත් වෙයි.
* මිථුන රාශීය කෲර වූ පුරුෂ රාශියකි. විෂම උභය රාශියකි. වායෝ ධාතුවට අයත් වෙයි. එසේම බුධ ග්‍රහයාට අයත් රාශියක්ද වෙයි.
* කටක රාශිය ස්ත්‍රී රාශියක් වන අතර, සම චර රාශියක්ද වෙයි. ආපෝ ගුණයෙන් යුතු සඳු ග්‍රහයාට අයත් රාශියකි.
* සිංහ රාශිය කෲර වූ පුරුෂ රාශියකි. විෂම හා ඝර රාශියක්ද වන අතර, තේජෝ ගුණයෙන් යුතු රවි ග්‍රහයාට අයත් වූ රාශියකි.
* කන්‍යා ලග්නය සෞම්‍ය වූ ස්ත්‍රී රාශියකි. සම උභය රාශියක්ද වෙයි. පඨවි ධාතුවට අයත්ය. බුධ ග්‍රහයා අධිපතිය.
* තුලා රාශිය කෲර පුරුෂ රාශියකි. විෂම චර රාශියක්ද වෙයි. වායෝ ගුණයෙන් යුතු සිකුරු ග්‍රහයා අධිපතිත්වය දරයි.
* වෘශ්චික රාශිය සෞම්‍ය ස්ත්‍රී රාශියකි. සම රාශියක් වන අතරම, තිර රාශියක්ද වෙයි. ආපෝ ගුණයෙන් යුතු කුජ ග්‍රහයාට අයත් වෙයි.
* ධනු රාශිය කෲර වූ පුරුෂ රාශියකි. විෂම උභය ගුණයෙන් යුතු තේජෝ බලැති ගුරු ග්‍රහයාට අයත් වූ රාශියකි.
* මකර රාශිය සෞම්‍ය ස්ත්‍රී රාශියකි. පඨවි ගුණයෙන් යුතු සෙනසුරුට අයත් වූ රාශියකි.
* කුම්භ රාශිය කෲර වූ පුරුෂ රාශියකි. විෂම තිර රාශියක් වන අතර, වායෝ ගුණයෙන් යුතු සෙනසුරුට අයත්වූ රාශියකි.
* මීන රාශිය සෞම්‍ය වූ ස්ත්‍රී රාශියකි. සම උභය රාශියක් වන අතර, ආපෝ ගුණයෙන් යුතු ගුරුට අයත් වෙයි.

මේ ආකාරයට රාශි පොරොන්දම් ගැළපීමේදී දෙදෙනා උපන් රාශිවල ගැළපීම සහ චන්ද්‍රයා සිටින රාශියේ ගැළපීමද ඉතා වැදගත් කාරණයකි. ඊට හේතුව දෙදෙනකුගේ බාහිර මෙන්ම අභ්‍යන්තර ගැළපීමද ඉන් පෙන්නුම් කරන නිසාය. චන්ද්‍රයා සෑම කෙනකුගේම සිත නියෝජනය කරයි. දෛනාගේ ආසාවන් සහ හැඟීම් කොතෙක් දුරට ගැළපේද යන්න චන්ද්‍රයා පිහිටි තැන ගැන නිරීක්‍ෂණයෙන් හඳුනාගත හැකිය.

උපන් රාශි දෙකෙන් දෙදෙනනකුගේ රැකියා, හැකියා සහ බාහිර ස්වරූපය ඇතුළු බොහෝ දේ හඳුනාගත හැකි වෙයි. මේ නිසාම රාශීන්ගේ ගැළපීම සෙවීමේදී අමතක නොකළ යුතු කාරණයක් ලෙස චන්ද්‍රයාගේ පිහිටීම ගැනත් අවධානය යොමු කිරීම වැදගත් සේ සලකයි.

විවාහයකදී ස්ත්‍රිය ස්ත්‍රී රාශියකත් පුරුෂයා පුරුෂ රාශියකත් වීම සුබය. දෙදෙනාම ස්ත්‍රී රාශි දෙකටම අයත් වීමද සුබ වෙයි. එසේම ස්ත්‍රියගේ ලග්නයෙන් 7 වැන්න, 9 වැන්න හෝ 10 වැනි රාශිය පුරුෂයට හිමිවීමත් හොඳ ගැළපීමකි.

ස්ත්‍රිය උපන් රාශියෙන් 3 වැන්න හෝ 4 වැන්න, 8 වැන්න හෝ 12 වැනි රාශිය පුරුෂයාට හිමි නම් හෝ ස්ත්‍රී – පුරුෂ දෙදෙනාම පුරුෂ රාශි දෙකකට අයත් වීමද මධ්‍යම සුබපල දෙන කාරණයකි.
ස්ත්‍රි – පුරුෂ දෙදෙනාගේ ලග්න දෙක එකම ග්‍රහයකුට අයත් වීමද සුබ ගැළපීමක් ලෙස සැලකේ. දෙදෙනා අතර, සාමය, සතුට ඇති වීමට එය බලපායි. තවද තිර රාශිවල අයට චර රාශිද ගැළපේ. තේජෝ රාශිවල උපන් අයට වායෝ රාශිද ගැළපේ.

පඨවි රාශිවල උපන් ආපෝ රාශිද ගැළපේ. දෙදෙනාගේ ලග්න දෙක 5, 9 වශයෙන් හෝ 3, 11 වශයනේ පිහිටා ඇත්නම් එයද ඉතා සුබ පිහිටීමකි. මේ ආකාරයට වඩාත් සුබ රාශි ගැළපීමකින් යුතු නම් ඒ අයගේ යුගදිවිය තුළ සතුට, සැපත උතුරා යනු නිසැකය.
ප්‍රවීණ ජ්‍යොතිෂවේදී ජයශ්‍රී නන්ද කුමාර